الموضوع: ايه اللي كان نفسك يبقي موجود في كورولا ٢٠١٤ ؟ و اهميته بالنسبة لك ؟ موضوع للمناقشة

المشاركة الأصلية كتبت بواسطة ahmed_m_ashraf

وحدات الرفع وضم المرايات يركبو في التوكيل ماشي .. فتحة سقف مش مشكلة بناقصها .. الإرتفاع وعليه كلام كتير ...
بس بصراحة إللي واقف بيني وبين العربية دي ٣ حجات:
١- إضائة زينون بعدسات - ودي لا توكيل ولاغيره هيعرف يعملها ..وعشان تتعمل لازم الواحد يشتري فانوسين ويعدلهم يعني $$$$$ وإللي يجيلة قلب بقى يفك فوانيس العربية أصلا. كان لازم حتى الهاي لاين يبقى فيها زينون بعدسات. ده أنا حتى مش لاقي لحد دلوقت سكة إن الواحد يجيبلها جوز فوانيس كده من بره ويشحنهم. حتى إللي بينزل بره عدسات ليد مش زينون.
٢- فاميه أو ستاير فبريكة - هو مينفعش واحد دافع ١٨٨ ألف يبقى عنده شوية خصوصية أو يحمي ولاده من الشمس من غير ما يبقى ماشي مقلق من المرور .. ياإما المرور يسمح بالفاميه بدرجات خفيفة زي كل بلدان الدنيا.
٣- غلق السنتر مع الحركة - معلش ممكن تبان هايفة بس برضة عربية ب ١٨٨ ألف الأوبشن ده لازم يكون أساسي سنه ٢٠١٤. مينفعش نقول الكوزولا طول عمرها كده ..أمال العربيات بتطور ليه.

أنا العربية دي طالعة من عيني بس لولا الحاجات دي .. يعني كان بناقصة الباركينج أسيست وكانو حطو الحجات دي.

ملحوظة: دي وجهة نظري الشخصية .. وممكن الحاجات دي متفرقش مع ناس تانية وبالتالي العربية ممتازة بالنسبالهم وربنا يباركلهم فيها.

استاذ احمد منورنا و الله في تويوتا

طبعا الكمال لله وحدة و عشان كدة الموضوع ده اتعمل للنقاش ، و النقاش بيؤدي لردود و اقتراحات بنستفيد منها.
علي فكرة انا كنت مركب زينون في التوكيل من ٣ سنين و كان بسم الله ما شاء الله حاجة بجد محترمة بيفرش الطريق الفوكس بتاعة رائع درجة بياض ممتازة و مش بيعمي اللي قدامك ، و في التوكيل حاليا موجود نوعين و منهم اوسرم و كذا واحد ركبه و مبسوط بيه جدا و بيقوله انهم مكانوش متوقعينه بالنضافة دى، فممكن يكون في اكسسوار افضل من الستوك بس ده مش الطبيعي دايما بس في الحالة دي كان اختيار موفق.
و الميزة في الكورولا انك تقدر تتحكم في ارتفاع الفوانيس مانيوال في تاني فئة و اوتوماتيك في الهاي لاين فتخيل ده بالزينون.

بالنسبة للستاير و الفيميه في ناس بتبقي اساسية عندهم بس بيبقي فيه بدايل ستاير بتركب و في منها تفصيل علي مقاس العربية بالملي.

السنتر عندك حق، و انا هحاول اشوف مع التوكيل الموضوع ده يمكن نوصل لحل ، و لغاية منوصل لحل هبقا ادوس علي زرار السنتر اول متحرك .

طبعا وجهة نظر حضرتك تحترم جدا و بتفرق من واحد للتاني بس انا كنت بحاول اشوف مع حضرتك البدائل

المشاركة الأصلية كتبت بواسطة ahmed_m_ashraf

طبعا أستاذ محمد هاني .. أنا بفضفض معاكو عشان الحجات دي هتحرمني أو تصعب عليا إختيار معشوقتي الأولى من أيامموديل ٢٠٠٧ وأنا نفسي أمتلها.
بص عن تجربة عشان أنا مركب عدسات في اللوجان وجايبها من بره مش من هنا ..العدسات فرق شاسع عن الزينون في الكشاف العادي وأنا عندي تحكم في مستوى النور مانوال فالموضوع ده هفتقدة بشدة لو ركبت كورولا. والحل إني أركب نفس العدسات إللي عندي في الكورولا بس مين يجيلة قلب يجيب كشافين برقم خزعبلي ويفتحهم ويعمل فيهم اللكام ده.

الستاير أنا عارف الكبس ومركبهم ومحدش كلمني للأمانة .. بس آن الأوان بقى لما الواحد يغير لحاجة عالية كده يبقى فيها حل فبريكة ..إما فيميه أو ستاير رول فبريكة.

لو سمحتم ياجماعة ياريت كل إللي يعمل موضوع التعلية يعمل تقرير عشان نشوف إنطباعات وآراء الناس إيه في التعلية وهل فرقت بشكل ملحوظ ولا مفرقتش كتير.

التعلية لسة الناس القديمة معدلوش.
لكن في ناس معاهم عربيتين واحدة قبل وواحدة بعد و في واحد كان معاه قبل و باعها عشان واطية و اشتري لما نزلت معدلة.
الاتنين عمل مواضيع بتفيد ان مفيش اي تأثير علي الثبات نهائيا و ان التأثير في عدم الحك فقط لا غير.
وده يرجع لان التعديل ده مش حاجة جديدة مخترعينها و لكنه مجرب و بتنزل بالارتفاع ده و العفشة دي في الخليج و روسيا و هما كل اللي عملوه انهم ركبو العفشة الخليجي المجربة و المصممة عليها العربية من الاول فلا داعي للقلق.