الموضوع: جيب شروكى 2008

العفو يا أستاذ أحمد واسف على التأخير فى الرد
بالنسبة لأكثر عيوب العربية دى هو إن بويتها مش مخدومة قوى والسنسورات الموجودة فيها كتيرة بس كل مشاكلها بتتحل بسرعة ومش بتحصل كتير .... المهم تكون واخد عربية نضيفة وفرشها من جوة نضيف ( ده دليل على إهمال أو حرص المالك السابق) وتكشف عليها كمبيوتر فى التوكيل علشان يدولك تاريخها.
أهم حاجه يكون الفتيس والكورونات سليمة وده حاتعرفه من التوكيل أو من التجربة حتلاقيها بتنقل بنعومة ومش بتعض أو تعلق فى النقلات وكمان مافيش صوت عالى من الكورونات ( لاحظ إن بيبقى فيه صوت ونه رفيعة فيها ده العادى بتاعها على سرعة تقريباً ٤٠ أو ٥٠ كم/ساعة)
إستهلاك البنزين بتاعها ممكن يبقى كبير جداً لوسقتها زى مابتسوق أى عربية ـ العربية دى عاوزة سواقه مختلفة شوية خصوصاً فى دوسة البنزين لازم تدوس على البنزين بالراحه وهى هتتسارع معاك من غير ماتفضل تدوس على الدواسة للأخر . كمان تغيير البوجيهات والزيت بيفرق مع العربية دى كتير جداً ولازم بوجيهاتها مش اى واحد حاطط علامة جيب يبقى البوجيهات اللى يديهالك تركبها . لازم تكون عارف رقم البوجيه حسب ماركته ولو ربنا كرمك واشتريت عربية من دول انا حانشر ارقام البوجيهات حسب ماركة البوجية.
صيانتها مش مكلفة ومتتخضش لأن معظم اللى بيحصل فيها أنوار أعطال بتاعة السنسورات أنا لسه من إسبوع نورت عندى لمبة الإيرباج وبعدين روحت لكهربائى عنده كمبيوتر أعطال كشف عليها وظهر العطل إن فيشة الإيرباج إللى تحت كرسى السواق فيها مشكلة روحت للكهربائى قلتله يفك الفيش إللى تحت الكرسى ويركبها تانى وفعلاً اللمبة انطفت . الكشف بتاع الكمبيوتر كلفنى ٣٠ جنية والكهربائى اخد ٣٠ جنيه هو كمان.
يعنى حاجات من هذا القبيل ومش بتحصل كتير . ساعات تانية بيبقى سنسورات باظت بتبقى لازم تتغير بس أنا الحمدلله معرفش اسعار السنسورات بكام لأنها لسه مبظتش عندى :)
صيانتها الدورية الزيت وده موبيل ١ وبتاخد جركن وشوية يعنى أول مرة تغير زيت تجيب جركنين تحط جركن وكيلو تقريباً من التانى وتشيل الباقى والمرة اللى بعدها تجيب جركن واحد بس .
البوجيهات فى حدود من ١٦٠ إلى ١٨٠ جنية الطقم (٦) بوجيه
فلتر الزيت فى حدود ١٢٥ جنيه
فلتر الهوا ١٠٠ جنيه
الأسعار دى ممكن تلاقيها أغلى او أرخص حسب جودة الحاجة اللى بتشتريها
تيل الفرامل قدام تقريباً ٤٥٠ جنيه ( انا مش فاكر قوى بس بتقعد متير قبل ماتغيره)
الطنابير لازم تغيرها كل حوالى ٣٠,٠٠٠ كم وسعر الجوز فى حدود ٨٠٠ جنيه

وتحت أمرك فى أى أسئلة تانية
ملحوظة : أنا العربية اللى معايا ٢٠٠٩