فكروا معايا .. ابيع العربية ولا لأ
من فترة كبيرة كنت ممنوع من سواقة المانيوال ... بس حاليا انا ممنوع نهائي فلازم اشوف حاجة مانيوال أو أستني شوية ممكن أرجع اسوق مانيوال تاني ... وده مش أكيد
المشكلة ان عربيتي ده تعبان فيها جدا
هي نوبيرا 1 بس مسقطلها 2000 cc ومظبط فرالها ومركب فيها كل حاجة بنفسي وبشهادة الكل هي أسرع نوبيرا 2000
غير طبعا ذكرياتي معاها اللي لا يمكن تتعوض
ومن حوالي كام شهر حد عرض عليا هياخدها ب 57 ورفضت للأسباب ده
دلوقتي لو فكرت أبيعها مش عارف حتي أجيب ايه أركبه بعدها !!!!!!
مفيش قدامي غير BMW E36 او أشوف GEN 2
طبعا فرق شاسع بس اعمل ايه !!!!!
مش سهل أطلع من النوبيرا أركب عربية تانية
النوبيرا ثبات مع عفشة ناعمة ... وانا كمان كنت بجيب أنضف وأغلي حاجة ليها فالعفشة ممتازة
تكييف قوي جدا وده مش هلاقيه غير في عربيات معينة
موتور .... وطبعا ال 2000 عالنوبيرا 1 مخليها طيارة ... طيارة ده كلمة قليلة ... من 0 ل 100 في 7.2 ثانية
واسعة من كل حتة ... صالون وشنطة وموتور
أقدر أعدل عليها كل حاجة بسهولة وأروقها بأقل الأسعار
كنت بجيبلها كل حاجة GM وأحسن حاجة ان قطع غيارها مرطرطة في كل حتة ... بس الأصلي عند ناس معينة ... ولو لقيت أحسن من الأصلي بجيب ... زي المساعدين والمقصات
انا من الاخر كدة صارف عليها 23 الف قطع غيار ومصنعيات وحافظها صم وعارف كل اللي فيها
اه ممكن فيها كام حاجة بس متعايش معاهم ... فرش الأبواب متبهدل شوية ... ازاز الأبواب تقيل حبة ... فوانيسها مصفرة
المهم كفاية تسبيل ليها بقي ونشوف
انا كنت بحاول أعيشكوا الموقف معايا بس
دلوققتي لو شوفتلي دبانة أوتو تكون حالتها نضيفة
انا أخترت دبانة عشان مانزلش في حاجات كتير ... ثبات ... تعديل
بس طبعا تكييف عيان وقطع غيار حاجات كتير فيها غالية
جين 2 عشان كنت فكرت في لانسر بس مبحبهاش ولقيت الجين أفضل في الثبات
وهي ثباتها معقول وتكييف حلو وموتور محترم جدا و الأوتو بتاعها عجبني ... بس طبعا حوار التعديل ده مش سهل ... قطع غيار غالية وقليلة وناقصة
فكروا معايا