الموضوع: مشكلة الطقطقة في تكييف شارب، حد عنده حل؟

عندي شارب بريميم بلاس 3 حصان .. من 4 سنوات تقريباً
وفعلاً الريش بتعمل طقطقه وهي بتتحرك .. خاصة الريش الأفقيه ( يمين وشمال )
بالنسبالي مش شايفها مشكله لأني بثبت الريش في جميع الأحوال .. ومن يوم ما جبته وانا مثبت الريش

انت بتقول انك حاطت التكييف فوق راسك وانت نايم .. طيب بعيد عن صوت الطقطقه بتاعة الريش

بتقدر تتحمل صوت مروحة التكييف واندفاع الهوا وانت نايم ( مهما كان صوته هادي )
بتحس براحه والهوا الساقع بيخبط في جسمك مباشرة ( كده غلط على صحتك والعضم خاصة وانت نايم )

بخصوص الضمان .. الضمان مهم جداً .. ولك صيانه دوريه مجانيه كل 3 شهور .. انت اللي بتتصل بيهم مش هيجوا من نفسهم او يتصلوا بيك يقولولك .. وبتتصل بيهم يجولك تاني يوم على طول .. والصيانه عباره عن تنظيف للجهاز ( الوحده الداخليه والخارجيه تنظيف عادي بدون فك الوحده )

تقدر تجيب فني من برا .. لكن ممكن مايقدرش يحللك مشكلة الطقطقه دي بردو .. لانها سمه من سمات الجهاز .. فممكن يعالجهالك على حساب حاجه تانيه في الجهاز .. او يصلحلك مشكله ويسبب مشكله اخرى .. او يفسد شىء في الجهاز بدون قصد وبدون ما تعرف ويظهر العيب بعد شهور او موسم كامل

وعموماً الجهاز مش متبرشم علشان يخرج من الضمان .. يعني تقدر تجيب فني ويفضل في الضمان بردو

رأي .. تكييف شارب ممتاز كقوة تحمل وأداء وتبريد وضمان وخدمة ما بعد البيع
طقطقة الريش مش مشكله خالص .. لأنك تقدر تستمتع بتبريد التكييف مع تثبيت الريش ( وأعتقد تثبيتها أفضل )
وخليك مع الضمان .. لأن الفني في الشركه هو نفس الفني اللي فاتح محل في الشارع .. الفرق انك بتتعامل مع شركه وهي مسؤله عن الجهاز .

ومبروك عليك التكييف .. التكييف زي الفل وافضل من ال جي واغلى منه

المشاركة الأصلية كتبت بواسطة ahmedmedhat86

شكرا على نصيحة حضرتك بخصوص الصيانة و الضمان، أنا فعلا صعبان عليا إنه جهاز جديد و أجيبله فني من برة..
المشكلة يا سيدي الفاضل، إن الجهاز بيعمل الصوت ده من نفسه كده من غير ما السوينج يكون شغال يعني الريش ثابتة، صوت زى ما تجيب قزازة بلاستيك و تقعد تدوس عليها كل 15 ثانية. الصوت مش عالي جدا لكن لما بيفضل شغال فوق دماغي طول الليل و أنا نايم مبعرفش أنام منه.

صوت الطقطقه ( كأنك بتطبق ازازه بلاستك ) دة عندي والريش شغاله فقط

لكن والريش ثابته مفيش اي صوت طقطقه .. ومش فاكر كان في صوت اول ما اشتريته واختفى بعد كده ولا لأ

كده يبقى الصوت نتيجه تأثير الحراره على جسم وخامة التكييف ( الوحدة الداخليه ) وهو دة اللي منبهيين عليه في الكتالوج

ومتهيألي دي بقى مفيش اي فني يقدر يعالجها ( لأن دي في خامة التصنيع نفسها )

على كل حال اتصل بيهم تاني وتالت .. كل مرة بيجيلك فني غير التاني .. وفي فني اشطر من التاني

و ممكن اوي الصوت ده يختفي فعلاً بعد فتره .

وشغله على اقل سرعه للمروحه .. مفيش داعي للسرعه العاليه

شارب من افضل المكيفات فى مصر
افضل مكونات وقوة اداء وصوت هادىْ
وضمان حقيقى خمس سنوات

مشكلة صوت الطقطقة
ده موش عيب تصنيع ولا عيب تقفيل

ده عيب تركيب لان معظم الفنيين لايستخدمون ميزان مياه

عند تثبيت الوحدة الداخلية وده بياثر على صوت الفانة للوحدة الداخلية وكمان عمرها الافتراضى لعدم اتزان محور الفانة وممكن يكون سطح الحائط موش مستوى تماما اى به انبعاج وعند تركيب الشاسيه الصاج اللى بيركب عليه الوحدة الداخلية واحكام رباطه قد يتعوج الشاسيه الصاج اللى بيركب عليه الجهاز قليلا وبالتالى يكون حمل على مفصلات ريش الهواء ويسبب صوت الطقطقة
كمان الفنى قدلايقوم بتثبيت الشاسيه الصاج اللى بيركب عليه الفانة باكتر من ثلاث او اربع مسامير
لانه بيكون مستعجل وده ممكن يسبب زنة للوحدة الداخلية

علاج الطقطقة سهل وبسيط
عود كبريت وتغمس منه جزء من كريم للوجه
وتدهن به مفصلات ومحاور ريش الهواء سيختفى الصوت

اذا لم يختفى الصوت هات فنى يتاكد من استواء سطح الحائط خلف الوحدة الداخلية وعدم وجود انبعاج به بميزان مياه اذا طلع فيه انبعاج
العلاج انك تركب على الحائط قطعة خشب كونتر 10 مللى اكبر قليلا من مقاس الشاسيه ثم تقوم بتركيب الشاسيه الصاج اللى بيركب عليه الوحدة الداخلية وبكده يختفى الصوت
اسف للاطالة وارجو ان اكون افدت الجميع

المشاركة الأصلية كتبت بواسطة ahmed12345678

عندى التكييف الشارب اتنين وربع حصان
وبقيت اثبت الريش من الريموت ومخليهاش تتحرك علشان مسمعش السيمفونية دى

هو ده الحل الوحيد