وعليكم السلام
اخوكم مسافر قطر قريب إن شاء الله في شهر 7 وعايز اسأل كام سؤال
مبدئيا والدي شغال هناك بقاله 7 شهور و طلب اننا نروحله هناك ونعيش هناك وده قرار مصيري لإن كل حاجه هتتشقلب
انا بشتغل هنا في مصر بقالي سنه ب مرتب 1900 و اخويا ف سنة تانية إعلام جامعة مصر ..
1- ايه اخبار السكن هناك لإن هو كان قاعد في فندق طول المدة دي ودلوقتي الوضع اختلف ف لازم شقة ..
وايه نظام الكمباوند هناك وسمعت ان فيه حمام سباحة وجيم في كل عمارة ف هل ده صحيح ؟
السكن هناك الاستوديو يعني غرفه وصاله صغيره ومطبخ صغير وحمام وانت بكرامه ب 2000 ريال وطالع ل 3500 والشقق الاوضتين وحمامين ومطبخ ب 3500 وطالع معاك ل 8000 على حسب المكان .. بعض الشقق بتبقى نظام فندق فيها جيم ومركز صحي الخ الخ
وفيه الكمبوند فيه كل حاجه بسين وجيم الخ بيبتدي من 8000 وطالع الفيلا فيها
2- هل ينفع تحويل جامعة اخويا لاي جامعه هناك ؟ وايه الجامعات اللي هناك ومصاريفها ؟ واجراءات التحويل
مينفعش تحول او نقول ممكن بس صعب جدا لو قصدك على جامعه حكومية زي جامعة قطر يعني ممكن يبتدي من الاول على حسب علمي تقريبا الا لو جامعه بفلوس فا ممكن زي نورث اتلانتك و البريتش
وديه تقريبا سعرها من 50 الف ل 150 الف في السنه كل جامعه وليها مبلغ كل سنه او يحول نظام تعليم مفتوح جامعة القاهره ليها مكتب في الدوحه وبتتعمل الامتحانات مرتين في السنة في الدوحة وبيستلم الشهاده من جامعة القاهره عادي جدا ب 3500 ريال الترم تقريبا يعني ب 7000 في السنه (ده غير رسوم الكتب تقريبا الخ الخ ) يعني ما يقارب 10000 ريال في السنه مع الملازم ولو حياخد كورسات
3- ايه الاحسن اسافر معاهم وادور وانا هناك ولا استني في شغلي ل حد ما اوالد يشوفلي حاجه هناك ؟ وايه المرتب اللي هيناسبني خصوصا اني مش هتكلف حاجه :)
بالنسبه للشغل بعض شركات بتفضل تجيب موظفين من الخارج وتبعتلهم الفيزا ويجوا
وبعض شركات بتفضل توظيف الي على كفالة شخصية وتقوم هيا ناقله اقامته يعني انت وحظك
4- ايه اجراءات رخصة القيادة ؟ وهل ينفع الامتحان علي عربية اوتوماتيك ؟
رخصة القياده لو بتعرف تسوق عادي خش على الامتحان على طول والامتحان عباره عن مطلع بعربيه مانيواااااااااااااااااااا اااااااااااال ( غالبا دلوقتي بقت اوتوماتيك انا بكلمك على الفتره الي كنت هناك زمان) بتطلع المطلع وتقف في نصه وتشد هاند بريك (فرامل يد) وبعدها تنزلها وتكمل بقيت المطلع لاخره وبعدين ترجع وخلاص ,, تاني امتحان ال s وبعدها ال l بالقمع
وبعدها الباركنج باررليل وسيرز
وبعدها بيركب معاك عسكري او ظابط يشوفك في الشارع سواقتك ازاي وممكن يقولك ادخل يمين ويبقى ممنوع ( وطبعا زي اوروبا وامريكا واغلب دول الخليج لان كل حته وفيها علامة ارشادية سواء ممنوع الدخول او انتبه فيه مطب بعد 100 متر الخ الخ الخ) فا لودخلت يمين حيسقطك وهكذا ويشوف بتدي اشاره ولا لا بتبص في المريات ولا لا الخ
الامتحان ب 500 ريال (الف جنيه مصر وبتحصل على الرخصه ) وطبعا فيه قبل امتحان نظري انت عارفه
لو سقطت بتعيد تاني ب 500 ريال
5- ليه في تفاوت رهيب في اسعار المستعمل ؟ يعني لقيت bmw 730 2008 سعرها 60 و 65 الف !!وممكن الاقي تويوتا و ميتسوبيشي اغلي !!
اسعار المستعمل على حسب الي بيعرضها شخص ولا معرض ولا تاجر ... وايه الحالة بتعتها يعني البي ام الي قولتها تعملها 45 - 50 الف ريال (100 الف جنيه) ومفيش ميتسوبيشي زي ما انت بتقول نفس الموديل وتبقى اغلى الا لو موديل جديد او الا لو انت شفت مثلا بالصدف ميتسوبيشي ايفو فا بتقى اغلى هنا لانها متزوده واستريت ليجل وفيه سيارات كتير سعرها معقول يعني ال s320 موديل 2005 مثلا تعملها 35 الف ريال او 40 الف يعني 80 الف جنيه مصر d:
6- هل فعلا البلد ممله ؟؟ انا بتاع خروج وسهر من الاخر ف هل فعلا هحس بملل مع الوقت
البلد مش ممله فيه خروجات وفسح وقطر بيجلها زوار كتير اجانب وعرب والفسح فيه سوق واقف كتارا والمولات هناك واللؤلؤه الخ الخ واكيد فيه حجات كتير فتحت .
واساسا مع الشغل يدوب ترجع البيت تاكل وتنام وتقعد على النت وممكن تتفسح في الاجازه ومفيش ملل ولا اي حاجه
واهلا بيك في بلدك التاني وياريت الناس تغير نظرتها لدولة قطر بلد جميله الي مرحش بلد وعاشر شعبها فتره يبقى ميصدقش اي كلام بيتقال
زي الي بيسمع كلام عن المصريين وفاكرهم كله نصب في نصب ينزل يلاقي المصريين فيهم جدعان وطيبين وولاد حلال فا يستغرب
بس الحق حق
لو عندك سؤال عن اي بلد قولي ما عدا موزنبيق ههههههههه
اخوك كابتن طيار - بارون أحمد
وربنا يوفقك في قطر وتلاقي وظيفه في تخصصك ومرتب ممتاز
المفضلات