الموضوع: شورت بلوك

شكرا لذوقك واهتمامك
كلمتة قالي الموتور كامل 4000 وشورت بلوك ودة ب3000 من غير ادوات التغذية

والسكري

قالي الموتور كامل 60000 وشورت بلوك وقصدة نص موتور اللي تحت بس 3500

مش عارف لية فرق الاسعار كبير اوووي كدة

يا شا شكرا للنصيحة وربنا يكرمك
انا كتبت الرقم غلط
انا اتصلت بواحد تاني اسمة الحاج هشام السكري
وقالي موتور كامل 6000 جنية وشورت بلوك النص اللي التحتاني ب3500

ودة اللي خلاني مستغرب بفروق الاسعار يعني واحد قالي الموتوتور 6000 وعند واحد تاني 2700 و3000 ودة خلاني اشك انة ممكن يكون خلع من عربية ولا هشام السكري عاوز يشتغلني

المهم بقاءة في الدوخة اللي روحت لميكانيكي عندة 66 سنة وشكلة قرد قالي الموتور مفهوش حاجة من تحت المشكلة في البلوف ودة اللي عامل صوت النقرة والدخنة من الشنبر

وظبطلي التكيهات العربية رجعت فاقت من جديد بس بتاكل زيت ولما اقرص عليها تتدخن وللعلم العربية معمولها شنبر من شهر ونص .
واللة تهت ومش عارف اعمل اية حاسس اني في بلف في ساقية ومحدش فاهم حاجة كل ميكانيكي يقول كلام غير التاني خالص وانا اصلا لسة جايب العربية مكملتش الشهر عشان كانت عجباني ولكني لبست في حيطة

معلش بفضض من تعبي ولو حد يقولي اعمل لاني بصراحة بفكر اكتب عليها للبيع واخسر فيها وشكرا

اسف مرة تانية لاني طولت عليكم

بسم الله الرحمن الرحيم
اولا معلش حضرتك مهما كنت جايب عربية مستعملة لازم هاتصرف هاتصرف فماتخليش حاجة زى دى تقفلك من العربية
ثانيا هاتبيعها و تخسر فيها هاتجيب ايه ؟؟ و الله العظيم الاسكورت عربية مظلومة جدا و احسن عربية فى فئتها السعرية خاصة ال 1600 الزيتك مش عايز اعرف حضرتك جايبها بكام بس اكيد هى احسن من الاكسنت اللى باربعينات
و لا الفيرنا اللى بخمسينات كثبات و عضم و بودى و ماتور كمان
انا كنت جايب واحدة من حوالى سنة و عملت بيها حادثة جامدة و بعتها بحادثتها و كانت حدوتة و نزلت منها ركبت بعدها عربيتين ماعرفتش بعتهم و لسة متفق على واحدة النهاردة و رايح اخلص فيها بكرة ان شاء الله
و بشرط عاوزة شغل شغل يعنى كتيرررررر بس اساسيات سليمة كل ده عشان عجبتنى اكتر من الاكسنت و الفيرنا و الحاجات دى و كمان سعرها اقل بكتير
لو ظبطها و صبرت عليها هاتحس بالفرق فعلا
مشكلة الاسكورت و ال 1600 خصوصا انها ما ينفعش تروح بيها لميكانيكى عادى لازم حد متخصص او على الاقل فاهم و باله طويل لان حوضها ضيق جدا
عفشتها صعبة على فكرة و بتاكل جلب مقصات لأن الماتور تقيل على العفشة
واطية شوية و محتاجة حرص عند المطبات لكن ثباتها فى الجرى عالى جدا (لو العفشة مظبوطة و الكاوتش سليم )
قطع غيارها غالية لكن الاصلى معمر جدا و مافيش منها مضروب كتير
الماتور كامل بادوات التغذية عامل من 5000 لحد 5500 و الشورت بلوك بس عامل حوالى 2500 او اقل و طبعا ده كلام الشراء لما تبقى هناك التليفونات بتبقى اسعار تانية و برضه لو الميكانيكى معاك هايعرف يجيب لك حالة كويسة

