الموضوع: Opel Astra Sedan Cosmo 2014 VS Ford Focus 2015

المشاركة الأصلية كتبت بواسطة yasser100

انا عن نفسي مش من هواة الزراير الكتير بس طبعا دى اولا و اخيرا اذواق . يعنى لما كنت باشترى من شهر عجبنى جدا البساطه فى تابلوه الفلوينس برغم وجود كل الاوبشن و بزياده قوى تحت ايديك قد تكون اوبشن اكتر من الفوكس بس ببساطه و ركبت ساعتها الفوكس علشان اتفرج لانها كانت فى رينج الفلوينس بس اتصدمت بزحمة التابلوه الشديده برغم شياكته و العنايه الشديده فى تنظيمه بس انت بتقول همه فعلا خدوا الموضوع ده فى الاعتبار فى الفيس ليفت . اعتقد انها هاتكون جديره بالانتظار بس ربنا يقدرك على السعر وقت نزولها :) . لانى برضه لما انا انتظرت الفيس ليفت فى الفلوينس نزل زياده حوالى 40000 جنيها

انا بفكر فعلا فى الفلونس تخش فى المقارنه بس لا سوقتها ولا اعرف عنها حاجه ده غير انى واخد جنب اوى من ماركت رينو بشكل عام

يريت تحكيلى عنها اكتر وعن الابوشن وسعرها الحالى

المشاركة الأصلية كتبت بواسطة ahmedshawki

انا بفكر فعلا فى الفلونس تخش فى المقارنه بس لا سوقتها ولا اعرف عنها حاجه ده غير انى واخد جنب اوى من ماركت رينو بشكل عام

يريت تحكيلى عنها اكتر وعن الابوشن وسعرها الحالى

انا كنت زيك كده برده و الرينو بره دماغى , اعرف انها ماركه فرنساوى محترمه و فخامه و برستيج يعنى تقابل الاوبل و الفورد و البيجو و الاوكتافيا و كنت اسمع انها قطع غيارها غاليه و صيانه مش اى حد يفهم فيها و تعقيد ما لوش نهايه , خصوصا فى موديلات الميجان برغم انه الميجان كانت بتعجبنى شكلا اول ما نزلت , بس التوكيل بوظ سمعة الميجان و الرينو لانها اول مانزلت كانت نازله بتكنولوجيا عاليه جدا و حساسات مش موجوده غير فى البى ام و المرسيدس و التوكيل كانوا بطيخه فيها و مش فاهمين فيها حاجه , المهم انا كان معايا اوبترا و كنت قررت انزل من الكورى للفرنساوى او الالمانى او اليابانى , بس كانت دايما مشكلة الاوروبى الاعتماديه مش قوى , الاوروبى طول عمره كويس فى الامان و الثبات بس اعتمادية المواتير و الفتيس لا , اتفرجت على كل العربيات اللى انت بتقارن بها الاسترا , الفوكس , الكورولا و الفلوينس , الفلوينس كانت بتعجبنى لما اشوفها فى الشارع كعربيه عائليه و عريضه و عاليه عن الارض و بريستيجها بس ما كنتش اعرف حاجه عنها تابعتها لاكتر من 6 شهور و عرفت انه الفيس لفت بتاعها نازل بموتور نيسان 1600 و فتيس cvt xtronic و تكييف نيسان نفس موتور و فتيس القاشقاى و الجوك , رينو و نيسان شركه واحده , يعنى اخدت اعتمادية اليابانى و رفاهية الفرنساوى انا اشتريت الفئه ال e3sr اللى هيه ب 180000 و فيه اعلى منها طبعا عجبنى فى العربيه بساطة ووسع الصالون و فخامته و لك ما تتخيله من اوبشن بدون تعقيد او زراير كتير و قصص وهميه و ده كان الفيصل بالنسبه لى بينها و بين الاسترا و الفوكس و الاوبشن لانى زى ما بقول لك مش باحب الزحمه فى تابلوه العربيه و حتة وهم الاحساس انك قاعد فى طياره :
1- سمارت كى , كارت ما فيش كونتاكت يعنى مع نظام ايموبلايزر ضد السرقه
2- كمبيوتر كامل للاعطال يعنى يديلك رسايل مقروءه عن العطل الموجود و رسايل تذكير للصيانه و تريب كمبيوتر كامل برضه .
3- تكييف تاتش ديوال زوون مع وحدة تكييف خلفيه و تبريد فى درج التابلوه
4- حساسات مطر و اضاءه و فوانيس اماميه ليد
5- مكن رفع للاربعه زجاج عند القفل بالريموت
6- مرايات كهربا للاقفل و الفتح عند استخدام الريموت و يمكن قفلها و فتحها برضه من الداخل
7- الاربعه زجاج الكهربا يمكن فتحهم و قفلهم بالكامل من لمسه واحده لزرار كل زجاج
8- بصمه فى اكرة كل باب من الاربعه للفتح و القفل بدون ريموت , بمجرد الاقتراب من العربيه
9- بلوتوث من الجيل الحديث للتعرف على 5 اجهزه مره واحده بما فيهم التليفونات طبعا للرد و الاتصال
10- عدادات ديجيتال بالكامل من الجيل الحديث
11- امكانية تحريك عدسات الفوانيس الاماميه لظبط ارتفاعها على حسب الطريق , 4 درجات
12- ستائر مدجه للبابين الخلفيين و الزجاج الخلفى
13- كاسيت تاتش usb , aux , dvd مع نظام صوتى 3D حديث من شركة Arkamys الفرنسيه و 6 سماعات
14- خاصية hill assist عند القياده فى الطرق المرتفعه و المنحدره
15- خاصية اضاءة انوار السياره كلها من الكارت من على بعد لمعرفة مكان السياره فى موقف سيارات كبير و مزدحم
16- مثبت سرعه و مثبت كروز
17- دريكسيون مالتى فانكشن و ريموت خلفه للتحكم الكامل بالكاسيت و التليفون
18- فرش نص جلد و نص قماش بالنسبه للفئه بتاعتى و دريكسيون مغطى بالجلد و بالخياطه و كذلك الفتيس , الفئه الاعلى جلد بالكامل
19- نواكل فى الابواب من الداخل و الدريكسيون و الفتيس
20- جنوط 16 و فتحة سقف و سينسور رجوع خلفى مع ظهور ابعاد العربيه و المسافات بينها و بين اللى وراها على الشاشه عند الرجوع للخلف
21- شاشه خاصه بالكاسيت لاظهار الساعه و درجة الحراره و اسم التصل او اختيار اسم من سوف يتم الاتصال به مع سعه تخزينيه لتخزين الاسماء من على التليفون للسياره
22- خاصية follow me home
23- الفرامل abs , ebd , abd
24- خاصية ال anti pench يعنى لو حد ساند على زجاج الباب بايده او راسه و انت بتقفل الزجاج و مش واخد بالك بيحس به و يرجع تانى و نفس الموضوع فى فتحة السقف

