حادثة من نوع غريب جدااااا

**eslam atia** · 27-03-2014 11:45 AM

السلام عليكم ورحمه الله وبركاتة
عربية هوندا سيفيك زيتي تدخل شارع ضيق ماشي بسرعة ، يقابلة عربية فيفا تاكسي طالع من الشارع يقوم شايطه بوشه ، يجري يخبط فيرنا من الخلف يلبسها في كورلا جاية مخالف وش في وش يلاقي قدامه جبل زلط تطلع علي العربية
بالتفصيل واحده واحده
الشارع دا المفروض اتجاه واحد بس الناس بقي بتستسهل لان الشارع الجانبي مغلق بسبب الكنيسة فلو قلنا ان الصحيح هو اتجاه الهوندا
من اقوال سائق الفيفا انه شاف الراجل بتاع الهوندا راسه راجعه لورا وكأنه بيضحك ومش في وعية
الكلام دا الساعه 7,45 ص وفي اخر الشارع دا مكان شغله ويااادوب يلحق بالعافية طبعا سائق الفيفا نزل من العربية التاني موقفش قام طالع يجري وراه قام الهوندا داخل في الفيرنا من ورا في مقابل الكورلا جاية برضه مخالف لبسهم وش في وش طبعا العربيتين زيرو الفيرنا والكورولا الست بتاعت الكورولا استعوضت ربنا وروحت
صاحبنا بتاع الهوندا اغمي علية وكان بيجيب دم من وشه جامد
بتاع الفيفا اللي اتخبط اول واحد بيقول انه شاف الراجل مش طبيعي وزي مايكون حاله صرع
اصحاب الراجل بتاع الهوندا لما ودوه المستشفي بيقولوا انه اغمي عليه بسبب اول خبطة وبما ان العربية اتوماتيك فضلت ماشيه تخبط في العربيات
الست بتاعت الكورولا فضلت تصرخ وتعيط لأن العربية جديدة وملهاش زنب
صاحب التاكسي الفيرنا طلع هوا الضحيه في الآخر
كبوت وبابين وريداتير واكصدام وفوانيس وقنطرة وشنطة وفانوس خلفي واكصدام خلفي ومش عارف ياخد حقة من مين ولو اتعمل محضر يبقي كل سنة وانت طيب
كل واحد يدفع 51 جنية ويشيل هوا لنفسة
طبع الحكومة كالعادة اجت بعد الحادثة بساعتين وتحس انك جايبهم غصي عنهم مثلا دا بعد حوالي 30 اتصال ليهم
شخط ونطر وشتيمة وقله ادب
اصحاب الراجل بتاع الهوندا قالوا نراضي الناس ونصلحلهم محدش راضي
دا حتي في واحد بفيزبا اتعجن في النص ومحدش يعرف حصله ايه
تتحل ازاي دي ؟؟
اسف صدعتكم بس انا كنت ماشي ورا بحوالي 50 متر وشفت من بعيد الحادثة حسيت انه فيلم اكشن والبطل ماشي يخبط يمين شمال وفي الاخر البطل عربيتة غرزت في زلط البناء ( سن ) واتقلبت علي جنبها

**محمود سامح** · 27-03-2014 12:17 PM

لا الله الا الله

**J A G U A R** · 27-03-2014 12:41 PM

لا حول ولا قوه الا بالله

**shiko85** · 27-03-2014 01:08 PM

لا حول ولا قوه الا بالله
هقول لحضرتك حادثه حصلت مع واحد صاحبى و هقولك الحل كان ايه
عربيه اوكتافيا سايقها سواق حب يختصر حته فا خد ملف عكس خبط ميكروباص و هو بيلف الملف و جرى سواق الميكروباص طبعا جرى و راه علشان يتخاتق معاه سواق الأوكتافيا خبط عربيه صاحبى الكرولا و طلعها على الرصيف و بعدين دخل شارع العربيات مركونه على الصفين و يعدى حاره واحده فضل يخبط فالعربيات اللى المركونه يمين و شمال قول خبط بتاع 6 عربيات من الجنب و فنهاية الشارع بدل مخدش باله و بدل ما يدخل يمين كمل علطول و خبط فعربيه سيراتو كانت مركونه و دمرها
النتيجه تدمير عربيات كتير جدا و جت الشرطه و ابتدوا يعملوا المحاضر بس معروف ان المحاضر مش هتعمل حاجه اصحاب العربيات اللى متأمن عليها سكتوا و فضل سواق الميكروباص و صاحبى و واحد تانى, جيه صاحب الأوكتافيا و بعد ما شاف الدمار اللى السواق بتاعه عمله عرض يدفع تكاليف التصليح و ده اللى حصل
صاحبى ده ظابط جيش و امين الشرطه قاله يا باشا خد تعويض علشان المحضر مش هيعمل حاجه
فا لو حد عايز يحلها ودى يبقى افضل غير كده العربيات هتتحجز للمعاينه و هتبقى عطله كبيره و ربنا يبعد عنا كل شر و يحفظنا جميعا من كل سوء

**horas3000** · 27-03-2014 01:10 PM

لا حول و لا قوة الا بالله
لو في بلد نظيفه
سواق التاكس و الكورولا ملهمش ديه و يمكن يتحبسوا كمان
داخلين عكس و تسببوا بشكل او باخر في حادثه كان ممكن سواق الهوندا يروح فيها
سواق الهوندا حتي لو ماشي بسرعه فهو الضحيه الحقيقيه هنا و الاتنين التانيين ملزمين بتعويضه ماديا و ادبيا