الموضوع: /ـ أخيراً تم تجربة رينو فلونس 2014 وتويوتا كورولا 2014 fluence 2014 VS corolla ـ\

المشاركة الأصلية كتبت بواسطة yasser100

ههههه يا راجل ؟ بقا اللى رايح يشترى الفلوينس كان رايح يشترى سيراتو و النترا و لقا الفلوينس فى سكته اشتراها ؟ , ده و انا بافكر اشترى قعدت 6 شهور او اكتر باقارن بين الكورولا و الاسترا و الفلوينس و كمان الاوكتافيا a7 عمرى ما فكرت ادخل حتى ابص على السيراتو و لا الالنترا ما غيرش رايي عن الوكتافيا الا الفتيس dsg اللى كله مصايب , على فكره و انت راجل بياع زى ما بتقول و فاهم اللى رايح يشترى عربيه من 180 الف ل 190 الف مش هاتفرق معاه كتير 10 او 15 الف كمان , انا شايف اصلى سوق الكورولا مريح شويه و بعد ما كان فيه طوابير حجز و الناس لبست فى الحيطه و حتى فيه يابانيين نفسهم مستغربين من انه تويوتا تنزل موديل زى ده , العربيه بقيت امشى اتخبط فيها فى المعارض و اوفر 1000 جنيه بس لو حبيت و ادلك على المعارض اللى مرطرطه الكورولا فيها , القرش , سمير ريان مدينة نصر , الليثى فى شارع النزهه , عندى واحد صاحبى كان برضه واقف عليها طابور حجز الفئه التانيه و استلمها من شهر و عايز يبيع , شارى يا باشا ؟ و ربنا يبارك لك فى مميزاتها الكتير , اه قبل ما انسى لو ركبت اتنين معاك ورا و طريقك مطبات يبقا بلاش الاستبن تاخدوا معاك احسن ما كل شويه تنزل الناس و احراج و كده

أستاذ ياسر
كيف الحال
خلينا موضوعيين وبلاش نعمل زي الناس اللي بتزيط فالزيطة اللي انت عارفهم
وميعرفوش يقولو كلمه حق وبتلافيهم دايما بيصقفو اول مابتيجي سيرة كورولا بجمله مفيدة
الكورولا 2014 عربية جديرة بإلاحترام بكافة المقاييس
ولكن احنا بنتكلم عن الحيادية اللي بيتكلم عليها أخونا الفاضل صاحب الموضوع
وبنعرفه معنى الحيادية في إبداء الرأي
لإن كثير منا بياخد قراره بناء على مشاركاتنا وتقاريرنا
تحياتي

الله ينور با أحمد بيه....و أنا بضم صوتى لصوت حضرتك....

الكورولا عربية ممتازة و أنا أى حد بيسألنى عليها فى العام أو الخاص برشحاله بقوة أو بيسألنى على الفلوانس على طول بنصحه أنه دايماً يبص على كل الفئة : السيراتو و الكورولا و الفلوانس و الأسترا و دول من أحسن السيارات اللى فى هذه الفئة و يشوف ما يناسبه و يختار على أساسه...مفيش تحيز و لا تعصب و فى الأخر الواحد بيعمل مع الناس اللى نفسه يتعمل معاه....

الهدف من توضيح الحقائق ليس التعصب....أنما توضيح نقط غير سليمة بالمرة بغض النظر عن كونها أنطباع شخصى

فيه أكتر من 40 مالك من ملاك الفلوانس نشطين على المنتدى هنا...مقلناش أن تسارع الفلوانس مع الفتيس الجديد إعجاز علمى و لا بيعمل كام ثانية لحد ما يوصل سرعة كام لأن ده مش هدفنا من شرا السيارة خالص لكن كمان لما تسمع أن فيه تأخير فى دواسة البنزين كام ثانية و ناس " مش من الملاك و لا ساقوها " تعلق و يقولك العربية فاقدة السيطرة و الملاك زهقانين و كلام غريب كده...فأعتقد هنا وجب التصحيح و التوضيح....

فى قسم الرينو الأعضاء بتقول أن التسارع رهيب و أستجابة العربية ممتازة و بيلمونى ليه أنا بقول عليها عربية عائلية و مش بتاعت غرز و شد؟ و بيكون ردى أنى مبحبش أبالغ علشان اللى بيشترى بناء على اللى بيقراه هنا لو أشتراها و أنبسط من تسارعها هيشكرنا بدل ما يشتريها و يدعى علينا.....

