الموضوع: يا جماعه انا تعبت من النيو صنى ..أرجو الافاده

المشاركة الأصلية كتبت بواسطة saint2011

باشا غير كاوتش العربية الماكسيس والموضوع ده مش هيتكرر كتير معاك يعنى مش هتحتاج تغير التيل كل 6000 كم يعنى ممكن كل 10000كم او 12000كم هتقولى وايه علاقته هقولك رداءه الكاوتش مخلى العربية تقيلة محملة وعاملة حمل على التيل والطنابير مما يسبب تأكل التيل وبالتالى الطنابير ركب كاوتش محترم بريدجستون او كونتيننتال او ميشلان يوكوهاما وربنا يكرمك والكلام ده عن تجربة شخصية

يا باشا هو برده ال 10000 او ال 12000 معدل قليل قوى يا بااشا انا المفروض التيل دا بتبدا تبص عليه بعد 25000 او 30000 بالميت مش اقل من كدا ..اتهيالى الموضوع ده فى حاجه غير كدا
وبعدين فى حاجه معظم العربيات بتنزل بالكاوتش ده مش الصنى بس ..ليه بقى الصنى اللى فيها المشكله دى
اتهيالى الموضوع مش كده فى حاجه تانيه اكبر من كده

بص يا باشا انا كان عندى مشكله التيل و الفرامل المهويه و كل حاجه ممكن تخيله ف موضوع الفرامل دا و روحت مرتين مره فى ابو رواش و قالولى هنغيرهم و مره فى الدراسه و دا توكيل اى كلام بصراحه
المهم هناك فى ابو رواش اتاخروا لاكتر من شهر المهم انا حاولت اكلمهم كذا مره كان فيه شبه تنفيض المهم انا عملت شكوى فحماية المسستهلك وكمان فى نيسان نفسها و سبحان الله كلمونى فنفس اليوم و الحاجه كانت جت
و هناك اول مره غيرت التيل و الطنابير و حاولوا يقكنعونى انى الغى الشكوى قلتلهم اجرب العربيه الاول و فعلا بعد 3 ايام كدا حسيت ان اداء الفرامل ضعيف عن الاول المهم كلمتهم انا و اشتكيت هناك فى حمايه المستهلك ان فى تهرب من صيانه العيب فى ماستر الفرامل
و فعلا كلمونى و روحست تانى غيرت الماستر و كشفت على دورة الفرامل بالكامل و القباقيب الخلفيه و الهوا اللى فدورة الفرامل و فضلت معاهم و عاملهم قلبان فى ابو رواش لحد لما خلصوا العربيه الحمد لله زى ما انا عاوز و بفضل الله الموضوع اتحل و اختفى الى الان
لكن القصة مش تيل و طنابير بس د كمان ماستر الفرامل و هوا فى دورة زيت الفرامل و دا بيسبب ضعف فى اداء الفرامل
بس انا هقولك على حاجه ان العيب بتاع التيل دا مش موجود فى الصنى بس دا كمان ظهر فى ال بيجو 301 و الافيو الجديده و كذا عربيه كمان لان دا نتجه تغيير مواد التيل و تحويلها لمواد صديقه للييئه
و ربنا يسهل الحال ان شاء الله
لكن فى المجمل العربيه كويسه و الحمد لله راضى عنها كأداء للمحرك و فرامل و تكييف و وسع داخلى
متقفلش نفسك من العربيه لان هى بجد تستاهل سعرها و ان شاء الله الدنيا تتظبط معاك

طب ما تغير التوكيل أنا عن نفسى روحت اوتو ايجيبت فى ابورواش قلت للمهندس على صوت صفارة الفرامل قالى يبقى هنغير طنابير خلفية على حساب الضمان من غير حتى ما يبص على العربية واعتذرلى بشدة انه مش هيقدر يغير اليوم مع انى جاى من اسكندرية لوجود ضغط شغل لديهم لانى كنت فى وقت عرض و فعلا روحت بعد كده فى صيانة العشرة غيروا الطنابير واختفى الصوت الحمد لله
بعد كده روحت الهندسية فى اسكندرية كان عندى صوت تكتكة من الامام مش عارف مصدره لما خلصوا لقيت المهندس بيسلمنى المفتاح و بيقولى انهم غيروا التيل الامامى على حساب الضمان
ومن شهرين نيسان كانت بتكلمنى و توكيل الهندسية فى اسكندرية بيزنوا عليا علشان أغير ماستر الفرامل وانا اللى ما كنتش فاضى لغاية لما روحت و غيرتوا الحمد لله من قبل ما حماية المستهلك ما يعرف الموضوع أصلا

وعلى فكرة حماية المستهلك عرف عن طريق نيسان نفسها لان كان فى حوالى 9 آلاف عربية فيهم العيب ده فنيسان غيرت على حساب الضمان معظم العربيات وكان فاضل الفين وشوية لسه فقرروا يبلغوا حماية المستهلك
طبعا نيسان غلطانة لان المفروض كانت تبلغ قبل البدء التعديل طبقا للقانون

حماية المستهلك يحيل شركة ''نيسان موتورز مصر'' إلى النيابة العامة

نيسان بعد إحالتها إلى النيابة : �حماية المستهلك� لم يتلقَ شكاوى من عملائنا | المصري اليوم

بس اللى عاوز أقوله ان توكيلات نيسان اللى اتعاملت معاها محترمة بصراحة فلو حد عنده مشكلة يروح لتوكيل تانى وبعدين لو ما اتحلتش يكلم نيسان و بعدين حماية المستهلك

وعلى فكرة حتى الآن بصراحة الفرامل لحقتنى كتير فى أكتر من موقف لا يوجد غير صوت التكتكة اللى مش عارف مصدره واللى قل بدرجة كبيره حاليا أعتقد فى الصيانة القادمة هأسافر مصر لاتو ايجيبت

نصيحتى اخيرا تغير التوكيل و ياريت تقولنا اسم التوكيل اللى روحنه

متابع