تجربة شخصية ونصيحة هامة لراغبي شراء ال بيچو ٥٠٨ من الخليج
السلام عليكم
قرأت علي المنتدي تقديرات خيالية لجمرك ال ٥٠٨ لو حد مقيم بالسعودية عايز يشتريها وينزلها مصر،
حابب انقلكوا التقديرات الحقيقية بناء عن تجربة شخصية مع صديق.
الاول عايز اشرج تفاصيل الجمرك لما تحب تنزل العربية
الشرح دة هيكون لأعلي فئة في السعودية ال allure , ومواصفاتها انا كنت كاتبها في موضوع قبل كدة بالتفصيل.
جمرك العربيات ال ١٥٩٩ سي سي فيما أقل هو عبارة عن ٦١ ٪ من السعر العالمي للفئة المستوردة بالاضافة لاي كماليات زائدة عن هذة الفئة في السيارة المستوردة.
ال ٥٠٨ ال allure في السعودية مفيهاش كماليات زيادة تتجمرك وهي داخلة مصر ، الشاشة وباقي الكماليات مشمولة في سعر allure العالمي اللي انت هتتجمرك عليه ، والسعر دة هو اللي انت هتدفعة في السعودية . بالدولار تقريبا ما يعادل ١٠٠ الف ريال
ال ٦١٪ عبارة عن التالي
٤٠٪ جمرك ودة اللي الخصومات بتنطبق فقط عليه
١٥٪ ضريبة
٥٪ ضريبة برضة
١٪ رسوم
ال ٤٠٪ الجمرك هما اللي بيتخفضوا مع مرور السنيين بواقع ١٠٪ من الجمرك للسنة الاولي ، يعني ٤٪ من اجمالي تمن العربية ، يعني يوصلوا ٣٦٪ من تمن العربية والاجمالي يصبح ٥٧٪ بدلا من ٦١٪
وبدءاً من السنة التانية ولمدة ٨ سنوات الجمرك هيتخفض ٥٪ لكل سنة يعني ٢٪ من اجمالي تمن السيارة، يعني يوصل الجمرك ٣٤٪ من تمن العربية والاجمالي يصبح ٥٥٪ بدلا من ٦١٪
وهكذا لحد ما بعد ٩ سنوات من سنة الشراء يصل تخفيض الجمرك الي ٥٠٪ يعني ٢٠٪ من تمن السيارة بدل من ٤٠٪ ويكون اجمالي المدفوع ٤١٪ بدلا من ٦١٪
بما ان تمن السيارة ١٠٠ الف ريال فده هيسهل علينا الحسبة
لو دفعت تمنها ١٠٠٠٠٠ ريال + ٦٥٠ ريال تأمين ضد الغير + ٣٥٠ ريال توثيق في الغرفة التجارية والسفارة + ١٥٠٠ ريال نقل لمصر هيكون الاجمالي ١٠٢٥٠٠ بالاضافة ل ٦١٠٠٠ جمرك يبقي الاجمالي ١٦٣٥٠٠ ريال ، ولو حولناهم للمصري ب ١٨٠ قرش للريال هيكون السعر الاجمالي ٢٩٤٣٠٠ جنية وهتدفع كمان حوالي ٢٥٠٠ جنية للمخلص يبقي الاجمالي تقريبا ٢٩٦٨٠٠ جنية مش ٣٢٠ و٣٤٠ الف
فية واحد عارضها زيرو علي بيزات ب ٣٤٠ الف ، هو حر ، عايز يكسب فيها ٤٠ الف جنية، ميبقاش مقياس.
