المشاركة الأصلية كتبت بواسطة waleedfesal
اولا وقبل كل حاجه قطر هاتنور بيك
1- ايه اخبار السكن هناك لإن هو كان قاعد في فندق طول المدة دي ودلوقتي الوضع اختلف ف لازم شقة ..
وايه نظام الكمباوند هناك وسمعت ان فيه حمام سباحة وجيم في كل عمارة ف هل ده صحيح ؟
السكن معروف انه غالى جدا هنا بس اللى فهمته ان ممكن الشركه اللى الوالد شغال فيها هى اللى هاتوفره فكده اكيد هايراعوا عدد افراد الاسرة
2- هل ينفع تحويل جامعة اخويا لاي جامعه هناك ؟ وايه الجامعات اللي هناك ومصاريفها ؟ واجراءات التحويل
ما اقدرش افيدك فى موضوع التحويل بس اللى اعرفه من زميل لى ان ابنه فى الجامعه هنا ومصاريفها على الاقل 25الف ريال سنويا
3- ايه الاحسن اسافر معاهم وادور وانا هناك ولا استني في شغلي ل حد ما اوالد يشوفلي حاجه هناك ؟ وايه المرتب اللي هيناسبني خصوصا اني مش هتكلف حاجه :)
طبعا الافضل من وجهة نظرى انك تنتظر حتى يجد لك الوالد وظيفه هنا وبعدين تيجى لان موضوع البحث على وظيفه ممكن يطول معاك شويه
4- ايه اجراءات رخصة القيادة ؟ وهل ينفع الامتحان علي عربية اوتوماتيك ؟
اجراءات الرخصه تعتمد اذا كنت بتعرف تسوق كويس ومعاك رخصه مصريه من فترة سابقه ... تروح تقدمها فى مدرسه المرور وتطلب تدخل اختبار السواقه على طول ...لكن لا قدر الله لو سقطت هاتتطر انك تاخد على الاقل ربع دوره ودى بحوالى 1200 ريال ....
وينفع تمتحن على سيراه اتوماتيك اذا كنت بمؤهل عالى بس ممنوع انك تسوق اى عربيه مانيوال ...
واختبارات القياده 3
الاول اختبار الاشارات ودا بتجيب كتاب من المدرسه ب25 ريال فيه كل الاشارات وضرورى موضوع الكتاب لان فى هنا اشارات كتير مش موجوده فى بلدنا العزيزه
التانى فى اختبار جديد بيبقى فى الميكانيكا بتاعة العربيه يعنى يخليك تفتح الكبوت ويسالك كده كام سؤوال عن مكونات العربيه الميكانيكيه
بعد كده اختبارات القياده ودا نوعين فى المدرسه والتانى اختبار القياده فى الشارع ودا اصعبهم ... بيركب معاك ظابط مرور ويبقى حظك من السما لو كان قطرى ... لانهم ودودين وبيحبوا المصريين وان شاء الله تعدى معاك على خير
5- ليه في تفاوت رهيب في اسعار المستعمل ؟ يعني لقيت bmw 730 2008 سعرها 60 و 65 الف !!وممكن الاقي تويوتا و ميتسوبيشي اغلي !!
غريبه مع ان الالمانى هنا سعره فى الارض ممكن تلاقى الفرق بس بين اللى انت زكرتهم فى سنه الموديل
6- هل فعلا البلد ممله ؟؟ انا بتاع خروج وسهر من الاخر ف هل فعلا هحس بملل مع الوقت ؟
ان شاء هاتقدر تكون اصحاب جداد بسرعه وفى اماكن كتير ممكت تروحها وتسهر فيها ومتنوعه حتى لو انت مش ساكن فى الدوحه لان المسافات هنا قصيره جدا ...( البلد كلها اوضتين وصاله)
وبالنسبه للتعامل ارى ان القطريين من اكثر الناس احتراما للمقيمن معهم وبياخدو يودوا معاك فى الكلام الا شواذ القاعده ( ولكل قاعده شواذ..) من الاخر محترمين جدا مع المحترم واللى يشغل الفهلوه بياخد فوق دماغه...
اسف للاطاله وتمنياتى لك بكل الخير