السلام عليكم و رحمة الله وبركاته
انا كان عندى الأسكاترا بتجيب زيت و محتاجه تتغير و كنت ماشى بيها بزودلها لتر زيت بمعدل لتر زيت باور كل شهرين تقريبا ب 100 جنيه ، ده غير ان كانت مبهدلالى العفشة من تحت زيت و شحم.
المهم سألت مهندس بتعامل معاه فى أوتو سيرفيس قالى هسألك عليها و اركبهالك بره أوتو سيرفيس علشان هنا هتبقى غاليه أوى و فعلا سأللى عليها وقالى نمره واحد عامله 1900 جنيه.
كلمت ياسر بتاع الحرفيين أسال عليها اول كلمه قالهالى 1200. بس انا مش برتاح للشغل فى الحرفيين بصراحه. بس اللى فهمته أن مهندس اوتو سيرفيس هيعمل عليا شغل جامد.
مكانش قدامى غير الأستاذ الفاضل / أحمد أمين ، مرجعى فى كل ما يخص ال 307. بصراحه خبرته مهمه جدا و آرائه كلها تحترم و عمره ما أتأخر عليا بأى نصيحه.
وصفلى مركز الدهشورى بصقر قريش و بعتلى الخريطه بتاعتهم علشان أوصلهم بسهوله.
كلمت م/على الدهشورى فى التليفون قالى عامله 1300 و قاللى تعالى هعملهالك النهارده.
وصلت المركز الساعه 2 الظهر و كان هناك حوالى 7 عربيات مفتوحه و فيها شغل، طبعا اول اما شفت المنظر عرفت ان الموضوع فيه لحد بالليل. بس بصراحه فى دقايق فضولى مكان و فى حوالى 20 دقيقه القنطره كانت نازله و الأسكاترا بره العربيه، ودى من المميزات عندهم بصراحه.
المهم بقى بعد كل ده فضلت منتظر نصف ساعه محدش شغال فى العربيه سألت م/ على الدهشورى قالى أصل أنا الأسكاترا اللى عندى دريكسيون يمين و بعت أجيبلك من حد معرفه واحده شمال . طبعا ماكنتش فرحان بالكلام اللى بسمعه علشان حد معرفه هيبعت إسكاترا أكيد هيبعت حاجه نص نص ومفيش عندى اى اختيارات تانيه الكلام ده اتقاللى بعد اما العربيه اتفكت. اللى ضايقنى اوى أكتر إنى فضلت مستنى الإسكاترا 4 ساعات كامله الظاهر انها كانت جايه من ليبيا!!!
طبعا طول مانا قاعد مفيش فى بالى غير انى يا اما ارجع الأسكاترا بتاعتى تانى و أمشى يا أما افضل مستنى ان شالله لحد تانى يوم.
المهم الأسكاترا وصلت بالسلامه بعد طول انتظار و نشكر ربنا كانت شكلها نظيف أوى يارب تفضل كده و ماتعملش مشاكل الفتره اللى جايه علشان الحاجات دى مش بالشكل.
المهم من الحاجات السيئه جدا اللى حاصلتلى هناك ان فيه صنايعيه كتير شباب، للأسف نصيبى جه مع واحد كبير فى السن، ربنا يديلوى الصحه طبعا ، بس بطيئ أوى ، هو اسمه عم أيمن ، مبدئيا كده لما الأسكاترا وصلت كان مختفى و الورشه كلها كانت بتدور عليه و بعد نص ساعه كامله لقيناه و ابتدى شغل ، كان يشتغل ربع ساعه و يقوم يجيب حاجه محتاجها ما يرجعش غير بعد نص ساعه كامله و برضه نفضل ندور عليه. آخر مره انا اتعصبت أوى و طلبت حد تانى يفضل معاه ويساعده.
المهم أنا قفلت العربيه و جربناها على الساعه 9 كده و كنت غيرت حاجات تانيه زى كاوتشة كوبلن و بلية موتور كانت صوتها عالى شويه و خشن ، دلوقتى لو مدور الموتور ما تعرفش ان كان داير وللا لأ من نعومة صوته و حاسبتهم و خد منى 200 جنيه مصنعيه و انا شايف انه مش بطال بصراحه.
