تغيير سير التقسيمة وحساس الباور فى اللوجان

**mabdelaziz** · 04-05-2014 05:56 PM

النهارده رحت التوكيل أعمل صيانة ال 40000, بعد ماكنت محتار أعملها بره التوكيل ولا فى التوكيل عشان الضمان خلص خلاص.

المهم فوجئت بالمهندسة اللى فى فرع العامرية بتقول لازم تغير طقم السيور عشان قفلت 3 سنين, وأنا كنت لسه قارى فى المانيوال إن سير التقسيمة بيتغير بعد 60 ألف كم أو 4 سنين.

إيه رأيكم يا جماعة أغير السيور دلوقتى ولا بعد 4 سنين؟

وبعد شوية رجعت قالت لى حساس الباور بايظ -بيسرب زيت- وعايز يتغير, سألتها بكام قالت 380 جنيه, وأنا بصراحة عامل حسابى على تكلفة الصيانة بس -بالمناسبة الصيانة بقت ب 1000 جنيه- فرفضت أعيره.

حد يعرف حساس الباور ده بكام بره وتركيبه سهل عند أى ميكانيكى ولا لازم فى التوكيل؟

صحيح لما رفضت أركبه المهندسة قالت لى بس ده ممكن يبوظ الدينامو لو الزيت جه عليه, إيه رأيكم فى الكلام ده؟

**Super_Star_h** · 05-05-2014 06:14 AM

سيور ايه ؟
هتغير سير التقسيمه والدينامو
والاتنين كل واحد فيهم تقريبآ ب 120 جنيه
وهتروح لحد شغال فى الرينو هيغيرهم بدون مشاكل نهائيآ
لان تركبهم سهل
وهياخد مصنعيه فى حدود 200 جنيه
اما حساس الباور ده معرفوش بصراحه بس انت شايف ان فيه زيت بيسرب عندك ؟ بصيت فى الكابوت ؟ تحت العربيه ؟

**hisham farrag** · 05-05-2014 07:57 AM

طلمبة الباور فوق الدينامو
ممكن نستنتج ان كلام المهندسة صح بخصوص انه بيسرب زيت على الدينامو بالتالى ممكن يبوظه

**semsem8080** · 05-05-2014 08:59 AM

تغيير طقم السيور وبلي للسيور يتكلف بالمصنعية عند برازيلي عندك في اسكندرية 1400 بالزيت وفلتر زيت ممكن تكلمة
سعر طقم الكاتينة توكيل 670 جنيه
01001164880
01147663310

**mabdelaziz** · 05-05-2014 11:23 AM

المشاركة الأصلية كتبت بواسطة super_star_h

سيور ايه ؟
هتغير سير التقسيمه والدينامو
والاتنين كل واحد فيهم تقريبآ ب 120 جنيه
وهتروح لحد شغال فى الرينو هيغيرهم بدون مشاكل نهائيآ
لان تركبهم سهل
وهياخد مصنعيه فى حدود 200 جنيه
اما حساس الباور ده معرفوش بصراحه بس انت شايف ان فيه زيت بيسرب عندك ؟ بصيت فى الكابوت ؟ تحت العربيه ؟

أيوه فيه زيت بيسرب فعلاً أنا شفته, فى زى خرطوم كده راكب فى حساس الباور وعليه زيت شبه متجمد, مش حاجة بتسيل يعنى.

مش بلاحظ أى تسريب تحت العربية الحمدلله
بس على فكرة سير التقسيمة مش ب 120 جنيه, الأصلى فى حدود 700 جنيه من التوكيل

أنا عايز أعرف بس التغيير يبقى على كام كم؟ أو كام سنة؟

**mabdelaziz** · 05-05-2014 11:26 AM

المشاركة الأصلية كتبت بواسطة hisham farrag

طلمبة الباور فوق الدينامو
ممكن نستنتج ان كلام المهندسة صح بخصوص انه بيسرب زيت على الدينامو بالتالى ممكن يبوظه

أنا رحت لميكانيكى هنا معرفة يبص عليه, قلت له بس إن فى تسريب زيت مش عارف من إيه, مارضيتش أقوله على مشكلة حساس الباور عشان أعرف رأيه هو, قال برضه حساس الباور بيرشح وعايز يتغير.

