ياه شغل العفشة ووجع الدماغ معلش انا بدأت كلامى كده لان العفشة فى شوارعنا مش بتستحمل وهاقولك انا عن نفسى شديت العفشة كلها جديد من اكتر من سنة جوز مقصات بالجلب والبيض مع علبة دريكسيون المانى من ام 850 جنيه ايامها وكمان اربع مساعدين مع كان وقتها معاد تغيير الكاوتش وظبطت معايا سنة وشوية وبدأت تفتح بقها تانى قلت مش هاشترى جديد وهاخلينى فى الاستيراد وللاسف حظى تقريبا هو اللى وحش لانى اشتريت مقص المانى كان بحالة الجديد وساعتها التجر عرض عليا مقص للجنب التانى انا قلت له لا علشان ساعتها كان اللى عندى حالته كويسة بس عرفت الفرق لما ركبت الالمانى جنب بقت العربية كويسة وجنب لا
المهم علشان مطولش عليك
لو العفشة اللى عندك فيها شغل كتير
اولا بالنسبة للمقصات لو العربية بتعوم منك جامد هيبقى جلب المقصات محتاجة تغيير وللاسف الجلب اللى فالسوق صينى وشوية وهتحتاج تغيرها فلو كده هتجيب جوز مقصات استيراد المانى وهتلاقيهم محفور عليهم made in Germany وهيجو بالجلب متبرشمين ومعاهم البيض وتتاكد ان الجلبة جامدة ماسكة نفسها بالبلدى تجرب تلفها لقدام ولورا تلاقيها كويسة مش طرية او متهالكة والبيض نفس الكلام
ثانيا المساعدين دول هاتهم استيراد وعالتجربة اسبوع وانت ونصيبك انا بالنسبة لى حظى كان سيء فيهم جبت 3 مساعدين والتلاتة طلعو فشنك فلو هتجيبهم هاتهم من تاجر ثقة وتكون سمعته كويسة وياسلام لو فكهم قدامك من نص يبقى عمل معاك التمام
ثالثا السوست ليها عامل مهم لو حالتهم تعبانين غيرهم باستيراد وهاتهم محملين يعنى السوستة يكون الحديد بتاعها تخين مش رفيع
رابعا علبة الدريكسيون لو اللى عندك الاصلية بتاعة العربية ومعملتش حشو ليها قبل كده اشترى حشو ب 35 جنيه والعفشجى يظبطهالك انما لو اتعمل لها حشو قبل كده فهات علبة استيراد وبرده عالتجربة اسبوع
خامسا البطاحات وناس كتير مش بتاخد بالها منها فالافضل تغيرهم بجداد وهما مش غاليين الاتنين كنت جايبهم ب 35
وبالتوفيق