تبخر الزيت... هل هو حقيقة أم خرافة؟؟
ناس كتير بتتكلم على بخر الزيوت ، وإن في زيوت معدل بخرها أعلى من غيرها، عشان كده الزيت بينقص في المواتير... حتى وهي جديدة بحالتها!!!
في الحقيقة الكلام ده "غير دقيق"
لإن كلمة "بخر الزيت" بانتشارها ومفهومها في عالم السيارات مش مقصود بيه نهائي إنه يتبخر أو يتطاير زي المية لما تسيبها معرضة للهوا مثلا.
في الحقيقة .. معدل البخر بتاع زيوت التشحيم قليل جدا لما تيجي تقارنه مع السوائل الأخرى.. ويكاد يكون منعدم.
كلام غريب شوية.. مش كده؟؟
عايزك تسأل نفسك سؤال صغير... هو الزيت لما يتبخر وينقص مش المفروض إن فيه مكان يخرج منه؟؟
فين المكان ده في بلوك موتور مقفول من كل حتة؟؟؟؟
https://s-media-cache-ak0.pinimg.com...4ac5cd8b22.jpghttp://upload.wikimedia.org/wikipedi...h-airflows.gif
أمال إيه اللي بيخلي الزيت ينقص ؟؟ وتبقى العربية جديدة والموتور سليم ولسه جديد !!!
في الحقيقة .. اللي احنا بنوصفه ده إسمه "استهلاك الزيت".
استهلاك؟؟؟ يعني إيه؟؟
أيوه .. الزيت بيستهلك .. وبكلمات أخرى .. الزيت بيتحرق مع البنزين أو السولار
كل مواتير العالم بتستهلك زيت مع التشغيل... وده بسبب حاجتين رئيسيتين:
*طبقة الزيت اللي بتفضل على السلندر من جوه.
*رذاذ الزيت اللي بيطلع مع زيادة الضغط جوه البلوك من بلف الـ"pcv".
أولا: طبقة الزيت داخل السلندر
طبيعة عمل الموتور إن فيه أجزاء متحركة كتير... والحركة معناها احتكاك بين الأجزاء المتحركة وبالتالي ده بيعمل تآكل بين الأسطح المتلامسة ويسبب تولد حرارة عالية .. ده غير المقاومة الرهيبة نتيجة الاحتكاك
الزيت مهمته الأساسية هي تقليل الاحتكاك.. وبالتالي الجزء المتحرك تبقى حركته سهلة وما يولدش حرارة عالية وما يتاكلش.
http://upload.wikimedia.org/wikipedi...o_3D_Small.gifhttp://nebula.wsimg.com/ed826b08e2bc...&alloworigin=1
السلندر من جوه لازم يبقى عليه طبقة من الزيت عشان البستم يمشي كويس... والبستم بيبقى فيه حلقات بتمنع اختلاط غرفة الحريق عن الأجزاء التانية المتحركة، ودي اللي معروفة بإسم "الشنابر"، ومن ضمن الشنابر دي فيه واحد أو اتنين مخصصين لمسح الزيت من على السلندر...
http://www.motorera.com/dictionary/pics/p/piston.gif
بس المسح عادة مش بيتم بصورة كاملة، وبتفضل فيه طبقة رقيقة على السلندر بتتحرق مع البنزين.
http://3.bp.blogspot.com/_B9_FsCpUyO...ntitled-33.gif
طبعا... كل ما كانت الشنابر متآكلة وحالتها وحشة كل ما كان مسح الزيت من على الجدران أقل، وده معناه نقص الزيت بمعدل أكبر.
واللي بيحصل لما الميكانيكي يقوللك إن العربية عايزة "نص عمرة" إنه بيفتح ويغير الشنابر.
ثانيا: خروج رذاذ الزيت من فتحة النفس
المعروف إن فيه أجزاء كتير في الموتور بتتزيت بـ"الطرطشة" .. وبالتالي رذاذ الزيت ده بيخرج أثناء تزييت وش السلندر بالذات، وبيطلع من جوه البلوك من بلف الـ"pcv" ويرجع يدخل تاني مع خليط الوقود والهوا ويتحرق في السلندر..