المشكله مش فى كده ، طلعت من عندهم الساعه 9 رحت مصر الجديده وانا داخل بنزينة موبيل اللى فى الخليفة المأمون و مستنى دورى فى طابور العربيات و كانت العربيه فيها نص تنك مليان يعنى ماكنتش فاضيه ، لاقيت لمبة الإنجن نورت و Depullotion System Faulty و بعدين العربيه بطلت، حاولت أدورها كتير مادارتش. مليت العربيه بانزين و حطيت السوائل بتاعت تعلية الأوكتاف و تنظيف دورة الأنجكشن من موبيل و حاولت كتير أدور برضه مارديتش تدور.
ركنت العربيه و كلمت على الدهشورى حكيتله على اللى حصل و حاولت أشوف معاه ايه اللى ممكن يكون حصل أثناء الفك و التركيب يخاللى العربيه تعمل كده، و بعد اما حاول يساعدنى كتير فى التليفون و كل اللى قاللى عليه عملته صمم انه يبعتلى واحد من عنده بتاكسى لحد عندى ، و انا بصراحه كنت بتعزز بس كان نفسى أوى يعمل كده و فى الآخر وافقت بعد اما الح عليا بكده.
و بعد شويه اتصل بيا و بلغنى ان أخوهم الأكبر سيد الدهشورى هيجيب صنايعى من عندهم و يجيلى بعربيته و فعلا كانوا عندى على الساعه 11 بالليل.
حاولنا ندور العربيه كتير لكن منفعش و جربوا كل حاجه و بعد اما قررنا انى هنقفلها و بكره هنشوفلها حل بالنهار ، بجرب آخر مره العربيه دارت معايا ، كنت هتجنن بصراحه علشان ماحدش فاهم حاجه.
صممت أرجع المركز معاهم و انى هسيب العربيه هناك لحد اما نفهم ايه الموضوع. وأول ما وصلنا حطينا العربيه على الجهاز لاقينا العربيه مسجله 4 أخطاء للأربعه إنجيكتور ، و ده صعب أوى أنه يحصل مره واحده و ده فى الغالب فيشة الأنجكتور مش راكبه كويس. لما سألت تواريخ الأخطاء دى كلها امتى عرفت ان متسجله فى نفس اليوم ولما عرفت أن مكان الفيشه دى ورا الموتور و فوق القنطرة على طول، طبعا انا أتأكدت و على الدهشورى كمان كان عارف كويس أن عم أيمن الله يباركله هو السبب.بس طبعا أرجع و أقول كتر الف خيرهم انهم جولى من صقر قريش لحد مصر الجديده، كان زمانى مرمى فى الشارع لحد دلوقتى.
المهم على الدهشورى قالى ان المروحه عاوزه مقاومه علشان شغاله سرعه واحده بدل سرعتين، غيرتها قبل ما أمشى و سألته الحساب كام قالى المقاومه ب 250 جنيه و مارضيش ابدا ابدا ياخد منى فلوس ذياده علشان مشوار مصر الجديده اللى عمله علشان ينقذنى ومشيت من عندهم الساعه 2 صباحا، كانت ليله زى الفل !!!
طبعا انا فاهم ان اكيد سعر المقاومه دى أقل من كده و المشوار اتحسب فيها، بس انا بجد مسامح أوى فى كل حاجه و لو كان طلب أكتر كنت هديله بنفس راضيه ، كفايه انه جالى مشوار كبير بعربيته.
الخلاصه : المركز كويس بغض النظر عن أن لازم نشوف القطع اللى هتركب قبل بدأ الشغل ، و كمان فيه هناك صنايعيه زى عصام و مازن وبلاش أيمن خالص.
أسعارهم معقوله جدا ، بس عندى احساس قوى ان قطع الغيار الجديدة مش أصليه خالص.
أنا عن نفسى هعمل عندهم شغل تانى حاجات معينه و حاجات هعملها برضه فى أوتو سيرفيس ، و كل واحد على حسب تقديره الشخصى.
للعلم المركز يمتلكه تلت أخوات :
سيد الدهشورى ------------> 01001552984
و ده الأخ الأكبر و مسؤول بس عن الماليات و الأسعار
على الدهشورى ------------> 01000963549
وده الأخ الأوسط و هو كهربائى
شريف الدهشورى------------> ؟؟؟ مش معايا للأسف
وده الأخ الأصغر و هو ميكانيكى و بيشتغل فى مودرن سيرفيس مسؤول عن قسم الفتيس بس بيفهم فى الميكانيكا عموما.
أتمنى حظ أحسن منى للجميع.
والشكر كل الشكر للأستاذ الفاضل أحمد أمين ...
المفضلات