باختصار الفئه ده من البشر البلطجه والشر والجهل والعنف فى دمهم انا بريح دماخى وبعتبرهم شوية حيونات وابعد عنهم
باختصار الفئه ده من البشر البلطجه والشر والجهل والعنف فى دمهم انا بريح دماخى وبعتبرهم شوية حيونات وابعد عنهم
انا اسف طبعا لو ردى كان طويل شوية بس حابب احكى لحضرتك موقفين
و اقول لحضرتك ان كل موقف و ليه رد فعل مختلف ساعات الخناق هو الصح و ساعات السكوت هو الصح
لكن دايما تعمل حسابك ان مافيش خناقة فيها كسبان و خسران . كله بيبقى خسران لكن كل سئ نسبى برضه
و على فكرة السواقة مالهاش دعوة بالميكروباصات دلوقتى ممكن تلاقى عربيات ملاكى احسن موديلات سايقينها عربجية بس حضرتك هنا بتتكلم على سواقين الميكروباص فهلتزم بده.
الموقف الاول : شبرا عند مصنع الادوية اتنين سواقين ميكروباص قفلوا الشارع بيكلموا بعض و وقفوا الطريق وراهم . فضلوا على كده كتير ؟؟؟ 10 دقايق و لا حياة لمن تنادى و لا كأن فيه كلاكسات و لا الهوا .
رد الفعل . قطعت الطريق بالعكس و عرضت العربية فى نص الشارع و نزلت شايل الشيطان على كتفى و مصدر القرون و مش شايف حاجة قدامى . و لا حاسس بحاجة . و الناس حاشونى بالعافية و نزلوا فيهم تلطيش و شتيمة
النتييجة . انهيار عصبى لزوجتى و صراخ و نحيب
حالة نفسية للاولاد و عياط و بهدلة . و البنت قعدت 6 شهور بتخاف تركب معايا العربية و لحد النهاردة فاكراها و طبعا كان استحالة لحد فترة قريبة اخد العيال و انزل لوحدى . يعنى لو كنت صبرت زى الناس اللى صبرت كان حصل ايه ؟؟
ادينى نزلت لمستواهم العقلى و اتعاملت بس النتيجة ؟؟؟؟؟
الموقف التانى فى فيصل و كنت لوحدى سواق ميكروباص حليوة كده و مبرشم ما شافنيش البيه الطريق واقف و البيه عاوز يعدى ما شافنيش راح حاضن العربية بالجنب و خد العربية زنقها فى الرصيف لدرجة العربيتين لزقوا فى بعض و ان مزنوق فى الرصيف و الحيوان واقف بيشتم و يقولى انت مش شايفنى عاوز اعدى! !!!!! ماعرفش خرجت من العربية ازاى (من الشباك طبعا لأن البيبان كلها كانت محضنة ) و رحت جبته من رقبته و شديته من شباك الميكروباص . راح معيط و الله العظيم عيط . بصراحة سبته . صعبت عليا نفسى انى اكون السبب فى كسرة نفس بنى أدم بالشكل ده . و حتى ما سألتوش فى اضرار العربية و طبعا عشان نعرف نفك العربيتين من بعض اضطريت اطلع فوق رصيف ارتفاعه 25 سم غير الجنب اللى باظ . وطبعا حلال اى حاجة اعملها فيه بس بصراحة لما لقيته بيعيط ما قدرتش اعمل حاجة
دول موقفين و عكس بعض تماما واحد المفروض اسكت و اصبر و اتعصبت
و التانى المفروض اموته و سكت .
مافيش مقياس للتصرف كل موقف و ليه ظروفه . و كل واحد كمان و ليه ظروفه . حالتك النفسية كويسة ؟؟ زهقان متخانق فى الشغل ؟ واخد شغلانة كويسة و رايق؟؟؟؟؟
لتصرف السليم بقى فى رأيى الشخصى .
قرص عليك سيه يعدى . ما هو مش هاياخد الجايزة
مش هاينفع يعدى الا لو انت عملت حادثة اقرص انت و لبس امه فى الحادثة . بس بعدها تسيبه و تمشى ما يحصلكش .