Oil jet piston cooling simulation - YouTubehttp://1.bp.blogspot.com/-IxLwx4kSQz...vU/s1600/8.jpg
http://avtonov.info/video/foto/smazka/01.gif
هو إيه بلف الـPCV ده؟؟؟؟
الـPCV اختصار لجملة Positive Crankcase Ventilation يعني: تهوئة علبة المرافق الموجبة .. أو بكلمات أسهل "تهوية البلوك اللي ضغطه عالي".
صمام الـPCV هي فتحة موجودة غالبا في غطا التاكيهات من فوق عشان تسمح بخروج الضغط الزيادة اللي ممكن يكون موجود جوه البلوك، وغالبا بيبقى عليها محبس بسيط عشان يفتح بس لما الضغط يزيد عن حد معين.
http://www.theoldone.com/articles/co...20Location.jpg
http://www.agcoauto.com/content/imag..._operation.jpg
طيب هو ليه الضغط بيزيد جوه البلوك؟؟
الطبيعي إن الاحتراق داخل السلندر بينتج عنه غازات (العادم).. والطبيعي كمان إن إحكام قفل السلندر بالشنابر مش بيكون 100% زي ما قلنا من شوية... بمعنى إن طبيعي جدا نلاقي جزء من الغازات دي بيهرب من الشنابر ويدخل جوه البلوك..
بص على الصورة دي... دي صورة للموتور بتبين ازاي الغازات بتمشي من جوه السلندر وتدخل البلوك وبعدين تطلع من فتحة النفس وترجع تدخل تاني مع خليط البنزين مع الهوا.
http://www.allfordmustangs.com/forum...entilation.jpg
اللي بيحصل فعليا إن نسبة الغازات اللي بتتسرب من السلندرات بتبقى قليلة جدا لما الموتور يكون سخن... وبتزيد بشكل واضح لما الموتور يكون بارد أو ما وصلش لدرجة حرارة التشغيل الصحيحة... وده بيحصل طبعا في بداية التشغيل أو في حالة لو ثرموستات الكوعة متشال أو عطلان وهو مفتوح.
يمكن اللي بيفرق في كمية الاستهلاك هو مدى سهولة تحول الزيت إلى رذاذ (مش بخار) وبقاؤه في هذه الحالة دون ترسب.. وده هو المقصود بكلمة "بخر الزيت"..
معنى كده إن موضوع استهلاك الزيت ده لا يمكن نتفاداه؟؟؟
أيوه... لدرجة إن معظم كتالوجات العربيات بيبقى مكتوب إن معدل استهلاك الزيت ممكن يوصل لحد 1 لتر كل ألف كيلومتر !!!!!
والمعدل العالي ده ممكن العربية العادية تعمله فعلا في حالات التشغيل بالحمل الأقصى، وده غالبا بيحصل لما:
يكون الزيت اللي بتستخدمه خفيف...
والعربية محملة بأقصى وزن مسموح...
مع رفع دوران الموتور لقرب الخط الأحمر...
وممكن يحصل بمعدل قريب منه إذا كان أسلوب سواقتك رياضي يعتمد على الحرق المستمر.
بس ممكن بسهولة جدا نقلل من الاستهلاك..
إزاي؟؟؟
*حاول تستخدم زيت أثقل بعض الشيء (مداه مناسب لجو مصر).. لإن كل ما كان الزيت خفيف ، كل ما كان استهلاكه أكتر.
*حاول تستخدم زيت تخليقي.
*حاول تقلل من الدوران العالي للموتور... يعني خليك في المدى المتوسط بتاع الـRPM.
* حاول تقلل من استخدام عربيتك في مشاوير قصيرة وهي باردة.
* حافظ على ثرموستات الكوعة سليم وشغال كويس.
* والأهم من ده كله... اختار الزيت المناسب لموتور عربيتك زي ما الكتالوج بيقول.
لو عايز معلومات أوسع عن الزيوت وطرق اختيارها .. اتفضل بالدخول على الموضوع ده..
http://www.nilemotors.net/Nile/341680-a.html
ولو عايز معلومات أكتر عن ثرموستات الكوعة.. اتفضل بالدخول على الموضوع ده..
http://www.nilemotors.net/Nile/328708-a.html