عايز فتيس لل 128 ؟ ايه احسن حاجة و يعمل كام ؟

**gad_fcis** · 15-07-2007 10:43 AM

السلام عليكم
انا نازل ان شاء الله الاسبوع الجاى بورسعيد عشان اجيب فتيس لل 128 فيه ناس قالوا لى هاتو 5 غيار بتاع ال 1300 بس انا مش عارف ده هيمشى مع العربيه ولا لا كمان سمعت ان فى فتيس سريع برضه مش عارف همشى مع العربيه ولا لا , ياريت حد من اهل الخبره يفيدنى ابه احسن فتيس يناسب العربيه و هيعمله كام من بورسعيد انا ان شاء الله نازل و معايا الميكانيكى وربنا يسهل ان شاء الله
ارجو الرد سريعا.... وشاكر لمجهود اعضاء المنتدى....

**Abdallah** · 15-07-2007 01:13 PM

هتلاقى فتيس ريتمو 5 غيار يعمله حوالى 600 او 650 جنيه
وهتلاقى فتيس 128 عادة 4 غيار هيعمله حوالى 500 جنيه
الفتيس ال 5 غيار للـ 128 عايز لف شوية لانه قليل

**gad_fcis** · 15-07-2007 01:31 PM

انا شاكر جدا لرد حضرتك بس انا لى سؤال لو لقيت فتيس ريتمو 5 غيار و فتيس 128 5 غيار اجيب مين فيهم ؟؟ وهل فتيس الريتمو كويس و مش هايعمل مشاكل بعد كدة؟؟ كمان موضوع الفتيس السريع ده فيه فعلا حاجة كدة ولا ماينفعش عندى؟؟؟ انا اسف على اسئلتى الكتير بس اصل انا معنديش خبرة فى العربيات اوى و عايز اجيب حاجة كويسة تستحمل وتعيش ويكون سعرها كويس

**ahmed1981** · 15-07-2007 10:51 PM

لو عربيتك 1100 cc تجيب فتيس أربعة غيار بدون نقاش
ولو حد قالك هات خمسة غيار يبقى كلامه غلط ويبقى مجربش الموضوع ده
في واحد جاري عنده 128 1100 cc ونزل وغيرلها الفتيس وجاب واحد خمسة غيار
المهم بقى يمشي ويشد بالعربية لغاية آخر الرابع ويجيب الخامس يلاقي العزم صفر والعربية بتهدي
المهم رجع الفتيس القديم تاني وغرم تمن الفتيس الخمسه غيار على الفاضي

يبقى لو عربيتك 1100 cc هات فتيس أربعة غيار وإنت مطمن

لو عربيتك 1300 cc هات الفتيس الخمسة بتاع ال 128 لأن أنا عندي بتاع الريتمو في عربيتي
ومشكلته مبيركبش صح وقاعدة الفتيس بتركب بمسمارين بس مش تلاته وكل شهر تفك مساميرها وأروح للميكانيكي يركبها تاني وساعات أحتاج أروح للمخرطة لو مسمار منهم قطم في الفتيس

لكن لو جبت بتاع ال 128 هيركب صح مكانه وهوهو نفس العمر والكفاء
وده طبعا لو عربيتك 1300 cc لكن لو 1100 cc يبقى الأربعة غيار بتاع ال 128 مفيش غيره

والله أعلم

**gad_fcis** · 16-07-2007 02:35 PM

انا شاكر جدا لمجهوداتكم ونصائحكم الغالية ,بس انا كان عندى سؤال موضوع ان الغيار الخامس عزم العربية عنده بيبقى صفر, ده سببه ايه؟ هو مش الحكاية انه ترس بيتعشق و خلاص ولا فيه حاجة تانية بتحصل؟؟ ومادام العزم بيبقى صفر معنى كدة ان الترس متعشقش ولا حصل ايه؟؟
انا اسف على اسلتى الكتيرة بس انا زى ما قولت فى الاول ان خبرتى مش كبيرة و كمان انا عايز افهم :lol:

**ahmed1981** · 16-07-2007 04:19 PM

العزم بيبقى صفريعني
الموتور ال 1100 cc ضعيف عشان كده محتاج نسب تروس تراعي قدرته
معنى كده إن ترس الرابع هو أصغر ترس الموتور يقدر يجر العربية بيه ويكون العزم معقول
لو حطينا ترس خامس بالفهلوة هيكون صغير على عزم الموتور وبالتالي توصل بالرابع لحد سرعة 100 مثلا وتجيب الخامس وتدوس بنزين على الآخر تلاقي السرعة مبتزيدش بس بتقل

هذا ما قصدته

**gad_fcis** · 16-07-2007 04:58 PM

متشكر جدا على رد حضرتك السريع والمستفيض فى نفس الوقت, انا ليا سؤال اخير, انا انشاء الله هجيب الفتيس 4 غيار , بس ممكن حد يقوللى ايه احسن حتة اجيبه منها سواء فى القاهرة او فى بورسعيد؟؟؟