الموضوع: بداية جديدة و عربية جديدة و جروب جديد

المشاركة الأصلية كتبت بواسطة acc_elbehery

مساء الخير يا جماعة
اخوكم محمد من اسكندرية ..... انا من زمان متابع نايل موتورز بس فى جروب رينو لوجان فقط ،،، اصل معايا لوجان ٢٠١١ و هابيعها اليومين دول . بقالى فترة متابع جروبين جداد بالنسبه لى نيسان و بيجو .
طبعا كلو متابع المقارانات التاريخية زائعة الصيت بين الصنى و ال ٣٠١ ... فانا كنت متابع العربيتين.... و عشان انا بتكلم فى فئة من ١٢٠٠٠٠٠ الى ١٤٠٠٠٠٠ و عايز عربية هاى لاين ٍ( و لو حتى بالاسم ) فانا ملقيتش الا العربيتين دول ده غير التويوتا الياريس الاوتوماتيك برضه ب ١٤٠ قفل بس حسيت انها ضيقه شويه و برضه اول فئة يعنى عربيه ب ١٤٠ و بطاسات .... عيب قوى ...اصل اخوكم جته برضه و عايز عربيه الى حد ما واسعة .....
المهم نفسيا استقريت على الصنى .... سوبر صالون اللون الغريب ده اللى مش رصاصى ولا بنى .. و قلت انا اولا بالفرق ١٥ ولا ٢٠ باكو ... اغيرلها كاوتش و احط مثبت سرعةو فرش نضيف و طيبه كده.
بس من حوالى اسبوعين سمعت عن موضوع حماية المستهلك مع نيسان. و مشاكل الفرامل ،،،،، انا اوك سامع عنها من زمان بس مش كده و حمايه مستهلك .... انا اسقط فى قلبى .... او قدمى مش فاكر .....
يا جدعان انا مليش فى الراحة والجاية و بقالى ٤ سنين سايق اللوجان صيانات كل ٥٠٠٠٠ كيلو و خلاص ... مش يتاع مشاكل و توكيل كل يومين و فوت علينا بكره ....
من شوية لقيت عضو فاضل حاطط تجربة استلام العربية و ماشى بييها ١٧٠٠ كيلو و بيقول كل العيوب الفرامل اختفتى.... انا انشكحت تانى .... الله يكرمكم..... انا عايز نصيحة لوجه الله و اعتبرنى اخوك يا اخى .... قولا فصلا قولا واحدا و شيلوا زنبى بعد كده ...... و خلى بالكوا ...... و الله ناس كتير بتاخد كلامكو بجد و بتحدد عليه قرارات شراء.
اجيب العريية و لا هتبهدل بيها .... هى موجوده بضاعة حاضرة ..... الموضوع موضوع وقت بس .... بس القرار صعب ....اعزائى الاعضاء ........ ماذا تفعلوا لو كنتوا مكانى .....؟

أولاً أهلاً بيك في المنتدي.

العربيتين حلوين النيسان كان فيها مشاكل الفرامل اول ما نزلت وبعض موديلات ال 301 الناس أشتكت من التيل لكن المشكلة في نسيان كانت أكبر من بيجو لأن العيب في نيسان كان في منظومة الفرامل من تيل وماستر, أما في بيجو كان تيل بس اللي بيخلص بسرعة ودا هيبقي حال كل التيل في كل العربيات الجديدة قريب.

مشكلة الفرامل في نيسان دلوقتي مع جهاز حماية المستهلك, يعني لو عايز تشتري وظهرت عندك المشكلة بسبب ان منظومة الفرامل عندك كانت من الباتش الفديم فانت هيبقي ليك الحق في تغير سيستم الفرامل او الأجزاء اللي فيها مشاكل لحد ما العربية تبقي كويسة.

أخر موديلات من النيسان الناس بتقول مفهاش مشكلة الفرامل خالص, بس الأفضل أنك تجرب مع حد تعرفه لأن فيه ناس للأسف سواء في منتدي نيسان أو بيجو بتبالغ ومش بتقول الحقيقة أو بتقول كلام غلط ما زي ما أستاذ هاني عمل كدا من شوية.

صاج النيسان أخف من البيجو زي الأعضاء وضحو,,
وكمان تصميمها مش أيروديناميكي قوي, فوق ال 120 العربية مش ثابته ولازم تعمل حسابك أنك تغير الكاوتش اللي بينزل فيها لأنه مش حلو زي ما ناس كتير قالت هنا هتحتاج تغيره لو عايز ثبات أفضل وبتجري.

النيسان هتبقي أختيار كويس طبعاً بالنسبة لسعرها علي أمكانيتها لو عربية عائلية ومشواير جوا البلد, أو لسفر من غير جري بيها علي سرعات عالية.
وأنا بقول الكلام دا مع أني مش عاجبني تصميمها بس هيا عربية في المجمل كويسة.

البيجو بقي ثباتها أفضل من النيسان, ودا عن تجربة ولازم تجرب بنفسك ودا أفضل من أنك تقرأ أراء مش محايدة,, وفراملها برضه أقوي من النيسان ولازم تجرب.
زي أي عربية فيها مشاكل في باتش من تيل الفرامل الأولاني, ولو حد كان سايق كوري او ياباني هياخد وقت علي ما يتعود علي فتيس الأوروبي لأنه مختلف في السواقة.

أنا مش شاطر في المقارنات, بس دا اللي أقدر أقوله عن العربيتين دلوقتي.
المنتدي عليها مقارنات كتير لو عايز لنكات ممكن أبقي أجيب لك لو تحب,
بس أبحث شوية ولو ملاقتش أبعت لي وأشوفلك لنكات المقارنات.

أنزل شوف العربيتين بنفسك, وأقري المواضيع وأستخير ربنا وهوا في الأول والأخر هيهديك في الحاجة الأنسب ليك.
بالتوفيق.