اولا السلام عليكم ورحمه الله وبركاته على اعضاء المنتدى الكرام
بعد التحيه خلاص الموضوع
الكرسيدا مركونه فى امانه الله جمب الرصيف عادى زى كل يوم وفيه عربيه ميكروباص عاليه قوى كدا من قدام اسمها دودج تقريبا مش عارف اعذرونى ياجماعه انا مش بفهم قوى فى العربيات وفى حاله نفسيه الحمد لله المهم نرجع للموضوع راحت الميكروباص دى وهيا بتلف دخلت فى جنبها من ناحيه الدريكسيون بشكل عمودى ونظرا لانها عاليه فالضربه تقريبا دا تصورى للى حصل حملت على سقف العربيه والبابين بتاع السواق واللى وره والحمد لله بقت عامله زى اللى بنشوفهم فى نشره الاخبار بتوع تفجيرات العراق كدا دى المهم فى الموضوع
ليا كام سؤال لو سمحتولى وياريت محدش يضايق لانهم كتير شويه بس التمسولى العذر
1-الاحسن انى اصلحها ولا ابيعها على الحاله دى وتجيب كام
2-لو صلحتها لانى بجد نفسى اصلحها لانها عشره عمر تفتكرو تتكلف كام
ملحوظه (السمكرى قال هنغير بابين وسقف )
3-تفتكروا نغير بابين وسقف افضل ولا نشترى بادى بتاع الجيل الرابع ليها موديل التسعينات دا شكله تحفه وهل دا ينفع ولا مش هيركب فيها
4-هيتكلف البابين والسقف كام ولو فكرت فى البادى هيتكلف كام برضو وهل الافضل من هنا ولا اروح بور سعيد
5-هل البادى القديم ممكن يتباع لانى حاسس ان التكلفه ختبقى عاليه وخصوصا لما ندخل على الدواخل
6-ازاى اعرف ان الموتور والشاسيه والميكانيكا الداخليه عموما محصلهاش حاجه او اعرف مدى العيب اللى فيها وياريت تقولولى امتى العيب يكون كبير ومش هيتصلح وتترمى بقى وامرنا لله
7-ياريت تفصيل بالحاجات اللى تتغير مره واحده بقى علشان انزل اشتريها واعرف احسب تكاليفها يعنى فيه ناس قالولى بضام فتحت فيها غير شويه حاجات خصوصا ان هيا والحمد لله كبوتها نادرا ما كان بينفتح فقالولى غير دبرياج مساعدين الحاجات دى يعنى فياريت تقولولى ازاى اعرف هما محتاجين يتغيرو ولا لاء بالذات بعد الصدمه الجامده دى ولاهما اساسى هيتغيروا دا روتين يعنى والله المستعان وحسبنا الله فى التباعين اللى بيسوقو من غير رخص ولا بيبقوا بينين من تحت الدركسيون اصلا

اخيرا انا اسف جدا انى طولت بس ارجو من خبراء السيارت عموما ومحبى الكرسيدا خصوصا يفيدونى ومحدش يكسل او يبخل بالرد ياجماعه ولو عايزين تستفسروا عن اى حاجه موضحتهاش ياريت تقولوا وشكرا جزيلا لحضراتكم