بفرض انه حصلك لأى سبب و زنق عليك
تفك حزام الامان و تقفل الزجاج و السنتر بتاع العربية كلها و تفتح شباكك ربع فتحة و تفتح السنتر عندك انت بس
ايدك الشمال فيها اى حاجة تحت الكرسى للأمان و اليمين ع الدريكسيون و مدى غيار للعربية و قاعد مكانك و عينك فى وسط راسك . شوية شتيمة منه و عرفت تخلص الموضوع بالكلام خلاص مافيش مشكلة . الموضوع هايزيط تدى غيار عكسى و تطلع بالعربية و تسيبه ينبح.
ما عرفتش بقى تطلع منه و لقيته بيستهبل و تخبيط ع العربية و حديد على الزجاج و الصاج و كده ما بدهاش
انطق الشهادى يا معلم و تزل الستاير و اللى يقولك مستواك الاجتماعى و الفكرى ترد عليه و تقوله فكرى مات . ما هى كده كده خربانة .
مع ملاحظة ان حضرتك ما قلتش انت اتصرفت ازاى لحد دلوقتى .
يا ياشا احنا ابتدينا نقلق عليك ... هما خطفوك ولا اية .. فييييييينك عشان تقول اللى حصل .... !؟
باشا اية الى حصل معاك
بس علي فكرة المواقف دى بتبقي حاجة نسبية يعنى ممكن السواق يبقي فى عينك عبارة عن جحش طايش وعاوز الى يروضة وبعد ما تتيدلة على دماغة والموضوع ينتهي تلاقي ضميرك بيأنبك وتقول كان هيجرا اية لو كنت سامحتة وجيت على نفسي وممكن تحس انه واحد مستبيع ومش فارق معاة اى حاجة وتجر معاه ناعم وبعد كدا بينك وبين نفسك تحس انك جبان وكان لازم ترد علية حتى لو كان هيبقي فيها دم .
في كل الاحوال المسامح كريم والعفو عند المقدرة احسن حاجة
انا عن نفسى شايل فى شنطة العربية ماسورة حديد قطر نصف بوصة وبطول متر ربنا ما يحوجنى ليها**
راي ان دي فئة غير مستحب التعامل معاهم بطريقتهم
فئة هايلاين ولا سبورت :d
معلش يا جماعة كنت عايز اغير الجو
بص يا سيدي الفاضل انا قابلت مواقف زي كده وانا ماشي ،يعني واحد كان راكب موتسيكل خبط واحد صاحبي بالغلط بخشب كان شايله
بقله مش تحاسب يا عم ،صاحبي سخن وشتمو شتيمة الموضوع مايستهلهاش،
فاالتاني نزل هو و اللي معاه وانا جاي اتفاهم معاه بأدب طلع التاني من النوع الي شايف نفسه المهم الموضوع هدي ،حاولت اجيبه تاني معرفتش فا قلت اهدي الدنيا شوية وبعدين ابقى اجيبه تاني واقوم معاه بالواجب
دي أشكال ممكن تشوف حضرتك راكب عربية محترمة ومعاك عيلتك فا الكائن ده بيتغاظ لما ابكائن ده ساب التعليم وهو ف ابتدائي ويمكن بمزاجه فا بتلاقيه بيحاول يثبت نفسه ع حضرتك باي طريقة ،فاصبر كفاية ان حضرتك كان معاك اهلك
أنا أخوكم في الله ( مهندس / حسام .. 50 سنة ) صاحب الموضوع الأصلي . و أنا آسف جدا جدا أني أتأخرت في الرد عليكم لحد دلوقتي لأني كنت في زيارة لوالدتي أمبارح و رجعت بالليل متأخر و النهارده في الشغل . فيدوووب لسه قاعد على الكومبيوتر دلوقتي .. معقولة كل هذا الكم من الأخوة الأعزاء . معقولة كل هذا الكم من القلوب الطيبة .. معقولة كل هذا الكم من الحب في الله .. معقولة كل هذا الكم من الأخلاص في النصيحة و الرد . أقسم بالله العظيم أني قد أحببتكم جميعا في الله دون أن أراكم أو أرى وجوهكم البشوشة الكريمة . أنتم جميعا بأخلاقكم الكريمة و قلوبكم الرحيمة الخير