انا معاك فى إن لغاية دلوقت فى مصر العميل دائماً غلطان و إن الشركة مستحيل يكون فى خطأ من جانبها, بس خروج حضرتك من الضمان مش هايغير اى حاجه, لإن القاعدة العامة مش هاتعمل زيك (بما فيهم انا), الأفضل هو الإتصال بالشركة الأم فى فرنسا مباشرة من غير تضييع وقت مع التوكيل فى مصر, انا هابدأ ادور على الإيميل للإتصال بالشركة فى فرنسا, ولو معرفناش الإيميل, يبقى صفحة بيجو فرنسا على الفيسبوك موجوده.
ولو حضرتك مش مقتنع إن ده ممكن يجيب نتيجه, حضرتك شوف صفحة شركة إل جى على الفيسبوك فى مصر, ماتمش تحديثها من شهر يناير اللى فات بسبب هجوم الناس عليهم لسوء خدمة ما بعد البيع و محاولة تحميل العملاء عيوب صناعة فى اجهزتهم.
https://www.facebook.com/lgegypt
يبقى على الاقل نحاول بقدر الإمكان - بغض النظر عن النتيجة, علينا الاخد بالإسباب و النتيجه من عند ربنا - مش معقوله نتقبل الواقع ونتراجع من اولها, على الاقل نحاول نوصل صوتنا.
- انا عن نفسى بطالب الإتى, و ارجو باقى الاعضاء يشاركوا بمطالبهم بناءً على تجربتهم:-
1- التوكيل المصرى ملزم بالتنبيه على العملاء من خلال مواقع التواصل الإجتماعى و مراكز التوزيع بالحرص عند ترخيص العربية من عدم إزاحة خرطوم مية الردياتير عند المروحة و تحمل التكلفة كاملة - شاملة النقل - فى حالة إنقطاع الخرطوم.
1-1 إضافة شبكة لمروحة الردياتير لحماية خرطوم مية الردياتير فى الشحنات القادمة للبيجو 301.
2- السماح للعملاء بتركيب إضافات للعربية فى مراكز الخدمة المعتمده زى (وحدة رفع زجاج - نظام التنبيه الصوتى).
3- تخفيض اسعار الصيانة الدورية و قطع الغيار ليتناسب مع الفئة السعرية للسيارة مقارنة بالماركات الاخرى.
أرجو إن باقى الأعضاء يشاركوا بمطالبهم, لكن برجاء فى حدود ما هو متعارف عليه, لإن فى حاجات بتكون إستهلاكيه بناءً على استخدام العميل, ويرجى ارفاق مقارنه مع بعض مراكز الخدمة من شركات اخرى (نيسان - هوندا - رينو - الخ ) عند تقديم الطلب.
حاجه اخيرة, انا خبرتى قليله جداً فى مجال السيارات, فأرجو باقى الاعضاء ذوى الخبرة بالمراجعة على الطلبات و التاكد من حيادتها و احقيتها (احنا عايزين حقنا من غير مانجور على حق الشركة).