استفسار عن هوندا سيتى 2006 1500cc سعرها كام و ثباتها اخباره ايه و هى ولا نيسان 2007

**matawfeek** · 05-05-2014 12:03 PM

السلام عليكم و رحمة الله
انا عضو جديد نسبيا فى المنتدى و سبب دخولى عليه انى بحاول اشترى عربية بقالى 4 شهور
اولا انا بشكركوا على المنتدى الرائع ده و اللى بجد فكرته عبقرية

انا اصلا كنت من ملاك هوندا سيفيك 1997 lxi الاتوماتيك و هى دى العربية الوحيدة اللى سوقتها من 2001 لحد انهاردة

بيعتها لظروف كده ان انا من بورسعيد و العربية كانت منطقة حرة بورسعيد و انا شغلى حاليا فى القاهرة

طبعا عرفت اد ايه من كلام الناس و العامل النفسى ان ركوب الهوندا نقمة و نعمة فى نفس الوقت

اللى معاه اوكتافيا من زمايلى بييجى يفكر معايا اشترى عربية ايه و اول ما بيسئلنى كنت راكب ايه قبل كده و اقوله سيفيك 97 وشه يقلب و يكشر و يقوللى اخخ للأسف مش هاتعرف تركب حاجة ترضيك بعد كده

و فعلا انا نفسيا جربت حاجات كتير بعدها و مش مرتاح لحاجات كتير و خصوصا ان الفلوس اللى معايا بالعافية ممكن يبقوا 70 الف او 75 الف اقصى رقم

انا امبارح روحت شوفت هوندا سيتى 2006 1500 سى سى الفتيس التيبترونيك الاتوماتيك و المانيوال 7 سرعات و المفروض انها اعلى فئة . هى رشة من برة فى التوكيل و دواخل فبريكا و عدادها 150 الف كيلو . انا سوقتها بصراحة و حاسيت لما سوقتها ان العداد ملعوب فيه . مش ممكن يكون 150 الف دى اكيد عاملة 10 الاف بالكتير :)

العربية ناعمة جدا و ممتعة و صاحبها مهتم بيها و حتى بيحط زيت مستورد كده معرفش اسمه بيقوللى بيقعد 15 الف كيلو

هو بيقول اخره فيها 75 الف جنيه و انا حاسس ان السعر ده كتير قوى على سيتى رشة من بره و عدادها 150 الف فانتوا ايه رأيكوا؟

و بصفة عامة ايه رأيكوا فى السيتى الموديل ده لأن فى ناس كتير خوفونى منها و انها ضعيفة و مش عملية و قطع غيار غالية و نادرة و بالتحديد اكتر حاجة خايف منها الثبات على الطريق انا مهندس و بسافر بأسرتى كل اسبوع من القاهرة لبورسعيد - انا صحيح مش بجرى قوى و اخرى 120 او 130 لما اكون شادد قوى بس برده يهمنى ان العربية تكون ثابتة . بس خلى بالكوا برده انا مش متربى على الباسات ولا الاوكتافيا انا اساسا سواقتى السيفيك ال 97 .

برده عاوز اسأل عن الفتيس بتاعها الناس بتقول تحفة بس ممكن يبوظ بسرعة ايه رأيكوا؟

و يهمنى قوىىىىىىىىىىىىى اعرف سعرها الحقيقى ايه فوق السبعين فعلا ولا اقل من كده؟ و هل تقيلة قوى فى بيعها ولا كبيرها خسارة الف ولا الفين؟؟

فى عربيتين غيرها لسة ماشوفتهمش المفروض انهم فابريكا برة و جوة و عدادهم حوالى 90 الف بس للأسف لونهم مش اسود زيها :( و بيتكلموا فى نفس السعر او زيادة الف مثلا .

انا اسف انى طولت عليكما بس معلش انا اصلى بدور بقالى كتير و اخيرا لقيت العربية اللى عاجبانى بس الناس قلقتنى منها و ملقيتش خالص رابطة لملاك سيتى هنا و ملاقيتش مواضيع حديثة عن السيتى ال 2006 عشان اعرف منها اسعار او حاجة زى كده .
اخر سؤال . اجيبها ولا اجيب نيسان 2007 ؟

ارجو الافادة و على وجه السرعة عشان انا ناوى اشترى الاسبوع ده ان شاء الله
شكرا

**ameros** · 05-05-2014 01:24 PM

طب متجرب استرا جي اوتوماتيك cdx ثبات وقوه وفخامه وجري وراحه ونعومه وافضل كتير مالسيتي

