الموضوع: تجربه تكييف ابيزا عليها مكنه جولف 2

بسم الله الرحمن الرحيم

معايا ابيزا 94 متسقطلها مكنه جولف 2 1300 فاضيه العربيه مكيفه من جوه ومن بره لا بمعنى الكويل موجود والبلاور موجود وشغالين لان العربيه كانت مكيفه وده وفر عليا 50% من المصاريف وف الحوض خراطيم وسربنتينه وفلتر من غير كباس والمكنه دى اصلا مش مكيفه الا ف الجولف 2 المواصفات الاوروبى ودى مبتنزلش مصر الا غلطه لفيت ع كل بتوع الاستيراد قالولى ملهاش لا تكييف ولا باور وده بعد ما نص شعب مصر قعد يفتى عليا واحد يقولى عندى وواحد يقلى اجيبلك الخ الخ الخ وطبعا دخله صيف زى ما انتوا عارفين ومينفعش افضل كده لانى هركنها تحت البيت احسن من الحر والجيش بيقولك اتصرف وكان لازم اتصرف

عملت الاتى

كشفت ع المكنه لاقيتها تمام وتستحمل باور و تكييف بس انا اخترت التكييف لان الباور ف الابيزا مش الحاجه الواو قوى وكمان الدريكسون عندى خفيف ف مش طالبه مصارف زياده ف الوقت الحالى

المهم دور ولفيت ع نوع تكييف كويس ع المكنه وف الاخر اختر الساندن اليابانى 507 لان ده بتاع المكن ال 1300 واختبرته طبعا عند بتاع التكييفات والكبس طلع تمام والميزه اللى فيه انه بيركب للسيراتو والكورولا وكمان شفته بعينى راكب لاوكتافيا اى 4 وبيركب ع اي عربيه انت عايزها لان فيه منه موديلات بس هتعمل تعديل بسيط ف القاعده وكمان ليه توكيل ف مصر ودى حاجه تطمن والكباس ده موجود منه جديد واستيراد ويابانى وسنغافورى وصينى وخلى بالك من الصينى علشان اخره ف العربيه 6 شهور وميزه الساندن من الاخر لو باظ مش هتحتاس هترميه وتروح تجييب غيره ولا ان بتوع الاستيراد يبيعوا ويشتروا فيك

وبعد ما جبت الكباس روحت لبتاع قواعد تكييف راجل كل وظيفته ف الحياه انه بيعمل قواعد تكييف بس روحت لاقيت عنده الفورم جاهزه وقالى انه عمل الشغل ده كتير قبل كده وكمان لاقيت عنده تجهيزات للماروتى و131 و132 والبيجو وغيره وغيره
الكل قعد يخوفنى من الرجه والهزه والرفه وان السير ممكن يقع وكان لازم اجازف لان مفيش قدامى خيار تانى بس الحمد لله كله تمام والراحل سلمنى كل حاجه زى الفل مع العلم ان طنمبوره الكرنك عندى بروح واحده وكنت ناوى ألحم فيها واحده تانيه بس لما روحت للراجل ده لاقيت عنده طنمبوره بروحين مخروطه جاهزه وشكلها يفتح النفس يعنى لا رفه ولا سير يقع
الراجل ركب وعمل شداد للدينمو وشداد للكباس ودور العربيه وزود بنزين رى ما انت عايز لا ف هزه ولا ف رعشه ولا ف تخبيط ولا السير بترج ولا الكلام ده الحمد الله شغله زى الساعه وكده بقا عندى مكنه مكيفه

فاضل كده بس اوصل الخراطيم واشحن بس انا نويت اغير الكلام ده كله بالمره بالسربنتينه بالفلتر علشان مشغلش دماغى بالكلام ده بعد كده واول ما هخلصهم إن شاء الله هقولكم ع الباقى

المشاركة الأصلية كتبت بواسطة hossamalsadik

مبروك ياحازم بيه الكباس
ياريت تتبعنا بباقى المعلومات
عملت الشغل عند مين
جبت الكباس منين جديد ولا إيستيراد وسعره
التكلفه النهائيه وخاصة لو حد عاوز يركب تكيف فى عربيته الغير مكيفه ولا تحتوى على قطع متعلقه بالتكييف
انا اخر سعر تكلفه سمعته لمكونات التكييف بالكامل داخليا وخارجيا جديده عدا الكباس إستيراد كان 3100ج وتقريبا كان فى مركز فى المعادى متخصص فى تكييف السيارات

اكيد انشاء الله هكمل الموضوع وانزل بباقى التفاصيل بمجرد ما اخلص بس الموضوع ممكن يطول منى اسبوعين كمان لانى بعمل الكلام ده ف يوم الاجازه بس