ما هي عيوب افينسيس ؟

**dr.adelelgd** · 27-03-2014 01:49 AM

سيارة تويوتا افنسيس

ايه العيوب بتاعتها؟
ليه مش موجودة بكترة في السوق المصري؟
هل السيارة عملية لطرق مصر والاستخدام المصري؟
قطع غيارها؟

**master-007** · 27-03-2014 02:21 AM

عيبها قطع غيارها نادره وغاليه جدا هى عربيه محترمه فئه الكامرى ..وسعرها رخيص لعدم انتشارها وقطع غيارها ... هى مش منتشره ليه ؟.. مزاج السوق كده .. الكورولا اكله منها الجو

**hany63** · 27-03-2014 08:44 AM

المشاركة الأصلية كتبت بواسطة master-007

عيبها قطع غيارها نادره وغاليه جدا هى عربيه محترمه فئه الكامرى ..وسعرها رخيص لعدم انتشارها وقطع غيارها ... هى مش منتشره ليه ؟.. مزاج السوق كده .. الكورولا اكله منها الجو

لاء مش فئه الكامري دي حضرتك فئه بين الكورولا و الكامري و كان زمان اسمها كورونا و كانت بتنزل ٢٠٠٠ سي سي بس طبعى عشان نظام الجمارك نازله بال ١٦٠٠ و فتيس مانيوال عشان وزنها

**khaled_afandy** · 27-03-2014 10:23 PM

المشاركة الأصلية كتبت بواسطة dr.adelelgd

سيارة تويوتا افنسيس

ايه العيوب بتاعتها؟
ليه مش موجودة بكترة في السوق المصري؟
هل السيارة عملية لطرق مصر والاستخدام المصري؟
قطع غيارها؟

عربية هايلة فوق الوصف، صناعة انحليزى او بلجيكى، تصنع فى اوروبا فقط
عيبها عدم الأنتشار
عمى و احد اصدقائى عندهم من 7 او 6 سنين، صفر من الأعطال ما شاء الله، فقط غير زيت و سوق

**heeshooheeshoo** · 27-03-2014 11:00 PM

سيارة محترمة جدا جدا
عيبها أنها سيارة صح فى مكان خطأ
بمعنى أنها ككثير من السيارات المحترمة مكتوب عليها أن تتجرد من مواصفاتها المميزة لها عند دخولها مصر لأسباب تسويقية سعرية ضرائبية جماركية خزعبلية .. هذا بخلاف الأسباب المزاجية الوراثية المصرية
وبصراحة أنا مش عارف أصحابها بيعملوا إيه فى قطع غيارها !!
ده أنا باشوفها بالصدفة .. كل كام شهر لما ألاقيها ماشية جنبى وللا واقفة فى إشارة
ولولا وجود سيارة أفينسيس عندى فى الشارع كنت بأشوفها كل يوم وأنا رايح وجاى يمكن ما كنتش حفظت شكلها

**amgomaa** · 27-03-2014 11:33 PM

العربيه دى من العربيات القليلة اللى تويوتا عملتها وفيها حاجه تشدك انك تبصلها attractive وكان نفسي اشتريها بس للاسف مفيش منها اوتو

Sent from my GT-S5282 using Forum Runner

**dr.adelelgd** · 27-03-2014 11:50 PM

يعني الكل متفق انها عربية كويسة بس بردوا الغالب ان قطع غيارها نادرة
طيب ايه الحل في موضوع قطع الغيار يعني لو جبتها -ان شاء الله- ممكن تقف عشان قطعة غيار وتعطل العربية علي كده
المشكلة العربية دي مش في السعودية فحتي ممكن معرفش اجيب قطع غيار ليها من السعودية ؟؟
وهل قطع غيارها متوفرة في التوكيل في مصر خصوصا لموديلات 2005 - 2006 -2007 ؟

**KARABANTAS66** · 03-04-2014 02:20 PM

عزيزي dr.adelelgd العربية تحفة و مريحة و واسعة جدا من جوه و ثابتة ثبات غريب علي الارض ماتور رائع استهلاك بنزين منعدم انا سافرت بيها من الغردقة الي الاسكندرية بتنك بنزين واحد بس و الحمد لله ما شاء الله و كنت بجري 180-200 علي الطريق المفتوح هى من الاخر عربية سفر و انا بعاملها كدة للسفر و بس بصراحة عمرى ما امنت علي اي طريق من غيرها اما بالنسبة لقطع الغيار موجودة مع العلم في قطع ارخص من الاوكتافيا كتيير و اصلي كمان و عندنا بالاسكندرية بتعامل مع 2 غير التوكيل ....العيب الوحيد انها مانوال بس في السفر مش بتحس انها مانوال ولا اوتوماتيك بس سحب المانوال داخل و خارج المدينة راااااائئئئئئئع و عاملينها مانوال علشان ماكينة 1600 و وزنها 2 طن ناهيك عن التكييف ......الامان .......من الاخر ما شاء الله و اسيبك تفكر و مش هتندم لو ناوي ...

**Ahmed TRAVCO** · 03-04-2014 03:57 PM

عيبها الأوحد انها تنزل في بلد زي مصر!!
بمعنى ان نظام الجمارك الحرامي بتاعنا اجبر الوكيل انه ينزل الـ1600 منها وده مانيوال، فصعب جدا تلاقي حد كان يدفع 235000 في عربية مانيوال... طبعا الاوتو منها بيبقى 2000 فقط لاغير، ولما المانيوال الـ1600 كانت بالسعر ده يبقى الاوتو الـ2000 تبقى بكاااام؟؟؟ اكيد كانت هتخش في سعر الكامري (نص مليون ولا حاجة)... علشان كده مش منتشرة، زيها زي الاسكودا سوبيرب... نفس القصة بالمللي: عربية مانيوال فوق الـ200 ألف والاوتو منها المفروض 2000 أو 1800 مش فاكر، فطبعا مش بينزل مصر بسبب الجمارك!!!
انما الافينسيس عرية راااائعة ويكفيها انها تصنيع انجليزي بالكامل (ويمكن ده سبب ارتفاع سعرها)...