**hamaka** · 05-05-2014 02:55 PM

معايا السيتى 2005 ال 1300 CC المانيوال
عيوبها :
1-ارتفاع نسبى فى أسعار قطع الغيار بس موجودة عادى فى أماكن كتير جداً أكترهم التوفيقية ،
2- الثبات ممتاز لحد 120 جيد جداً ل 140 سئ بعد ال 140 ،
3- الصالون وسعه متوسط مش بحر بس مش زنقة ،
4- مفيهاش عداد حرارة هى لمبة أخضر و أحمر ،
5- حوض الموتور ضيق جداً ،
6- التانك بتاعها سعته قليلة حوالى 40 لتر بالاحتياطى ،
7- فقيرة نوعاً ما فى ال options معرفش العربية اللى قدامك فئتها ايه بس اللى معايا مفيهاش ABS ولا Airbags ،
8- الشكل نسبى طبعاً فى ناس كتير مش عاجبهم شكلها بس بما انك بتقارن مع الصنى فا أكيد السيتى شكلها أجمل من وجهة نظرى

المميزات:
1- ناعمة جداً فى سواقتها و صوت الموتور يكاد يكون مش مسموع
2- استهلاك بنزين قليل جداً
3- شنطتها واسعة
4- تكييفها كويس قوى لو بحالته
5- سحبها ممتاز (نسبة لانها 1300 يعنى) و مواتير هوندا معروفة طبعاً ، أعتقد ال 1500 هتنفخ عربيات كتير 1600 من بتوع الكسر اللى مالى السوق دلوقتى
6- عالية عن الأرض (أعلى من عربيات سيدان كتير فى السوق)
7- اعتمادية و أعطالها بوجه عام قليلة بس لازم صيانة فى مواعيدها
8- الفتيس و الدبرياج (اللى معايا Manual ) ناعمين جداً ، مجربتش الأوتوماتيك بس كنت سألت عليه و أنا بشترى و عرفت انه محترم جداً و قليل الأعطال لو بحالته و متلعبش فيه
9- العفشة جيدة جداً من ناحية الراحة لو بحالتها بس برضه النقطة دى بتعتمد على مستوى عفشة العربية السابقة اللى انت كنت متعود عليها ، بس هى عموماً أحسن من عفشة الصنى من حيث الراحة و أقل من حيث الثبات..

يا رب أكون قدرت أفيدك و ربنا يوفقك لما فيه الصالح و الأفضل تستخير ربنا قبل القرار....

**semsem85** · 05-05-2014 04:03 PM

انا بقي معايا 2004 اوتو 1300 سي سي عربية ما شاء الله جيبت بيها لحد 180 3 او 4 مرات واصلا الطرق مش هتساعدك لكن سفرت بيها مرة لحد 130 ومشغل التكيف وكانت الحمد لله كويسه ولا اكاد احس ان التكييف اثر علي السحب وكنت محمل الشنطة علي الاخر وعلي فكرة شنتظها كبيرة جدااااااا والمفاجأة موفرة جدا في البنزين مع الاوتو علي ما اظن عملت وقتها لحد مافولت 600 كيلووو قطع غيار متوفرة وممكن اقولك عند مين موضوع غالية ولا رخيص تعتمد انت كان معاك ايه قبلها بس اقدر اسمعك شوية حاجات المقص ب 350 تيواني قعدت ماتور اصلي 550 وفي اقل في السعر بلية عجل 350 يباني بارات ب 450 يباني بيض مقص 75 تيل ب 200 اسباني يعني بص سوق العربية لو عجبتك توكل علي الله

**ahmedabeed** · 05-05-2014 06:43 PM

باشا انا معاى اختها بس 2007
العربية حلو جدا بكل المقاييس
ناعمة جدا
قوية العربية 1500 بيطلع 118 حصان vtec يعنى مع التكييف برده السحب كويس
الجنوط اسبور مقاس 15 يعنى ثبات اعلى شخصيا بجيب بيها 150 مستريح ومن غير تعويم
التحكم فى القيادة منوال او اوتو اوبش هايل عشان توفير البنزين والاستمتاع بالقياده
قطع الغيار موجوده خصوصا انت من بورسعيد والاسعار يعنى هى كدا اسعار اليبانى عماتا
اما اعادة البيع فالعربية ليها ناسها بس هى تقيلة حابة عشان تبقى عارف بس لو ناوى تبيع على طول وصدقنى مش هتفكر تبيع بالسرعة ديه بالذات لو جربت فبلها كورى او غيره لانك مش هتلاقى عربية ناعمة وعفشة طريه زيها
السعر غالى حبه اعتقد ميعدش ال 70 بالنسبة للعداد وانها رشه
وربنا يرزقك الخير

**Dr__Ahmed** · 05-05-2014 11:41 PM

والله يا باشا انا بدور على موديل 2006 ده بالذات بقالى فتره
رينج الاسعار متعديش 63 الف زى ما ( م/ سامح ) قالى
انا شايف 75 ده كتيير على الموديل ده
((لو على السعر العالى ده ..الواحد ممكن يجي على نفسه شويه ويجيب الشكل الجديد 2010
حتى العربيه منظر من بره وتشرف الصراحه))

