الموضوع: استفسار عن تغيير كاوتش اللوجان

المشاركة الأصلية كتبت بواسطة mkaram84

السلام عليكم
معلش انا عارف انه موضوع قديم بس انا هافتحه عشان قررت ان شاء الله هاغير كاوتش العربية الاسبوع ده ان شاء الله - العربية مر عليها سنتين ونصف تقريباً وعاملة 41 الف كيلو - وكنت هالبس في عربية بسبب زحلقة كاوتش الباروم السيء بتاع العربية

اتصلت النهاردة على عبده امين المعادي وسألته:
بريدجستون تورنزا gr-90 ياباني: 700 جنيه
يوكاهاما سي درايف ياباني: 575 جنيه
المقاسات بتاع اللوجان: 185/15/65

انا ان شاء الله ناوي اروحله خلال الاسبوع ده ان شاء الله فحابب اسأل كام حاجة واتمني تساعدوني يا شباب الله يكرمكم:
- ازاى اعرف ان الكاوتش الجديد حالته جيدة وتاريخه حديث؟
- انا ناوي احط نيتروجين هل اركبه عنده ولا اروح fit&fix؟ وتكلفة التركيب كام تقريباً؟
- بالنسبة للفردة الاستبن انا عمري ما استعملت اللى جاية مع العربية - هل ممكن استخدمها لو حاجة حصلت لا قدر للكاوتش الجديد ولا لازم الاستبن يكون نفس نوع الفردة الراكبة؟

وجزاكم الله خيراً
والله المستعان

سؤال كمان الله يكرمكم
- في حاجة معينة اعملها في العربية بعد تركيب الكاوتش الجديد؟ في ناس كاتبة اني اعمل ترصيص وظبط زوايا
ارجو الافادة

المشاركة الأصلية كتبت بواسطة adel_edrees

أزيك يا أستاذ مكرم
أنت أتأخرت في تغيير الكاوتش ده لأن الكاوتش ده في منتهى الخطورة لا ثبات و لا فرامل و لا أي حاجة خالص
اللى أنا أعرفه أن عبده أمين المخزون اللى عنده قديم شوية و خصوصا اليوكوهاما أنا روحت الفرع اللى حضرتك روحت له و لقيت الكاوتش اللى عنده قديم و غالى 25 جنيه في الفردة عن على صبرة اللى في شارع أحمد سعيد أنا شارى شهر 6 2014 و تاريخ الأنتاج بيبقى مكتوب على الكاوتش برقم الأسبوع يعنى مثلا 2016/20 يعنى السبوع 20 اللى هو شهر مايو 2016
مافيش ظبط للزوايا في ترصيص بس و شوف حيخد منك الفردة القديمة بكام لأن الباروم بيطلع منتهى بصراحة هو كاوتش زبالة لأن أنا شفت بنفسى المداس بتاع الكاوتش مش مستوى و ده بعد 12 ألف كيلو فقط من النص الكاوتش مجوف فأنت قوله أي حاجة فيهم اللى تدفعه و كده يعنى
أنت أخترت أنسب كاوتشتين للوجان موجودين في مصر
تقييمى للكاوتش اليوكوهاما بعد 800 كيلو و سنة ونص أستخدام
ثبات رائع على سرعات عالية تخوفك
فرامل عادية مش واو و لا حاجة بتزحلق برضه بس مش زى الباروم طبعا
أستعمل الكاوتشة الباروم كأستبن عادى ةو لا حتفرق خصوصا أنك بتقول أنها جديدة
ذ
بالنسبى للبريدجستون انا ناوى أن شاء الله التغييرة اللى جاية تكون بريدجستون لكن أنا حأروح fit & fix على طول
تكلفة التركيب حتكون 20-25 جنيه في الفرده
و أي خدمات أنا تحت أمرك

ازيك يا استاذ عادل.. ليك وحشة والله
شكرا لردك الجميل

انا كلمت على صبرة وللاسف ملقتش النوعين عنده
كلمت عبده امين عشان اتأكد من تاريخ الانتاج وسألته عن البريدجستون قاللى انتاج شهر 7 / 2015 - والسعر شامل التركيب والترصيص - 700 جنيه الفردة
انا ميال لتركيب البريدجستون عن اليوكوهاما (فرق السعر 500 في الاربع فرد) - ايه رأيك؟

وجزاكم الله خيراً
والله الموفق

على فكرة يا استاذ عادل سألت في Fit & Fix فرع شارع النصر - المعادي عن GR-90 الياباني وكانت مش موجودة عنده وسعرها 860 جنيه - وقاللى GR-90 التايلاندي بس مقاس 195/15/65 وسعرها 620 جنيه
ولقيت في محل تبع واحد قريبي بس في الفيوم - بريدجستون B250 تايلاندي وسعرها 525 جنيه

انا ازددت حيرة بصراحة.. الله المستعان