الموضوع: وحده رفع للبي واي دي اف ٣

المشاركة الأصلية كتبت بواسطة a7med almagic

اولا هي مفيش فيها تأثير ع الضمان ولا حاجه ولا التوكيل بيعمل فيها مشكله لأنها بتركب ع جهاز السنتر بتاع العربيه ف الباب الرئيسي بتاعك انت كمان مش في كل الابواب والتوكيل بيركبها بس لازم تعد بقي لكن هي بتركب بره التوكيل ب 150 جنية وبتبقي للاربع ابواب انا واحد صاحبي مركبها هو كمان معاة العربيه 2014 وكنت انا وهو في صيانه ال 5000 ومحدش اتكلم معاه ع حاجه وهي راكبه لكن اي نوع مش عارف والله انت تشوف بقي كهربائي كويس وهو يقولك الانواع ايه بس ان شاء الله الاهم ان هي مافيهاش مشاكل ف التوكيل

معلش يا أ/ أحمد اسمحلي اعترض مع حضرتك في النقاط التالية :
- تركيب أي حاجة متعلقة بضفيرة الكهرباء أكيد حتخرج كهربة العربية من الضمان .
- أنا مش عارف معلومة أن التوكيل بيركبها ولا لآة .. بس معتقدتش لأنه لو بيركبها أكيد كان حيبقى عندي وعند الأعضاء خبر بالموضوع ده .
- بصفة عامة السيارات الحديثة أي لعب في ضفيرة الكهرباء ممكن يأثر على وحدة تحكم العربية ولا قدر الله ممكن يحصل له حاجة .
- فيه بعض المكونات الكهربائية ممكن تركبها عادي زي الفوجات والسماعات لأنها في الأساس نازلة في العربية بالفيش بتاعتها يعني حتوصل من غير قطع في الضفيرة أو حمل كهربي زيادة على العربية (معمول حسابها) .. مع مراعاة طبعاً الأمبير بتاع لمبات الفوجات وقوة تحمل خامة الفوج نفسه لحرارة اللمبة علشان ميسيحش الفيشة وبالتالي يأثر على الضفيرة .
- لو فيه حد بالفعل ركب وحدات رفع .. وشغالة كويس .. فده ستر من عند ربنا أنه محصلش حاجة لغاية دلوقتي .. وخاصة أنه ضفيرة الكهرباء بتاعة العربية مش بالقوة الكافية لتحمل أحمال أكتر عليها .. واللي نازل في العربية يا دوب على قدها كنوع من التوفير أو كمنهج للشركة الأم في الصين .

ارجو أن كلامي ميكونش ضايقك .. وخاصة أني أقصد الصالح العام في المقام الأول .

خااااااااااالص تحياتي .

المشاركة الأصلية كتبت بواسطة sfawzy

معلش يعني ايه وحدة رفع؟

المقصود بوحدات الرفع يا فوزي باشا هو جهاز بيركب بيسمح ليك أنك لو نزلت من العربية والشبابيك مفتوحة بمجرد ما بتدوس على زرار الغلق من الريموت .. زجاج الشبابيك بيقفل لوحده مع سنتر العربية .

وهو مريح فعلاً وامان .. وخاصة أن الواحد ممكن ينسى شباك مفتوح ويمشي .. فبمجرد ما تدوس لوك تبقى العربية متأمنة أنها مقفولة والانذار شغال والشبابيك اتقفلت لو نسيتها مفتوحة .