إن شاء الله أجيب واحد جديد وأروح له يغيره

**mabdelaziz** · 05-05-2014 11:29 AM

المشاركة الأصلية كتبت بواسطة semsem8080

تغيير طقم السيور وبلي للسيور يتكلف بالمصنعية عند برازيلي عندك في اسكندرية 1400 بالزيت وفلتر زيت ممكن تكلمة
سعر طقم الكاتينة توكيل 670 جنيه
01001164880
01147663310

الله يكرمك يا سمسم

, أنا أول مرة أعرف إن برازيلى فى اسكندرية

طيب إنت غيرت طقم الكاتينة ولا لسه؟ ولو غيرته غيرته على كام كم أو بعد كام سنة؟

على فكرة أنا سألت فى التوكيل قال طقم الكاتينة ب 770 مش ب 670.

**city_ct** · 05-05-2014 06:32 PM

انا أيضا مرت على العربية 3 سنوات، و فى توكيل العبور مهندس الاستقبال قالى انه لازم تغير مجموعة الكاتينة اما على 60000 كم أو ثلاث سنوات و تكلفة تغييرة 1400 جنيه.
نصيحة غيره فى التوكيل لضمان التركيب و قطع الغيار و خاصة انها سيور الموتور.

**Super_Star_h** · 06-05-2014 06:11 AM

المشاركة الأصلية كتبت بواسطة mabdelaziz

أيوه فيه زيت بيسرب فعلاً أنا شفته, فى زى خرطوم كده راكب فى حساس الباور وعليه زيت شبه متجمد, مش حاجة بتسيل يعنى.

مش بلاحظ أى تسريب تحت العربية الحمدلله
بس على فكرة سير التقسيمة مش ب 120 جنيه, الأصلى فى حدود 700 جنيه من التوكيل

أنا عايز أعرف بس التغيير يبقى على كام كم؟ أو كام سنة؟

سير التقسيمه ب 700 جنيه لييييييييييييييييه ؟
انا كنت شاريه بحوالى 100 وحاجه فى اللوجان 2010
وركبته وميه ميه
انزل عند حد بتاع قطع غيار اصليه للرينو واشترى منه سير التقسيمه الاصلى وركبه بره متقلقش الموضوع مش صعب ولا حاجه
واللى هيركبهولك فى التوكيل ميكانيكى زيه زي اي حد مش خواجه جاي من رينو فرنسا

**mabdelaziz** · 06-05-2014 11:35 AM

المشاركة الأصلية كتبت بواسطة super_star_h

سير التقسيمه ب 700 جنيه لييييييييييييييييه ؟
انا كنت شاريه بحوالى 100 وحاجه فى اللوجان 2010
وركبته وميه ميه
انزل عند حد بتاع قطع غيار اصليه للرينو واشترى منه سير التقسيمه الاصلى وركبه بره متقلقش الموضوع مش صعب ولا حاجه
واللى هيركبهولك فى التوكيل ميكانيكى زيه زي اي حد مش خواجه جاي من رينو فرنسا

هو ده اللى قاله بتاع قطع الغيار فى فرع العامرية

بس فى سؤال هنا, تقصد إيه بقطع غيار أصلية من بره التوكيل؟ لو أصلية يعنى بتاعة شركة رينو يبقى مش هيكون فى فرق فى السعر, ماهو مش معقول شركة رينو هتدى لمحل بره بسعر أقل يخسر فروعهم ويوقف حالهم, وده فعلاً اللى لقيته لما رحت سألت فى محل الوشاحى عن قطع الغيار الأصلية, لقيت البوجيهات مثلاً فيها زيادة 10 جنيه عن التوكيل حتى بعد إضافة الضريبة.

لو أصلية لها معنى تانى ياريت تفهمنى عشان أستفيد

تحياتى