انا مرتاح للعربيه دى جدا ومصمم عليها بس كل واحد ماسك فى سعر عجيب
واللى مريح فى السعر تلاقى فى مشاكل ( وإن كانت بسيطه ) فى عربيته
انا بدور على واحد يكون متابع صيانتها فى التوكيل وتكون ومش معديه 100الف عشان انا بسافر زيك
بس صعب الاقى بقى بعد كل المواصفات دى

انا عايز اقترح على الاخوه الهونداويه .. لو حد يعرف سيتى تكون تمااام
يرشحهلنا ونخلص مننا فينا كده :)

**matawfeek** · 06-05-2014 03:41 PM

اولا شكرا جزيلا لحضراتكم كلكم كل اللى رد و كل اللى صوت

انا ماعرفش حاجة عن الاسترا اللى حضرتك بتقول عليها لو حضرتك عندك تفاصيل اكتر عن الموديل و السعر يا ريت تعرفنى و شكرا لرد حضرتك.

انا تقريبا مرتاح قوى للسيتى حتى انا سوقت الصنى 2006 و كانت خليجى بس ماتبسطش قوى و شغلت التكييف على مطلع حسيت ان العربية هديت قوى بعكس السيتى اللى سوقتها كنت حاسس انى سايق زيرو . هو الموتور الفى تك بتاعها بصراحة جبار

معلش انا برده موضوع السعر ده ملخبطنى جامد هل ممكن تكون غليت مثلا فى ال 3 اسابيع اللى فاتوا؟

اصل ليا واحد صابى جابها ب 61 يوم 1 ابريل بس بصراحة طلعت فيها حاجة فى الشاسيه و رجعها على طول تقريبا بس هو بيأكدلى ان هو ده سعرها.

اللى قدامى دلوقتى 4 عربيات

الاولى اللى جربتها اللى رشة و عاملة 145 الف كيلو صاحبها بيأكدلى انها جابت 75 الف بس البيعة مامشيتش عشان المشترى اتزنق فى الفلوس و هو متأكد انها هاتجيب السعر ده تانى ( الصيانة فى التوكيل و الدهان كمان كان فى التوكيل)

التانية فى اسماعيلية فابريكا عدا اكصدامين و مراية فيها مصاريف بسيطة كوبلين و جوان كرتيرة و ماشية 92 الف و صاحبها اخره 76 الف ( الصيانة كانت فى التوكيل بس صيانة ال 90 الف معملهاش)

التالتة فابريكا كلها استعمال سيدة 80 الف و مطلوب 76 الف ( الصيانة كانت فى التوكيل )

الرابعة فابريكا عدا الاكصدامين ماشية 103 الف و مطلوب 73 الف و تقريبا فهمت منه ان السعر قابل للتفاوض ( الصيانة كانت خارج التوكيل )

سؤالى لحضراتكم و بالذات للى معاه الموديل ده زى الاستاذ احمد عبيد
انا قلقان من الرابعة دى عشان سعرها اقل بس هاروح اشوفها ولا ايه رأيكم؟

التانية اللى فى اسماعيلية الراجل بصراحة امين جدا جدا و قاللى قبل ماتيجى هاقولك على المشاكل اللى ملاحظها و قاللى انا بدأت احس بنتشة خفيفة فى الفتيس و انا طالع على الاول و مش عارف اذا كانت وساخة بنزين ولا عشان البوجيها عاوزة تتغير اصل بصراحة التوكيل كلمنى عشان صيانة ال 90 الف و انا ماروحتش
فأيه رأيكوا؟ هل فعلا ممكن يكون ده السبب ولا الفتيس هو اللى بيشيع اصل فى ناس كاتبين انه فتيس حساس و ممكن يبوظ من الاهمال. اصلى بصراحة مرتاح جدا للمهندس بتاع اسماعيلية ده و نفسى اخدها منه عشان امنته بس قلقان يطلع الفتيس بايظ.

شكرا و اسف على الاطالة

**Martin5555** · 07-05-2014 10:14 AM

بص يا باشا انا لسه بايع عربيتي الهوندا سيتي 2005 أتوماتيك cvt يوم الاحد الاسبوع ده ، الهوندا بصراحة عربية ممتازة ، انا مشفتش فيها اي عيب ، وبالنسبة لقطع الغيار موجودة ومتوفرة ولو اسعارها اعلى شوية ، بص كفاءتها كويسه
اخيراً بالنسبة للسعر ده غالييييييييييييي أول عليها

**tito32** · 07-05-2014 10:35 AM

استخير ربنا وخد اللى انت مرتحاله

**Welsherif** · 07-05-2014 11:04 AM

انا معايا سيتى 2006 عاملة 11000ك فابريكا برة و جوة و راشش الاكصدام للنضافةوشاريها زيرو و اتعرض عليا 75000 فيها و رفضت لانى لما قرنتها بعربيات زيرو 2014 فى حدود 110000ج اكتشف ان عربيتى جوهرة لن تعوض