الموضوع: تقرير اول 15 يوم اوبل فيكترا 1997

المشاركة الأصلية كتبت بواسطة Ahmed adel 23

السلام عليكم ورحمه الله وبركاته
معلش بقى استحملونى التقرير طويل شويه ارجو قرائته علشان فى استفسارات فى النص وشكرا مقدما
اولا باركولى انا الحمد لله ربنا كرمنى وجبت اوبل فيكترا 1997 حالتها الحمد لله تمام والتكيف شغال كع انى ليا تعليق عليه
والحرارة. مظبوطه مع انى ليا تعليق تانى عليها
والمتور تمام الحمد لله
وطبعا لازم اشكر استاذ فادى لانو ساعدنى فى الموضوع دة لما وريتو صور العربيه طمن قلبى بس قالى لازم اكشف عليها والحمد لله
مبروك وربنا يكرمك فيها ان شاء الله
وطبعا شكر لكل الجروب اللى مليان بناس ما شاء الله عليهم خلانى جمعت معلومات كويسه عن العربيه وقررت اشتريها بدل الكرستاله
المهم تقريرى بقى عن ال 15 يوم اللى فاتو مع العربيه
حالتها كويسه والعفشه بجد بقيت احترم العربيه لانى قبلها كان معايا 128 فطبعا حسيت بفرق
العربيه ناعمه معايا وباور وثبات ما شاء الله الالمانى فعلا ركوبه وبقيت شايل الهم انى هركب ايه المانى بعدها رغم انى مكنتش بقتنع بشركه اوبل عموما
العربيه من 0 الى 60 بطيئه نوعا ما بس لما بعوز اسرع شويه بحرق على الاول وبخلى الاربى ام يوصل ل 4 ونص وبعدها بجيب التانى. بتبقى اسرع شويه بس بقى بعد ال 50 العربيه ما شاء الله سحبها كويس اوى وبتجرى بثبات
ده طبيعي لان وزن العربيه تقيل ( 1245 كج)
اقصى سرعه جبتها بيها كانت 140 ومزودتش لانى لسه متعودتش على العربيه اوى ومختبرتش فراملها هتسعفنى ولا لا والطريق مخدمنيش اوى بس لما جبت ال 140 الحمد لله حسيت بالثبات
بدى غيارات كالتالى من صفر الى 20 دة الاو ل
ومن 20 الى 40 او 50 دة التانى ومن 45 الى 65 دة التالت وسعات بزود مع التالت لل 80 وبعدها بجيب ال رابع وافضل بيه لغايه ال 120 واجيب الخامس. بحاول على قد ما اقدر اخلى الاربى ام على 3 وميزدش
حد يقولى بقى اللى بعملو دة صح ولا فى تعليق
تمام . قاعده اساسيه انقل علي 3 ار بي وبس
نيجى للفرامل انا عاوز اعرف الفرامل على سرعه كام ابقى فى الامان والحق نفسى
مفيش قاعده معينه حسب حجات كتير حاله العربيه وظروف الطريق وطريقه تعاملك مع الموقف
انا عامه مبدوسش الفرامل للاخر اوى فبحاول اعمل حسابى فى مسافه بينى وبين اللى قدامى
بس لما باجى افرمل بسمع صوت زى مكنه بتشتغل انا بتوقع ان ده ال ايه بى اس
هو ده الايه بي اس
انا اصلا فى مشكله فى لمبه ال ايه بى اس سعات بتنور وسعات بتطفى لوحدها معرفش من ايه
فى حاجه ساعات بتحصل لو فرملت جامد فجاة لانى ظهر قدامى مطب او لاى سبب بحس كان الفرامل بتقاومنى كان البدال بتاع الفرامل بيضرب فى رجلى
الايه بي اس بيشتغل
التيل اللى قدام شمال بيصفر مع الفرامل القويه شويه
نيجى للعداد الحمد لله كلو شغال بس شاشه البيانات فيها بعض النقاط مش شغاله
وكان عندى سؤال فى عداد الكيلومترات سرعه 50 عاملينها لونها احمر دة ليه ?
نيجى للحرارة العربيه الحمد لله ثابته عند 92 ساعات بتزيد ل 95 وبترجع تقل تانى ل 85 بس فى تعليقين انا مش عاجبنى الحرارة كدة عاوزها متعديش ال 90 وكمان المايه بتنقص كل اسبوع او 5 ايام وبزودها
المشكله بقى فى التكيف لما بشغلو على 4 الحرارة بتعلى اوى وبتوصل ل 98 وبتقل لو مشيت هادى من غير شد ومرة وصلت ل 102 وطبعا انا اتخضيت وركنت وقفلت التكيف علشان تهدى لقيتها دقيقه بالظبط وهديت ل 85
اعتقد ان الحرارة كدة تمام بس انا عاوز اقلل الحرارة فى الطبيعى على 90 وبالتكيف 92 حد اقصى
