امبارح الفردة الشمال الخلفية لاقيتها علي الارض و الحمد لله , طبعا كنت متعكنن جدا خصوصا اني ملحقتش امشي بيها غير 3000 كم و الكاوتشة الجديدة ثمنها مش هيقل عن 800 جنيه .
حبيت اشارككم تجربتي مع شوية نصايح جميلة عشان تتجنب النصب بتاع صنايعية الكاوتش و تحافظ علي الفردة و الجنط و العربية نفسها بقدر الامكان .
اول حاجة و لازم نكون متفقين عليها , ان الجنط اساسي يكون في العربية و لكن انك تنزله علي الارض ده خسارة كبيرة جدا و ليها ثمنها لما تيجي تبيع العربية لما توري اللي بيشتري الكاوتش جديد لانج و منزلش علي الارض صدقوني الحركة دي بتفرق جدا جدا مع اللي بيشترى خصوصا لو كان شخص عادي مش تاجر و ده عن تجربة .
طيب ايه الحل , امشي علي الفردة و هيا علي الجنط كدة لغاية موصل لبتاع الكاوتش ؟
لأ طبعا ده اسواء قرار ممكن تاخده لأنك بالشكل ده هتبهدل الكاوتش و السلك اللي جواه من ناحية الشفة الخارجية او من الجانب و بكدة هتبقي دمرت الكاوتش تماما .
طيب ايه الحل ؟
الحل واضح في الصورة اللي قدامك دي , هذا الشئ رغم ان ناس كتيرة بتستهون بيه و بتقلل من شأنة الا انه انقذ كاوتشي ووفري 800 جنيه و الحمد لله .
http://nileup.com/up/uploads/nilemotors_13960111031.jpg
بعد محضرتك هتنفخ الكاوتش بالكومبريسور الصغير ده , هتروح عند واحد بتاع كاوتش يكون امين او علي الاقل اتعاملت معاه قبل كدة عشان احتمالية النصب تقل .
نيجي بقا لنقطة في غاية الاهمية , و لازم تركز فيها جدا .
متخليش الراجل يحط الكوريك او التمساحة في اي مكان تحت العربية و خلاص عشان ميبهدلكش العتب و لا العفشة , فيه اماكن محددة و مبينة في العربية عشان تثبت الكوريك فيها و لو الراجل مستوعبش كلامك اكد عليه انك عاوز الكوريك يركب في المكان ده و هو عبارة عن بار ماشي بطول العربية و فيه زي نقرتين او حتتيتين متاكلين (يسمى بال Notch) و هو ده اللي تركب فيه الكوريك و ترفع وانت متطمن و الصورتين دول بيوضحو الاماكن السليمة باللون الاخضر و الخطأ بالاحمر .
http://nileup.com/up/uploads/nilemotors_13960111032.jpg http://nileup.com/up/uploads/nilemotors_13960111033.jpg
و طبعا قبل ميرفع
خليه يهوي المسامير شوية عشان مش بعد ميرفع يخليك ترفع الهاند بريك و يقعد يقرص بالمفتاح و العربية متشعلقة .
وده شكل العربية بعد مترفعت و الكاوتش اتشال .
http://nileup.com/up/uploads/nilemotors_13960111034.jpg خد بالك في المرحلة دي بالتحديد و هو بيدور علي الخرم انه بيبقي معاه قطعة معدنية مدببة بيخرم بيها الكاوتش و انت مش واخد بالك عشان يطلعلك اخرام اكتر و انت هتكون قدام الامر الواقع عشان الكاوتش مفكوك و العربية متشعلقة فهتكون مضطر انك تعملهم عنده.
في الحالة بتاعتي كان مسمار قلاووظ برأس صليبة , طبعا هو كان هيجيب كماشة و يشده و خلاص !!!
انا طبعا رفضت و خليته يجيب مفك و يفك المسمار بحيث اطلع بأقل الخسائر و الكاوتشة متخووش او الخرم يوسع مكان قلاووظ المسمار و هو بيخرج و الحمد لله انه اقتنع بكلامي .