الافضل ليك انك تشوف حد متخصص بتاع فورد يجيب لك الأخر فى مشاكلك و بعدها ان شاء الله هاتحس بالفرق
ة ربنا يهديها لك و يرزقك خيرها و يكفيك شرها

انا مكسوف منك في التاخير في الرد معلش كنت مع العربية بدور علي الميكانيكة وشكرا للنصيحة لاني فعلا العربية عاجباني
روحت لاكتر من واحد متخصص الفور
وكل واحد بيفتي بكلام
يعني انا المشكلة عندي انة صوت الموتور عامل زي موتور الجاز بالظبط (فية ميكانيكي في الجراج اسمة احمد فرج)
حلل الموضوع علي انة صوت البساتم من تحت وقالي غير موتور اريحلك وكبر دماغك


ميكانيكي تاني في الحرفين مش فاكر اسمة قالي بص الصوت دة في التكيهات والبلوف بس والصوت مش من تحت
وبحلل الموقف لانة لا بشيد بنزين شوية كدة الصوت بيختفي

وقالي نغير البلوف وبالمرة الشنبر

ميكانيكي رقم 3 اللي عامل شنبر للعربية اصلا بيقولي العربية زي الفل بس السخنية بوظت الشنبر (لانها سخنت مع البايع اكتر من مرة )
وعايزة طقم شنبر وبس

وطبعا انا تاية في النص ومش فاهم ومش عايز اصرف علي الفاضي

ملحوظة

العربية ظهر فيها عيب الي اطلع علي طريق سريع العربية بتسخن ولكن لو جوة البلد وزحمة تبقا زي الفل هههههه

ودلوقتي انا ماشي بيها كدة وبدور علي الموتور وهاخد بالنصيحة واصرف عليها واظبطها وشكرا لاهتمامك واسف لتاخيري والاطالة ..

مبدئيا مافيش تأخير و لا حاجة انا تحت امرك احنا كلنا اخوات و ياما الناس هنا نجدتنى فى وقت زنقة
اولا العربية بتسخن ع السريع و ما بتسخنش جوة البلد ده كده رادياتير حاول تسلكه و تجرب لو سخنت برضه يبقى هاتحتاج تغيره بس قبل ما تغيره حاول تبص على طرمبة المياه بالمرة و انت واقف جنب العربية و هى دايرة بتسمع صوت نحرة او زقزقة من ناحية الطرمبة ؟؟ بس هو غالبا العيب ده بيبقى رادياتير
ثانيا زى ما قلت لحضرتك الفورد لازم ميكانيكى فورد سيبك من اللى عملها طقم الشمبر لأنه ممكن يكون اساسا ما ظبطوش و لا نضف قبل ما يركبه
ثالثا خاللى بال حضرتك ان طقم الشنبر نفسه لو فيه حاجة بيسحن العربية
رابعا ناس كتير بتتعامل مع احمد فرج و بتشكر فيه هنا و فيه ناس تانية بتتعامل مع قطب فى الضاهر
لكن انا عن نفسى باتعامل مع حمدى اللى فى الوفاء و الأمل فى مدينة نصر هو ممكن يكون حراق بس بيجيب من الاخر و هاتاخد منه عربية غير اللى انت راكبها خالص
شوف مكان حضرتك فين و شوف انت هاترتاح مع مين و لو تحب ممكن ابعت لك نمرة حمدى و عنوانه بالضبط
و لو تحب اقابلك هناك كمان او قوله انا معرفة ماهر اللى فى التليفزيون

يا با شا اخجلني ذوقك وتسلم ياباشا الف شكر ياريت عنوانة او رقم تليفونة وانا قريب منة لاني في سامسونج عمارات العبور ومتتعبيش نفسك وكفاية ذوقك والف شكر ومرة تانية