الموضوع: العضو المُبجل Opelcar "عمرو"

السلام عليكم جميعا
اولا انا مش من طبعي اني اعيب في حد او اني اسوء الظن فيه ولكن للأسف الشديد في ناس مينفعش معاها غير قلة الادب ولكن هلتزم ادبي بردوا

الهدف من الموضوع ده حاجتين

اولا : طالب حكمكم
ثانيا: تحذير للناس

هحاول اني مطولش عليكم

الموضوع بإختصار إن الاخ المُبجل كان عامل موضوع في المنتدى هنا انه عمل حادثة والايرباج فتح منه ( المهم بعد كده عرفت انه شاري العربيه طده اصلا بس ما علينا )

انا كان عندي نفس المشكله ولقيت تصليح الايرباج مكلف جدا في مصر فاستغليت فرصة سفري واشتريت قطع الغيار من انجلترا فبعت قلتله لو محتاج حاجه اجبهالك معايا بكل حسن نية

قلي لا خلاص انا عملتها بس طلب مني ادورله على استريو لعربيته علشان مش لاقيه في مصر وفعلا قدرت اني الاقيه بس قلتله معهوش كود .. قلي مش مشكلة خالص انا هعرف اتصرف فيه
وفعلا جبتهوله ورجعت مصر وكلمته علشان اقابله فضل يتحجج ويتعذر ويقول انه مسافر بالرغم اني اكتشفت من ورشة الاسطى صابر انه كان عنده بيغير زيت..

المهم محتطش سوء نيه وقلتله انا مسافر بعد يومين حاول تلحقني..
قام قلي طيب لو ينفع خليه مع صابر وانا هحولك الفلوس ..
قلتله مش مشكله واحد والكلام الجدعنة " الهبل " بتاعنا وفعلا سبتهوله ومشيت

الكلام ده كان شهر واحد الي فات

بعتله من شهر قلتله ممكن تحولي الفوس علشان محتاج اشتري حاجه اونلاين ومعيش كرديت
فضل ميردش لحد مرد في يوم بعد الحاح مني وقلي معلش مشغول بس قلي اودي الفوس لمين لاني مش هعرف احولها .. قلت يساتر على سوء الظن مالراجل تمام اهو
قلتله وديها لفلان واديته رقمه
عدى اليوم طبعا وده لا حس ولا خبر
بعتله تاني قلي اصل انا وديت الستريو لواحد ومعرفش يعمله انلوك
قتله والمطلوب؟
قلي يعني ينفع ادفع تمن حاجه معرفتش اشغلها!!

مش هعلق واسيبلكم انتوا التعليق

قلتله مليش فيه ولو سمحت حول الفلوس وبعد مناهده طويلة قلتله طيب مش عاوز منك حاجه ونا الغلطان من الاول وودي الاستريو لصابر وخليه عنده وانا هبقى اخده

بعتلي قلي هوديله الفلوس ومش هرد على كلامك الفارغ ده علشان مغلطش!

طبعا مودلوش حاجه واختفى خالص غالبا عملي بلوك

كل ده علشان ايه ؟؟
علشان 330 جنيه !
طمعان في ايه ده انا مش عارف ..فاكر نفسه ناصح ؟

هي ده اخر الجدعنه والمساعدة!
دنا يراجل دافع من جيبي مواصلات علشان ادولك عليه !

عموما احب اعرفه اني مش مسامح في المبلغ التافه ده وان شاء الله هاخده منه اضعاف مضاعفه يوم القيامة وان شاء الله هيدفع اضعافهم على صحته ولا عربيته ولا عياله او اين كان لان المال الحرام مش بيدوم..افتكر كلامي ده كويس

ولو قبلتك في يوم انا هعرف اخد حقي منك ازاي

طبعا ده درس ان الواحد ميثقش في اي حد والناس للأسف مبقاش فيها خير وكله بينهش في كله مع اول فرصه متاحه

في عضو تاني هنا واحب اشكره بجد لانه انسان محترم وراجل قد كلمته طلب مني ايدل اجبهوله من انجلترا ب 1150 جنيه مصري وبعتهوله مع واحد كان نازل مصر ومرداش ياخده غير لما يدفع تمنه
العضو ده Kornclub



اسف لو طولت عليكم بس اهو نوع من الفضفضفه لاني مضايق من الموقف بجد وربنا يعلم انه معلى الفلوس بس على الاخلاق الي الناس بقيت فيها

شكرا للجميع