الحراره عندك عاليه ..طالما الميه بتنقص يبقي في تسريب لازم تعالجه..ظبط دوره التبريد لانها روح العربيه وشوف المراوح بتشتغل عند درجه حراره كام وسرعه ايه؟ لو سيبتها كده لا قدر الله ممكن تاثر ع جوان الوش
نيجى للتكيف انا غايظنى لانى بحس انو مبيسقعش اوى يعنى ببقى عاملو على 4 ومثبت الهوايات عليا الاتنين والدنيا بتبقى معقوله بس مش ساقعه واللى ورة مبيوصلهومش اصلا واول ما اطفيه بس لسه مفتحتش الازاز الاقينى حسيت بصهد معرفش دة من ايه بس لو بالليل ومشغلو على 2 بحس بالتكيف شويه كويس
كنت ناوى انى ان شاء الله اروح للاستاذ طنانى بنضفلى دورة التبريد والتكيف يظبطهولى ان شاء الله بس اول الشهر
فى حاجه عاوز اسال فيها هو المفتاح الايموبلايزر اعرف ازاى انو مش متشال وشغال بالمفتاح من غير الشفرة والريدر بتاعها ? ياريت حد يفيدنى اعرف ازاى
هات ورقه فويل من بتاع المطبخ ولف فيها المفتاح وخرج منها بس سلاح المفتاح ودور العربيه . لو دارت يبقي شريحه الايموبلايزر مش موجوده . اما لو دارت وطفت علطول يبقي الايمو. موجود
وبالنسبه لاستهلاك البنزين اول مرة فولت 33 لتر وكنت عملت 293 كيلو من اخر تفويله
والتانيه 37.8 لتر فى 348 كيلو
وتالت مرة 40 لتر وعملت 307 كيلو كدة
الاستهلاك كويس ولا لا مع العلم انى ساعات بشغل التكيف وساعات بقرص شويه
الاستهلاك عالي , انت عملت سرفيس للموتور ولا لسه؟
سؤال كمان بقى امتى فلتر التكيف بيبقى شغال لانو مش بيبان على الزرار بس لما بدوس على الزرار قوة اندفاع الهوا بتزيد وهو التكيف على الرابع فكدة يبقى شغال ولا لا
قصدك علي خاصيه الريسيكل.. لمبه البيان بتاعه المفتاح بتاع الريسيكل عندك محروقه بس الخاصيه بتشتغل طالما اول مابتدوس عليه صوت المروحه بيعلي
الاهم بقى امبارح وانا ماشى على الدائرى عملت حادثه بسيطه وانا ماشى على ال 80 ظهر قدامى الرصيف اللى بيفصل بين نزله يمين كدة والطريق الدائرى ففرملت ورميت شمال علشان اخلينى على الدائرى ومنزلش النزله المهم ملحقتش والعجله اللى قدام لبست فى الرصيف وبعدها طبعا كنت مفرمل فهديت العربيه ووقفت بقى ببص على العجله لقيت الجنط اتنى قولت الحمد لله انى نزلت سليم وركبت الاستبن وكملت طريقى لاحظت ان فى صوت صفارة فى العجله لو شعرت فرامل يعنى دوست براحه اوى الاقى فى صوت صفارة ففضلت على كدة لغايه ما روحت وكلمت الاستاذ طنانى راجل بجد منتهى الاخلاق وقولتلو فقالى اروح لاى بتاع ترصيص وظبط زوايا وبعدها اعدى عليه نشوف المشكله
لو صوت الصفاره مستمر ولما تشعر فرامل بيخف او يروح يبقي صره العجله اتعوجت ( من الخبطه في الرصيف) هتغير الصره بالبليه . طالما هتتعامل مع طناني يبقي اطمن . ماتسالش عن مشاكل . لما ترجع من عنده بس ادينا التقرير
وان شاء الله والدى هيعدى عليه النهاردة لانى معرفتش اخد اجازة فوالدى هيروحلو هو وربنا يكرم
وشكرا واسف جدا جدا على الاطاله

سرفيس الموتور ..بيتعمل لاي عربيه مستعمله تكون لسه شاريها..بتغير حجات وتكتبب في نوته صغيره غيرت ايه ؟ والعرببيه كانت عامله كام كيلو متر؟ علشان الصيانه اللي بعدها تكون محسوبه وكل شيء بنظام. اللي بيتغير في الموتور..
-سير كاتينه وسير دينامو
-بوجيهات وفلتر بنزين
-زيت موتور وفلتر زيت
-تنظف دوره التبريد وتحط ميه خضراء ( بعد معالجه التسريب)
دي الاساسيات..
في حجات تانيه ممكن تظهر وتحتاج تغيير وانت شغال زي بليه شداد
او جوان وش تاكيهات او اويل سيل اسبراتير....وهكذا بس الاساسي
هو اللي فوق ده للموتور بس
- العفشه بقي مابتغيرش فيها الا لو في مشكله بتحتاج تكشف عليها ككل
واللازم يتعمل . بس اعتقد انك محتاج تغير تيل فرامل امامي وموضوع صره العجل
علشان تستمتع بعد كده بالعربيه. هتلاقي عربيه تانيه خالص