قسم رينو مكشوف تماماً لكل المنتدى بكل مشاكل السيارة من الملاك الفعليين اللى داخلين على سنة مع الفيس ليفت و بقالهم 4 سنوات مع الشكل القديم.....كل مشكلة بتحصل بتتسجل و بتتناقش بكل شفافية و ووضوح و محدش بيخبى حاجة لأن المصلحة واحدة للجميع

و زى ما دايماً بنقول لو رينو عملت حاجة كويسة بنشجع و نقول عليها و لو عملت حاجة وحشة هنكون أول ناس تنبه و تحذر و تشتكى كمان

من الأحترام أنك تقول للكويس أنه كويس و تفوق على نفسه فى نقاط معينة و لا تقلل من شأنه علشان تظهر أنت....و ده اللى أنا بقوله شخصياً على الكورولا فى موديل 2014 و أنها طورت بأمتياز فى كثير من النقاط و أتمنى فى المقابل أن الناس تكون حيادية برده فى أراءها تجاه باقى السيارات


و فى النهاية:

لكل واحد هيشترى سيراتو ربنا يباركله
لكل واحد هيشترى كورولا ربنا يباركله
لكل واحد هيشترى أسترا ربنا يباركله
لكل واحد هيشترى فلوانس ربنا يباركله

جرب و شوف كل نقاط الضعف قبل القوة و أقرا فى كل حتة و أعمل تست درايف لو قدرت و أسأل ملاك فعليين ليها و أسأل عن التوكيل و قطع الغيار و أسعار الصيانة و أزاى التوكيل بيتعامل مع الضمان و شوف أنت عايز أيه من العربية و صلى أستخارة و توكل على الله

تحياتى

المشاركة الأصلية كتبت بواسطة Hunting_Eagle

و الله دي فعلا حاجة تضحك !!

الناس بتعامل عربياتها كأنها حد من عيالها

محدش مستحمل أنه يسمع اي حاجة وحشة على عربيته .. سواء كانت صح أو غلط

كأن ملاك العربية هم اللي صنعوها .. أو ليهم أسهم في الشركة فخايفين على مستقبلهم

أو كأن الفلوس اللي دفعها في العربية هتترمي في الأرض لمجرد انه سمع رأي مخالف لرأيه

الراجل ناقل تجربة شخصية

و في الأخر بيقول دي تجربة شخصية

غير ان معظم النقاط اللي في المقارنة Subjective .. مقياسها يختلف من واحد لواحد

الناس ماسكة في العدادات الديجيتال .. طيب أنا واحد من الناس مبحبش العدادات الديجيتال وبحب الأنالوج .. ايه المشكلة ؟!

شكل التابلوه عاجبني في الكورولا .. عادي

مش مستريح في الكنبة اللي ورا في الفوانس .. عادي بردو

الفتيس مش حاسه سريع في الاستجابة .. في ناس شايفة كده و ناس شايفة كده

سيبنا من الكلام ده كله

بفرض الفلوانس تحفة و مفيهاش غلطة .. و الكورولا ما تتركبش .. واحد رأيه غير كده .. ايه اللي حصل

الدنيا اتهدت و مش هتقوم

و يتقلب الموضوع لتريقة و استهزاء

الراجل قال رأيه و هو ده اللي شافه و حسه و انا شايف انه مغلطش يعني :

1. الشكل الداخلي , دي ازواق و حاجة مش ثابته و بتفرق من واحد للتاني -الراجل مغلطش -
2. الشكل الداخلي , دي ازواق و حاجة مش ثابته و بتفرق من واحد للتاني -الراجل مغلطش -
3. اتساع الصالون , الفلوانس واسعة بس الكورولا اوسع مش بفرق كبير بس اوسع -الراجل مغلطش -
4. التابلوه , برضو دي ازواق و حاجة مش ثابتة من واحد للتاني -الراجل مغلطش -
5. فتحات التكييف , الراجل حس ان تكييف العربية و توزيع الهوا افضل في الكورولا و الكورولا معروفة بتكيفها -الراجل مغلطش -
6. الموتور و الفتيس , الكرولا اقوي و اسرع في التجميع -الراجل مغلطش -

ده رأيه يتحمل الصواب او الخطأ , ميستاهلش كل الهجوم ده و مفيش حاجة في الدنيا كاملة , ده مش معناه ان الحاجة دي سيئة او ضايعة ولكن معناه انها افضل او اقل بفرق بسيط في المقارنة .