ده اللى انا فاكره بصراحه و فيه حاجات تانيه مش فاكره :) بس هيه ما فيهاش نظام ebs اللى هو نظام مساعد فى الاتزان فى المنحنيات او التعويم فى العربيه طبعا لتقليل التكلفه فى السعر
الفوكس كانت تانى عربيه مرشحه بالنسبه لى لو ما اشتريتش الفلوينس و اعادة البيع مش فى صالح الاتنين قوى و ان كان الرينو لها فرص بيع اكتر شويه من الفوكس و اسعار الفلوينس الموديلات السابقه كويسه غير الميحان خالص .
اتمنى اكون افدتك بس هيه اذواق اولا و اخيرا و بما انك منتظر الفيس ليفت للفوكس يبقا عندك فرصه تشوف و تقارن اكتر بس خللى بالك من الاسعار الفتره الجايه خصوصا انه الفيس ليفت بينزل اغلى بفرق محترم
بالنسبه للتوكيل حاليا من احسن التوكيلات الموجوده فى السوق نسبيا و قطع الغيار و الصيانه نفس اسعار السيارات اللى فئتها , يعنى مش غاليه بالنسبه للفئات اللى فى حدود ال 200000 جنيه

المشاركة الأصلية كتبت بواسطة برنس الليالي

فيه نتشة على اول سرعتين
في واحد عامل بالفوكاس 2012 عداد جامد 60 الف ومفيش مشاكل

ربنا يسهل ينزل الفيس ليفت بتاعها ونشوف الموتور

هيبقى اختيار صعب بصراحه

المشاركة الأصلية كتبت بواسطة ahmedshawki

ربنا يسهل ينزل الفيس ليفت بتاعها ونشوف الموتور

هيبقى اختيار صعب بصراحه

لا أظن إن الموتور والفتيس حيبقى فيهم تغيرات