بطاقة الرقم القومى

**salah_86** · 30-03-2014 11:35 PM

بسم الله الرحمن الرحيم
السلام عليكم ورحمة الله وبركاته
دلوقتى انا كنت بغير محل الاقامة فى بطاقتى القديمة لعنوانى الجديد
واستلمت البطاقة الجديدة انهاردة ناهيكم عن صورتى اللى شبة المجرمين العنوان مكتوب ناقص
يعنى انا كنت كاتبة برج فلان الفلانى شارع فلانى - شبين الكوم المنوفية
لقيت العنوان مكتوب شارع فلانى شبين الكوم المنوفية وبس
يعنى لو جايلى جواب يدور عليا فى شارع رئيسى طولة 2 كيلو دا ينفع واسئل الموظفين والضابط اللى هناك كلو يقولى هو بيتكتب كدا

**elpasha1** · 30-03-2014 11:37 PM

كلنا هذا الرجل

**ramymechanics** · 30-03-2014 11:55 PM

بيتكتب العنوان اللى فى وصل النور أو عقد الشقة

**أبو آسر** · 31-03-2014 12:20 AM

وعليكم السلام ورحمة الله وبركاته
هو فعلا بيكتبوا نفس العنوان اللي مكتوب في وصل الكهرباء وبطريقة مختصرة علشان مساحة البطاقة لا تسمح بالتفاصيل
زائد إن عنوان البطاقة ملوش علاقة بأي جواب هييجي لحضرتك ! حضرتك لما بيجيلك جواب مفروض انك بتكون انت اللي كاتب العنوان زي ما انت عايز حتى لو عايز تكتب الدور ورقم الشقة كمان فإيه علاقة البطاقة بالجوابات ؟

**salah_86** · 31-03-2014 04:50 AM

امال البطاقة لازمتها ايه مش المفروض انها توضح عنوانى
فرضا لو عربية خبطتنى ومت
المفروض انهم يعرفوا عنوانى من البطاقة اللى فى جيبى

**أبو آسر** · 31-03-2014 04:58 AM

المشاركة الأصلية كتبت بواسطة salah_86

امال البطاقة لازمتها ايه مش المفروض انها توضح عنوانى
فرضا لو عربية خبطتنى ومت
المفروض انهم يعرفوا عنوانى من البطاقة اللى فى جيبى

لأ الدنيا تطورت مبقوش بيجيبوا أهل المتوفى بالبطاقة بيجيبوه بالموبايل من الأرقام المتسجلة عنده :)
بهزر بعيد الشر عليك
انت شوف وصل الكهربا لو العنوان مطابق للبطاقة يبقى كده هما عملوا الصح ومينفعش يعملوا غير كده وساعتها الحل إنك تروح تغير العنوان اللي في وصل الكهربا من شركة الكهربا وتحاول تكتبه زي ما انت عايز وبعدين تروح تغير العنوان في البطاقة
لقيت البرج مكتوب في وصل الكهربا ومش مكتوب في البطاقة مع ان البطاقة فيها مكان فاضي في خانة العنوان يبقى تروح السجل المدني وتشوف الموضوع ده وتحاول تقنعهم يغيروها زي ما في وصل الكهربا