المشاركة الأصلية كتبت بواسطة hhhhhm
شوف سعادتك أى حد يقولك على فروق واضحه ومحدده يبقى بيجتهد وكتر خيره طبعا ليه بقى ؟؟؟
أنا من منطقه كلها بتزرع بطيخ الناس نفسها اللى بتزرع فيهم النسبه الأكبر ما تعرفش البطيخه أذا كانت حمره ولا أرعه ولما بييجى يقطع البطيخ بتاعه بيختار 3 4 جيران من الناس اللى مشهودلها بالمعرفه ويقطع ويحدف والتانى يشقط منه والتالت والجمال تشيل وناس برده تحدف وناس تشقط وهما بيحملوا العربيات علشان تروح المبيع والبطيخ يتكوم فى كوم ويتعمل عليه المزاد وناس ربنا يكرمها وناس ربنا يعوض عليها (يارب أكرم كل عبيدك وأكرمنا) ومولد بصراحه بيبقى جو جميل جدا أشبه بمهرجان أن شاء الله أحاول أصور الجو ده
بس طبعا أنا ماشفتش حد بيضغط على البطيخ والكلام ده هو بيعتمد على حاجتين يعنى البطيخه لو مضلعه تبقى كده مليون الميه حمرا والحاجه التانيه انه بيخبط عليها وأنا بصراحه ما أعرفش التفاصيل فى قصة الخبط دى والموضوع مالوش أى علاقه بالحجم يعنى أحيانا تبقى البطيخه كبيره جدا ويسيبها ويقطع واحده جنبها صغيره وفعلا تطلع الكبيره قرعه والصغيره حمرا
وأخيرا أنصحك زى ما قال الأشتاذ أبواسر (
خلي البياع يشقها قدامك ودوقها لو لقيتها حمرا ومرملة خدها لقيتها قرعة او حمرا ومش مسكرة ارميهاله في وشه وقوله شقلي غيرها
وهو كده كده لما يلاقيك بتقوله شقهالي هينقيلك احسن واحدة لكن لو انت بيه بتاخد وتمشي هينقيلك اوحش واحدة علشان يخلص منها) والكلام ده لمدة 20 يوم بس بعد كده هاتلاقى البطيخ كله أن شاء الله مستوى وبرده نقى المضلعه