الحركة دي حصلت أمامي

كنت واقف عند فكهاني في سوق المقطم بشتري ، بعدين وقفت سيارة ميجان ونزلت منها سيدة تبدو في أول الخمسينات من العمر ، قالت للفكهاني :

- انا جايه أخد من الجوافة اللي خدتها إمبارح ، دي حلوه أوي ، عاوزه كمان أثنين كيلو
- حاضر يا هانم انا خدامك
- بس من اللي خدتها إمبارح
- اللي تحبيه ، الجوافه كلها اهي ، دي أو دي اللي تحبيه
- نقي لي اثنين كيلو حلوين
- تحت أمرك يا هانم

الفكهاني قعد ينقي بزمه وهو منشكح ان الهانم معجبة بالجوافه بتاعته، وهي واقفه جت واحدة شحاته طلبت حاجة منها وتقلت شويه فما كان منها إلا ان شخطت فيها حته شخطة تفكرك بهوانم الطبقه الإرستقراطيه بتاعة زمان

- اتفضلي يا هانم ، اثنين كيلو

قامت الهانم اخدت كيس الجوافة وحطته في الميجان ، وطلعت منها كيس جوافة آخر كان مستخبي فيها وأعطته للفكهاني وقالت له بحزم وغيظ :

- انا هاوريك إزاي تضحك علي وتديني جوافة مضروبة متتاكلش ، ورامت له الكيس اللي خدته منه إمبارح

الفكهاني محطش منطق ومعرفش يقول غير - مش أنا اللي إديتك إمبارح ده اخويا الصغير
ردت قالت - يعني من صغرة بيتربي على النصب

وسبته وركبت ، وهو شرب الجوافه - الحلوه قوي :D

على فكرة ...

كيلو الجوافه صاحبه الحوار ده كله كانت بـ 2 جنيه

وشكرا