الموضوع: تجربة شخصية ونصيحة هامة لراغبي شراء ال بيچو ٥٠٨ من الخليج

جزاك اللة خير

شكرا علي التوضيح

الله ينور ياباشا وفى ميزان حسناتك

شكرا جزيلا للمعلومات دي
لكن انا بالسعودية ومسجل عربيتى نيسان جوك بالسفارة فاتورة الشراء بس بعد الغرفة التجارية والخارجية السعودية
ارجو من حضرتك توضيح في ورق تاني بيتصدق او يتعمل عشان لما انزل عربيتى وممكن يسألوا عليه في مصر
ولا بيحتاجوا ورقة من المرور بس مع الفاتورة تثبت انى مالك اول

طيب سعر الفل اوبشن في مصر هنا 270 الف جنية
يعني ارخص ما اجيبها من السعودية واستعملها سنتين وانزلها

أشكر وأقدر ثناؤكم جميعاً، وبالأخص أستاذ أحمد أمين.

زي ما استفدت من المنتدي قبل كدة وساعدني آخد قراراتي، حابب أفيد اي حد في الحيرة اللي انا كنت فيها.

أتمنى لكم جميعاً الستر والتقوي والعافية.

تعليق صغير بخصوص سؤال شفتة كتير علي المنتدي مش بس في قسم بيچو،
لو انا في مصر اشتري من الوكالة ولا خليجي ، ولو انا في الخليج أشتريها وأجمركها ولا استنى أشتريها من مصر؟

للي عايش بمصر انصحه يشتري اي سيارة من وكالتها، فقط من اجل الضمان ، الا لو الخليجي فيه مميزات كبيرة مقابل فرق السعر أياً كان ، واللي بيبقي دايما في صالح المصري مش الخليجي، خاصة ان المواصفات الفنية الخليجية بقت تقريبا اساسية في معظم السيارات في أغلب الدول.

أما بالنسبة للي عايش بره مصر، فده بيختلف علي حسب وضعة وامكانياته،
لو عملك مأمنلك سيارة او مبتحتجش سيارة يومياً للذهاب للعمل، او لوحدك من غير عيلتك وشباب ومش فارقة معاك او لو فيه مواصلات جماعية متوفرة او تاكسيات رخيصة، ففي الحالة دي ممكن تشتري سيارة مستعملة حديثة بمبلغ معقول علي حسب امكانياتك، مش هتخسر فيها كتير لما تيجي تبيعها ، ولو لا قدر الله عطلت ممكن بسهولة تأمن وسيلة بديلة لحد متصلحها.

أما لو السيارة احتياج يومي أساسي للذهاب للعمل او معاك عيلتك واولادك وفية مدارس ومشاوير ، خصوصا لو عملك بعيد عن بيتك زيي والطريق كلة صحراء جرداء، ولو العربية عطلت بيك ممكن تقعد فترة مستني الفرج وتبقى خايف، وعما تتصلح هتحتاج تأجر سيارة ب ١٢٠ ريال يوميا علي الاقل، فدة يخليك محتاج سيارة جديدة ايا كان نوعها، تفاديا لمواقف هتكون من أخوف كوابيسك اليك،
معظم اللي في الوضع دة وقرر يشتري سيارة جديدة، خاصة لو بالتقسيط ، بيكىن محتار يشتري سيارة ذات سعة محرك كبيرة ويستمتع بالقوة والفخامة ، بس لما يجي يبيعها قبل ميرجع مصر هيخسر فيها بالتأكيد ، ولا يشتري سيارة أقل من ١٦٠٠ سي سي ويقدر يجمركما بعدين وهو نازل نهائي ويكون بكدة كسب كذا حاجة:
اولاً وفر احتياجات ومشاكل وقطع غيار وصداع اي سيارة مستعملة،
ثانياً كسب اللي كان هيخسره لو كان هيبيع السيارة قبل ما ينزل،
ثالثاً للي هيبيعها قبل ميرجع وناوي يشتري عربية جديدة في مصر يبقي وفر تخفيضات الجمرك خاصة لو قعدها معاه سنتين او ثلاثة قبل ميجمركها،
رابعاً للي عيبيعها قبل مينزل وناوي يشتري عربية مستعملة ف مصر ، مفيش احسن من العربية اللي انت اللي مستعملها قبل كدة،

خلو بالكم فية ناس العربيات بالنسبة ليها اربع عجلات ماشية وخلاص، ومعلوماتها وخبراتها واهتماماتها بالعربيات متواضعة جداً ، ودول انا بحسدهم لانهم مريحيين دماغهم واي حاجة بترضيهم ومعندهمش مشكلة القيمة مقابل السعر والكوري اللي بيلمع اكتر بيبهرهم ويرضيهم.

انا لست متعصب للبيجو أبداً، بالعكس ، فقبل متظهر البيجو في ٢٠١٢ كنت شايف ان اكتر سيارتين يستحقوا تمنهم في السعودية هما الباسات الجديدة ٢٠٠٠ سي سي ١٧٠ حصان وتمنها ٧٨ الف ريال والفيوچن القديمة ٢٤٠٠ سي سي ١٧٢ حصان وتمنها ٧٢ الف ريال ، انما مبدا اني اخسر فيهم عند بيعهم قبل منزل لاني مقدرش أجمركهم خلاني اشتري الكورولا ١٦٠٠ سي سي ب ٦٤ الف ريال، مع انها لو قارنتها بيهم تسوي نصف تمنها بس.

لما ال ٥٠٨ ظهرت ولقيتها في فئة الباسات والڤيوجن ( من حيث الحجم والقوة - ١٦٣ حصان -والجودة ) بل تسبقهم وكمان ١٦٠٠ سي سي ، ونفس فئة السعر ٧٦ الف ريال، حسيتها صفقة بكل المقاييس، وفي خلال ايام كنت بايع الكورولا وشاري الفئة الاعلى بعد الاستخارة بدون تردد، وتبعني عدد كبير من زملائي في العمل، لدرجة ان مهندس الاستقبال في الوكالة كلمني شكرني علي الدعاية اللي انا عملتها للعربية، واستأذني يدي رقم تليفوني لأي مصري بيفكر يشتريها بس متردد، والحمد لله اقنعت ناس كتيير بيها حتي على المنتدى.

سبب كمان خلاني انا واصدقائي نجيب العربية من برة ونجمركها، إن احنا كدة بندفع تمن السيارة على مراحل ، يعني مقدم بسيط ( اقل من ادني مقدم وافقت بيه المصرية للسيارات علشان تقسط لقريبي البيكانتو في مصر )، وبعدين أقساط مريحة علي سنوات، وبعدين تخفيض سنوي في الجمرك، وبعدين تدفع الجمرك وانت نازل نهائي،
ده نوعاً ما مش هيحسسك بتمن العربية، كلنا مقتنعين - شخصياً - إننا هنفكر الف مرة قبل ما ندفع ٢٨٠ ألف جنية كاش في مصر بعد منرجع نهائي، مهما كان مستوانا المادي نظراً لظروف البلد الحالية، وان الطريقة دي هيا الوحيدة اللي ممكن تخلينا نمتلك عربية زي دي في مصر.

آسف علي الاطالة وبقترح تاني علي الاستاذ احمد امين انه يخصص موضوع مثبت عن ال ٥٠٨ ، يجمع فيه كل اللي اتكتب عنها في المنتدي السنوات اللي فاتت ، لإن فية اعضاء وزوار واضح من أسئلتهم انهم مش عارفيين يوصلوا للمواضيع السابقة.

أخوكم،
د. شريف عبدالمجيد