الموضوع: الناس اللى بتشتكى من سحب البومه ال1600

المشاركة الأصلية كتبت بواسطة mahmoud_ali

عاوز اتكلم في حاجه ناس كتير بتقول ان الانسر 1600 سحبها مش اد كده وثباتها مش كويس و موتورها بينام بعد سرعة 160 كم...
انا هتكلم عن الموتور الاول هم معظم اللي بحكموا علي عزمها بالشكل دا معاهم حق لانهم مش فاهمين طبيعة موتورها وللعلم موتور البومه بالذات من اجمل وانعم المواتير اللي ممكن تشوفها بشرط يكون مظبوط صح وهنا بقي تيجي المشكله عندنا في الانسر ظبط الموتور مش تغيير البوجيهات والفلاتر بس ودا سبب المشكله بقي تعالو نشوف: هنغير فلتر بنزين بفلتر اصليييي لان الي فالسوق بيقلل ضغط البنزين عن تجربه والرشاشات اعمل حسابك كدا مع كل تغيره لفلتر البنزين نضفهم بالالترا سونيك و متقلقش مبيبظوش زي ما بيتقال اظن تمام لحد كدا
نيجي بقي للفنيات اللي مش كتير ملتفت ليها و دي هي اللي بتفرق من بومه لبومه وهي التاكيهات والتقسيمه لازم كل فتره نراجع علي خلوص التاكيهات انه يكون 20 لصبابات العادم و30 لصبابات السحب لازم هتلاقي كل التاكيهات او علي الاقل 3 او 4 في كل ناحيه خلوصهم اكبر من الباقي وخدو بالكم العربيه ملهاش ظبطه صيفي وشتوي والظبط يتم والموتور في حرارة التشغيل عشان الخلوص دا بيكون والصباب متمدد ودا الظبط الصح لموتورنا العزيز لكن الغلطه ان اللي بيظبط والموتور بارد و يجرب يلاقي العربيه خشنه وصوتها وحش و سحبها ضعيف .
تاني حاجه وبردو لا تقل اهميه عن اللي فاتو سير الكاتينه: اشتري سير اصلي من التوكيل و ركبه هناك او برا مش فارقه بس اهم حاجه قبل ما يركب تراجع التقسيمه لو بتركب سيور من اللي موجوده في السوق حتي لو كان مزعوم انها اصليه هتلاقي التقسيمه خالفه 2 سنه او 4 كمان ليه بقي؟ عشان السيور اللي فالسوق قباقيبها اصغر واطري من السير الاصلي دي اول مشكله تاني مشكله خامة السير الاصلي انشف وغير قابل للمط مع درجة حرارة الموتور عكس المشاكل دي مع الجري و الكيك داون والds هيخلي التقسيمه تخلف .
جربو اعملو الكلام دا هتلاقو العربيه بقت حاجه تانيه خالص بس الحقيقه انها بقت حاجه اولانيه ودي طبيعتها وهنشوف هدوء وعزم غير معهودين لموتورنا وتجميع بسهوله لسرعة 190 كم وصوتها هينعم قوي حتي في الكيك داون هتلاقي انك سامع صوت بس صوت نغمه جميله وهاديه لموتورنا العزيز.
دي تجربتي مع معشوقتي لانسر انا اصريت ان الكلام اللي بيتقال عليها دا غلط وبعد وقت طويل من الحث والتفكير توصلت لان الكلام دا فعلا غلط وان اصراري صح وكمان كتير من ملاك البومه اللي بيحبوها بس عارفين ان مفيش اتنين بومه اخوات كل واحده ليها شكل وروح ودم مختلف عن التانيه.

طيب ازاى اظبط التاكيهات هل د ينفع فى السياره الاوتو...

كلام مظبوط جدا

طب بعد اذنك يا باشا انا بعانى من المشكلة دى ممكن معلش واحدة واحدة معايا دلوقتى انا غيرت بوجيهات وفلتر هوا اصلى ونضفت البوابة ومافيش جديد
هاغير فلتر البنزين بواحد اصلى وكمان سير الكاتينة اصلى
نيجى بقى لموضوع التاكيهات اى ميكانيكى عادى يعمل الموضوع ده ولا ايه
وموضوع تنضيف الرشاشات فين الجهاز بتاع الالترا سونيك ده ؟؟؟