الموضوع: ممكن عنوان متخصص فى صيانة السامسونج جلاكسى

المشكلة دى حصلت مع تاب بنتى
وديته التوكيل الرسمى لسامسونج فى السراج مول وكانو هايشتغلونى فى شاشة كاملة وسعرها كان 2000 جنيه عندهم
طبعا ماقتنعتش بالكلام ده وخدته ودخلت السراج مول ادور على حد بيفهم
ناس كتير هناك رشحولى محل فى الدور الارضى اسمه زووم
اكتشفت هناك ان المشكلة سفت وير فقط لاغير وبدلا من الفين جنيه دفعت 100 جنيه
اهم حاجة فى المكان ده ان عندهم امانة ومابيشتغلوش الزبون ومن كم الناس المتعاملين معاهم فى الشوية اللى انا وقفتهم هناك باين طبعا ان سمعتهم كويسة وانهم شاطرين فى مجالهم
تحياتى

المشاركة الأصلية كتبت بواسطة dolly13

اكتشفت هناك ان المشكلة سفت وير فقط لاغير وبدلا من الفين جنيه دفعت 100 جنيه

حتى الــ 100 جنيه كتير لان السوفت وير تنزيله من اسهل ما يمكن بس طبعا الحمد لله 100 جنيه اهون من 2000

المشاركة الأصلية كتبت بواسطة HanyAziz

الاخوة الاعزاء فى المنتدى تحية طيبة وبعد
ياريت لو حد يعرف اواتعامل مع محل صيانة محمول بيشتغل فى الجلاكسى يدينى عنوانة اوتليفونة فى القاهرة المشكلة هى شاشة الموت التى اصيب بها تليفونى ال s3 والتليفون واقف على الشاشة الافتتاحية وكاتب سامسونج جلاكسى s3 ومش راضى يشتغل واكتشفت انى العيب دة منتشر فى النوت2 وs3 وممكن يكون عيب سوفت اوممكن يحتاج تغيير بوردة كاملة ولو حد عندة فكرة تمن البوردة بتاعت الs3 كام ياريت يفيدنى وشكرا لكم

كل المطلوب ان الـــ download mode يكون شغال و الباقى سهل جدا
حضرتك ممكن تجرب تنزل سوفت وير جديد (بنفسك) و المشكله هتحلل ان شاء الله
و انا تحت امرك و معاك خطوه بخطوه ان شاء الله

المشاركة الأصلية كتبت بواسطة shnory

العرض او الشكل واحد في الحالتين
بس الغيب دا بيحصل اكتر في الاس ثري والنوت 2
لو وضع الداون لود بالمنظر ده


حيقولوله تغيير بورده
او سوفت وير ب700 جنيه واحتمال 20 % انه يتصلح
او تغيير اي سي emmc ودا حاليا يعتبر مش موجود لتغيير وسعره بيكون مقارب لل1000 جنيه بس معرفش كام بالتحديد
--------------------------------
لو وضع الداونلود بالمنظر ده

دا سوفت وير عادي ممكن تعمله في البيت لو عندك امكانيات واستعداد للمخاطره
او توديه لحد يعمله والسعر بيفرق من مكان لمكان

انا عندى ماكنش المنظر كدة
كان التاب يفتح على الصفحة الرئيسية لكن مفيش تاتش خالص
وانا مليش فى حكاية السوفت وير دى خالص واهو 100 ارحم بكتير من الفين
انا رشحت لصاحب الموضوع المكان ده لانى حسيت انهم مش بيشتغلونى زى التوكيل

المشاركة الأصلية كتبت بواسطة dolly13

انا عندى ماكنش المنظر كدة
كان التاب يفتح على الصفحة الرئيسية لكن مفيش تاتش خالص
وانا مليش فى حكاية السوفت وير دى خالص واهو 100 ارحم بكتير من الفين
انا رشحت لصاحب الموضوع المكان ده لانى حسيت انهم مش بيشتغلونى زى التوكيل

حضرتك انا والله مقصدتش حاجه لما قلت ان الــ 100 جنيه كتير و مقصدتش ان زووم غالى انا قصدى ان معظم المحلات دى بتستغل عدم معرفة صاحب الموبايل و ان الموبايل غالى فبيطلبوا فلوس كتير
انا اول ما جبت الموبايل بتاعى حصل مشكله فالباور (هارد وير) و رحت الصيانه قالى من 800 لــ 1000 و الموبايل هيفضل عنده حوالى اسبوع او 2 و مكان تانى قالى 500 جنيه و هيخلص فيومين
واحد صاحبى عمله فـ 3 او 4 دقائق بالكتير
و من ساعتها قررت ان مش هروح لمكان اصلح فيه حاجه غير بعد ما احاول معاه و اشوف الحلول فالنت و لو معرفتش اروح و الحمد لله دلوقتى معظم صحابى لما بيحصل حاجه معاهم فالموبايل (سوفت وير) بيجوا و بعمله