الباقي لهذا البلد و الخير المتبقي من هذا الزمان .. لا أجد ما أكافئكم به و لو مررت على بيوتكم واحد واحد فحملت له هدية تليق بما له من محبة في قلبي .. يكفي أنكم أخرجتموني أنا و زو جتي من الحالة النفسية السيئة التي كنا فيها من يوم الخميس حتى طالعنا رودودكم الجميلة .. لا أجد ما أكافئكم به ألا أن أترك أجركم و ثوابكم على الله . هو خيرا ثوابا و أعظم أجرا . لا أجد ما أكافئكم به ألا أن أدعو الله من كل قلبي لكل من شارك في الرد على هذا الموضوع . أن يمتعه بالصحة و العافية و يبسط له الرزق من حيث لا يحتسب و أن يجعله هو و والديه و أهله و أولاده جميعا من أهل الجنة ... الآن فقط أستطيع أن أقول أنني لن أخاف من تكرار هذا الموقف معي ثانية .. الآن فقط أستطيع أن أقول أن معايا قاعدة بيانات بتحرك بيها و قرار مدروس جاهز للأستخدام مباشرة مستمد من تجارب حضراتكم و أراءكم السديدة . لا مفاجأة لي بعد اليوم بفضل الله ثم فضلكم جميعا .. أما عن تكملة ماحدث مع الثور الهائج ( سائق الميكروباص ) . فقد حاول أستدراجي للخروج من السيارة بأي شكل بالزعيق و التشويح بالأيدين يود فى قرارة نفسه أنه ينقل الوضوع من مخالفة مرورية أو خطأ مروري الى خطأ في الأباء و الأمهات عشان يبقى سبب يستحق نبدأ بيه المعركة . المدام طبعا جنبي عمالة تقوللي سيبك منه يا حسام ما تبهدلش نفسك معاه يا حسام . أعمل أييييه . لقيت نفسي بصورة تلقائية عمال أقوله معلش يابني حصل خير يا بني و قعدت أكرر فيها أكتر من مرة عشان يتهد و يهدا . المهم لما ملاقاش فيه فايدة أني أخرج بره العربية و محاولة الأستدراج فشلت أذا بيه و بكل عزم أيده ينزل هبد و رزع و تخبيط على سقف العربية و يقول مادام ما بتعرفش تسوق يبقى ماتركبش عربية . أنا برضه حسيت أن التخبيط على العربية هدفه برضه أستدراجي للخروج من العربية . المهم لما لقى أن مفيش فايدة و أنا قاعد متبت في مكاني بدأ صاحبه اللي معاه يسحبه لحد ما ركبه الميكروباص بتاعه و خد بعضه و مشى . و طبعا أن ما كنتش أقدر أتحرك ألا لما يمشي هوه لأن كان بيني و بينه نص متر و جه تاكسي قفل عليا من ورا . طبعا بقية طريق العودة للمنزل عينيا على الطريق لكن دماغي كله شغال في الموضوع لكن الحمد لله وصلنا بسلام . المشكلة بعد ما روحت كل ما أحاول أشيل الموضوع من دماغي مش عايز يتشال و السؤال اللي عمال يطرح نفسه هل أنا قصرت في الدفاع عن نفسي و زوجتي و العربية و أيييه هي حسابات الربح و الخسارة في الموضوع . و بعدين أنا مش هاممني اللي فات على قد ما هاممني لو أتكرر معايا الموقف بعد كده . لحد ما قررت أعرض الوضوع على حضراتكم . و الحمد لله أن معظم الأراء جاءت متوافقة مع عدم النزول لمستوى هؤلاء العربجية . حتى من حبذ أستخدام العنف و القوة في الموضوع حبذها في عدم و جود الزوجة . أرجوا ألا أكون قد أطلت عليكم . بارك الله لكم جميعا . و بارك عليكم جميعا . و حفظكم في أموالكم و أنفسكم و أهليكم و وقاكم شر طريقكم و حفظكم من كل مكروه و سوء . و السلام عليكم و رحمة الله و بركاته .