وطبعا لو استنيت لحد شهر اكتوبر هتستفيد ب ال ٤٪ خصم من تمن السيارة ( ١٠٪ من تمن الجمرك اللي هوة ٤٠٪ ) ، يعني هتوفر ٤٠٠٠ ريال يعني ٧٢٠٠ جنية وسعرها يوصل تقريبا٢٨٧١٠٠ جنية وبعد كدة كل سنة لو سعر صرف الدولار كان ثابت هتوفر ٣٦٠٠ جنية ولمدة ٨ سنوات ، يعني لو اشتريت موديل ٢٠١٤ في أغسطس ٢٠١٤ وقعدتها معاك سنة وشهرين لحد اكتوبر ٢٠١٥ هتكون تستحق تخفيض سنتين يعني هتقف عليك ب ٢٨٣٥٠٠ جنية، يعني اغلي ١٠ الاف جنية بس عن المصري مع فرق الكماليات.
في ديسمبر ٢٠١٣ صديق ليا نزل ال ٥٠٨ وجمركها ، ودي كانت اول سيارة من سيارات زمايلي تنزل مصر وتتجمرك، وده اللي فهمني حسبة الجمرك ، وكان شاريها غالية ب ١٠٨ الف ريال موديل ٢٠١٢ في نصف ٢٠١٢ يعني استفاد بردة بسنتين، وفي الجمرك حاسبوة علي سعرها العالمي بدون زيادات اللي هوة حوالي ١٠٠ الف ريال كما ذكرت ( طبعا الحسبه بالدولار بس الدولار والريال واحد في نسبة سعر الصرف لانها ثابتة من سنوات وانا مستخدمها بدل الدولار للتوضيح ) ومحسبلوش علي ال ١٠٨ الف لانة كان شاريها غالي، حاليا السعر بالريال هو السعر بالدولار
صديقي دفع تقريبا ٩٦٠٠٠ جنية عبارة عن ٥٥٪ جمرك ( من ١٠٠ الف ريال ) يعني ٩٣٥٠٠ جنية ( ٥٥ الف ريال x ١٧٠ قرش سعر الصرف وقتها ) بالاضافة ل ٢٥٠٠ جنية للمخلص.
طبعاً فقط ٧٥٪ من الاسعار دي تنطبق علي السيارة الفئة access اللي هيه ب ٧٥ الف ريال فقط
يعني لو هتنزلها مباشرة هتكلفك حوالي ٢٢٤٣٥٠ جنية ( ٧٥٠٠٠ تمنها + ٦٥٠ تأمين + ٣٥٠ توثيق + ١٥٠٠ نقل لمصر + ٤٥٧٥٠ جمرك ٦١٪ = ١٢٣٢٥٠ ريال x ١٨٠ قرش = ٢٢١٨٥٠ جنية + ٢٥٠٠ جنية للمخلص ) ، ولو مع تخفيض اول سنة ( ٥٤٠٠ جنية ) يصبح السعر ٢١٨٩٥٠ جنية ، ولو تخفيض السنة التانية ( ٢٧٠٠ جنية ) سيكون السعر ٢١٦٢٥٠ جنية فقط يعني ارخص من اللي في مصر بحوالي ٢٦ الف جنية مع العلم ان اللي في مصر تجهيزاتها اعلي شوية من اللي في السعودية.
انا واثق ان التوكيل في مصر بيكسب في العربية الواحدة قد اللي الوكيل في السعودية او فرنسا بيكسبة في خمس عربيات على الاقل من خلال التلاعب بالكماليات والسعر ودة علشان حاسس ان الزبون هياخد العربية ويجري وممكن ميجيش الصيانات علي عكس البلاد التانية ومنها السعودية اللي بيعتمدوا علي تمن الصيانات وقطع الغيار، انا غيرت فلتر المكيف وكان تمنه ٦٠ ريال مصنوع في فرنسا واخدوا اجرة يد عاملة ١٠٥ ريال .
خرايط السيارة هي navtech ودي اشتريتها نوكيا وسميتها Here ودي موجود منها نسخة لمصر وباذن الله هنركبها لما نجمركها يعني هنركبها.
اتمني يكون الشرح دة هيفيد اي حد مقيم في الخليج وبيفكر ينزل العربية مصر وخايف من اسعار الجمارك الخيالية اللي قرأتها الاسبوع اللي فات علي المنتدي
بارك الله فيكم ووفقكم لما فيه الخير