المشاركة الأصلية كتبت بواسطة yasser100

انا شايف اصلى سوق الكورولا مريح شويه و بعد ما كان فيه طوابير حجز و الناس لبست فى الحيطه و حتى فيه يابانيين نفسهم مستغربين من انه تويوتا تنزل موديل زى ده , العربيه بقيت امشى اتخبط فيها فى المعارض و اوفر 1000 جنيه بس لو حبيت و ادلك على المعارض اللى مرطرطه الكورولا فيها , القرش , سمير ريان مدينة نصر , الليثى فى شارع النزهه , عندى واحد صاحبى كان برضه واقف عليها طابور حجز الفئه التانيه و استلمها من شهر و عايز يبيع , شارى يا باشا ؟ و ربنا يبارك لك فى مميزاتها الكتير , اه قبل ما انسى لو ركبت اتنين معاك ورا و طريقك مطبات يبقا بلاش الاستبن تاخدوا معاك احسن ما كل شويه تنزل الناس و احراج و كده

المشاركة الأصلية كتبت بواسطة yasser100

باشا منور و الله :)
احكيلك انا بقا عن فتيس الكورولا و ايه هيه قصته علشان برضه الناس تفهم .
الفتيس CVT x-tronic و بنسخته الاخيره هو ملك كامل لشركة نيسان , يعنى تسمع CVT تكمل و راه بنيسان و انت مغمض .
نيسان لما نزلت الفتيس ده بنسخته الاخيره كانت حاطه هدفين مهمين امامها , القضاء تماما على مقولة انه الفتيس الاوتوماتيك بيسحب ينزين اكتر من المانيوال و دى فعلا نجحت فيه مع الفتيس الجديد نجاح ساحق و انا عن نفسى عملت مشاوير مختلفه بالعربيه ما بين داخل المدينه و خارجها المتوسط على الكومبيوتر 11 كم / لتر يعنى على السريع من 13 ل 14 مستريح .
الهدف التانى اعتمادية الفتيس لاطول فترة حياه ممكنه و دى لسه طبعا ما فيش حد جربها بس نيسان منزله عليه ضمان 10 سنين و على موقعها الرسمى و بالتالى هو ما فيهوش تروس علشان تاكل فى بعض و تقصر عمر الفتيس .
طيب تويوتا عملت ايه ؟ خدت الفتيس ده و دخلت عليه بعض التعديلات بعد موافقة نيسان عليها و سمته CVT S-tronic , التعديلات دى كانت ليه ؟ علشان يقلل صوت الفتيس مع الموتور فى السحب علشان تفضل ميزة الصوت الهادى للتيوتا و الاحساس بالنقلات و علشان يعطى تسارع بس كان على حساب ايه ؟ كان على حساب ارتفاع درجة حرارة الفتيس نسبيا و ده هيأثر على اعتماديته و مع استهلاك اعلى نسبيا فى البنزين , هنا نيسان رفضت تعمم تعديل تويوتا على الفتيس و رفضت تعطى ضمان عليه 10 سنين و قصرت الضمان ده على CVT x-tronic ,
كلامى كله من المواقع الرسميه لنيسان و من الويكيبيديا و دى القصه بكل بساطه و اختصار علشان بس ما فيش حد يقول اصل ده CVT حاجه و التانى حاجه تانيه خااالص , الاتنين concept واحده

يا فندم ال CVT مش اختراع من نيسان , ده موجود من قديم الازل من قبل 1940 مش نيسان اللي اخترعته .
و اول من صنعوه و استخدموه همBosch Volvo و Subaru , Ford يبقي بنفس الطريقة نقول بقي ان نيسان اخدت ال CVT منهم !!! يا باشا نيسان بدأت تستخدم ال CVT في اوائل التسعينات بعد الشركات دي عملته و استخدمته .
النيسان اخدت ال CVT و عدلت عليه و سمته Xtronic و نفس الشئ تويوتا .
و من كلامك حضرتك بتجاوب علي نفسك قلت انه مختلف عن بتاع نيسان في انه
1.الصوت الهادى للتيوتا و
2.الاحساس بالنقلات
3.و علشان يعطى تسارع
طب ماهو مختلف اهوه و حضرتك جاوبت علي نفسك والاختلاف للسائق ان في الكورولا بيحس بالنقلات و ده بيديلو احساس الاوتوماتيك العادي وده كان قصدي ارد بيه علي صاحب الموضوع انه حس بفرق في الفتيسين رغم ان الاتنين CVT كأنه اوتوماتيك عادي .

معلومة صغيرة لحضرتك الفلوانس موفرة في البنزين , بس برضو الكورولا موفرة اكتر :

الفلوانس 5.1 لتر لكل 100 كم علي سرعة 90
الكورولا 4.5 لتر لكل 100 كم علي سرعة 90
بالارقام م/ هاني مصورها في عربيته و انا صورتها في عربيتي .

http://www.nilemotors.net/Nile/402044-c-segment.html
http://www.nilemotors.net/Nile/402364-rpm.html

ايه رأيك , بدون تحيز و بالصور و الارقام .