المشاركة الأصلية كتبت بواسطة prince91720
الموضوع باختصار
انا شغال فى شركة وبنحصل تمن البضاعة من العملاء مباشرة او بنحصلها بشيكات من بنوك متعدده
لكن كللللللللل الفلوس دى بتتعمل ايداع فى بنك واحد لأننا بناخد منه ائتمانات (قروض) بمبالغ كبيرة
المشكلة ان كل ما بنودى فلوس يقولو الفلوس فيها عجز وناقصة
ومش بيفوت اسبوع الا لما يشيلو حد عجز فى الفلوس من اول ال10 جنيه لحد ال1000
نكلم اللى ماسكين الخزنه فى الشركة يقولو الفلوس معدوده ومظبوطه واللى فى البنك ولاد كلب حرامية
نكلم بتوع البنك يقولو الفلوس جاية ناقصة من الشركة ودى مش اول مرة تحصل
طب احنا زنبنا ايه؟؟
احنا بناخد الفلوس من الشركة وننزل مع السواق نركب العربية وندخل البنك نسلم الفلوس يعنى مافيش اصلا اى فرصة للتلاعب
مع العلم ان واحد من اللى ماسكين الخزنه فى الشركة شارى شقة فى ارقى شارع فى المدينه اللى احنا فيها
والتانى بيتاجر فى العملة بمبلغ لايقل عن 120000 جنيه
والتالت عامل قاعة افراح على مستوى
ومرتب الواخد فيهم لا يتعدى ال2000 جنيه
وبالنسبة لبتوع البنك فكانو بيطلبو اكرامية او رشوة صريحةان جاز التعبير بحجة ان احنا بنودى فلوس كتير وبتاخد وقت كبير فى عدها
والموظفين فى البنوك التانية حذرونا من حركاتهم
كلمنا مدير البنك قال ائعدو معاهم وهما بيعدو الفلوس وفعلا بنئعد بس مكن العد بيبئا ضهره لينا ومش شايفين اوى ايه اللى بيحصل وراه
كلمنا صاحب الشركة قال ماليش فيه . اللى فلوسه تنقص تتخصم منه
طيب نحل اللغز ده ازاى؟؟
ومين الظالم ومين المظلوم؟؟
وازاى نتعامل مع الناس دى؟؟
ملحوظه احنا حاولنا ننقل فى قسم تانى فى الشركة بس منفعش لأسباب يطول شرحها
وصعب ان الواحد يسيب الشغل لأن ماصدقنا لاقينا شغل بعد سنه من البطاله والجلوس فى البيت بسبب الثورات والارف اللى عمال بيحصل فى البلد