بعد كده هتلاقيه من نفسه عاوز يحدد مكان الخرم بعد مشال المسمار عشان يعرف يلحم فين و كل بتوع الكاوتش بلا استثناء بيبقي معاهم مسمار صنارة رفيع بيدقه مكان الخرم عشان يعلم مكان الخرم و طبعا الكلام ده ميعجبنيش :Copy of rfds: و كنت عامل حسابي وجايب قلم كوريكتور و قلتله يعلم مكان الخرم و ميخرمش بمسمار -- مش قادر اقولكم كان مخنوق مني قد ايه --
المهم علم مكان الخرم بالكوريكتور و فضا الهوا من جوة الكاوتش و حط الكاوتش علي المكنة اللي بتفصل الكاوتش عن الجنط وهنا بقي
خد بالك جدا من اللي هقولة :
المكنة دي عبارة عن عامود حديد و اخره زي ضفر حديد بيدخل مبين شفة الكاوتش و الجنط و يبدأ يلف الكاوتش علي الجهاز فالكاوتش يخرج برا الجنط . ودي صوته عشان تتخيلو كما هو مبين بالسهم :
http://nileup.com/up/uploads/nilemotors_13960111035.jpg
طيب ايه الخطورة في كدة ؟ اقولك انا , لو الصنايعي ده مش واخد باله و معظمهم بيعملو الحركة دي بينزل العمود ده بحيث ان الضفر الحديد بيبقي ملامس للجنط بتاعك فلما يجي يلف الكاوتش الضفر الحديد ده هيقعد يكحت في الجنط بتاعك و هيعملك شكل دائري في الجنط كله و يببوظلك شكله تماما . طيب ايه المطلوب انك تعمله ؟
حضرتك هتأكد عليه يبعد الضفر الحديد عن الجنط بمسافة صغيرة عشان ميحكش في الجنط و متكبرش المسافة قوي عشان القوة المركزة علي شفة الكاوتش بتاعك متخليش الكاوتشة تمط او تشقق و تبوظه .
طيب خلاص , فصلنا الكاوتش عن الجنط , نيجي بقا للحيرة الشديدة نلحم ايه ؟
خابور ولا
لحام داخلي ؟
انا بصراحة بفضل اللحام الداخلي ولو انه مينفعش في كل الحالات .
طيب و الخابور ؟
طبعا ممتاز بس في حالة واحدة بس و هي ان الخرم
ميكونش في الجزء السفلي للكاوتش الملامس للارض او بمعني اصح لما يكون الخرم في جانب الكاوتش اللي بيبقي ظاهر ليك و ده في الغالب بيبقي حد خرمهولك بقصد لأنه مش ملامس للارض اصلا و بيفضل يتعمل بالخابور عشان الجزء ده بيبقي متني شوية مع حمل العربية و مع الحركة و المطبات اللحام الداخلي ممكن يفك و ينفس و اهم شئ لو لاقدر الله الخرم من الجنب تستخدم الخابور الامريكاني و بيبقي مكتوب علي العلبة بتاعته عشان النوع ده لما بتمشي بالعربية بيبدأ انه يسيح في قلب الكاوتش و يبقي جزء من الكاوتش فبيبقي كويس جدا في الحالات دي .
اما في حالتي فانا استخدمت لزق داخلي لأن الخرم كان من تحت و ملامس للارض , طبعا لازم يصنفر بالشنيور بسيط من جوة الكاوتش عشات اللحام يمسك كويس و قبل ميحط اللزق لازم ينضف مكان الشنيور كويس و يشيل الرايش و يفضل انك تحط 2 لحام واحد صغير و بعديه لزق و بعديه تحط لحام مقاس اكبر .
http://nileup.com/up/uploads/nilemotors_13960111036.jpg
بعد كدة تخليه يركب الكاوتش في الجنط و تاخد بالك من الضفر الحديد برضو و تزود الفردة بالضغط المطلوب و تركب الكاوتش وخليه يتأكد ان الكاوتش بات في مكانه كويس و يركب المسامير كروس او عكس بعض و بعدين ينزل بالكوريك و يقرط علي المسامير تاني و الفردة علي الارض.
اخر خطوة و هي تظبيط ضغط الكاوتش , و لو ضغط ديجيتال يبقي ممتاز بس خد بالك من الوحدة المستخدمة للقياس عشان الصنايعي كان جايبه علي ال BAR و مصمم انه كدة مظبوط و كقتنعش غير لما جبتله صاحب المحل ووريته انه لازم يختار PSI و الحمد لله اقتنع .
اخر خطوة بقا مهمة جدا و هي انك تتابع الكاوتش بعديها بيوم و تشوف الاخبار ايه, و الحمد لله كنت عامله علي 34 ول لقيته زي ما هو .
http://nileup.com/up/uploads/nilemotors_13960111037.jpg
اتمني يكون التقرير عجبكو و فيه معلومات افادتكم و يارب تكون اخر الاخرام .
