المشاركة الأصلية كتبت بواسطة أبو صلاح
الله ينور عليك
واضح يا استاذ minicooper20 انك شغال في شركة كبيرة ومحترمة
وده باين من كلامك في اكتر من موضوع عن الشغل في السعودية
لكن عايز اقولك مش كل الشباب بنفس خبراتك ومكانتك ومش كل الشباب بيتعرض عليهم وظائف من شركات لان اغلب المعروض مؤسسات وهنا بقى انت وحظك وبرضه تاخد حذرك يعني نسال كويس عن الكفال ونظام الشركة
انا ما انكرش ان في قصص تشيب وفي مآسي
لكن الفترة الاخيرة شوية الوضع بقى احسن
انت متابع تطور نظام العمل هنا في الفترة الحالية؟
عموما بعض الايجابيات اللي حضلت في الفترة الاخيرة من وجهة نظري كالاتي :
1- مش هتاخد التأشيرة على الباسبور بدون ماتقدم عقد عمل موثق للسفارة السعودية في مصر وكل عقد وكل وظيفة ليها شروطها والحد الادنى للراتب- ده مكانش بيحصل قبل كده وكانت الناس بتيجي بدون عقود وتلبس في الحيط
2- في حالة ان الشركة نطاق احمر يعني لا تلتزم بقانون السعودة تنقل كفالة فورا من عليها دون موافقة الكفيل وتجمد جميع مصالحها في مكتب العمل والجوازات
3- في حالة عدم استلام الراتب لمدة 3 شهور يحق لك فورا نقل كفالة بعد الشكوى في مكتب العمل مع الاحتفاظ بحقك في المطالبة بحقوقك من الكفيل القديم - وحقك هيوصلك اكيد بس محتاج شوية صبر - دي تجربة واقعية انا عيشتها هنا مع صيادلة
4- في حالة رفض الكفيل تجديد الاقامة لمدة شهر بعد انتهائها تنقل كفالة فورا دون موافقته ايضا مع الاحتفاظ بكافة حقوقك ومتطلباتك
5- السماح بتغيير المسمى الوظيفي للمهن ده حل مشاكل كتيرة جدا خصوصا في استقدام الاسرة والزيارات العائلية - بس صراحة المصري هو اللي بيرخص نفسه لما يكون مهندس ويوافق يجي على وظيفة عامل مواشي
6- القانون الذي يناقش حاليا انه بعد انتهاء مدة العقد يحق للعامل نقل كفالة بدون موافقة الكفيل الحالي بشرط توفر تاشيرة لدى الكفيل الجديد وفي حالة عدم وجود عقد يعتبر نهاية ترخيص العمل هو نهاية مدة العقد
عموما الروتين والاجراءات هنا شوية طويلة ومملة ومحتاجة صبر وهتاخد حقك بامر الله بس عموما خلي هدفك الاول في حل اي مشكلة هي الود والتراضي مع بعض التنازلات البسيطة
اخيرا عايز اوضح شيء
قبل كل شيء ده توفيق من عند ربنا
ماترخصش نفسك وتقبل باوضاع مهينة
عقدك تكتب فيه كل شيء بالتفصيل الممل لانك مش هتاخد غير ده
اقرأ قانون العمل السعودي كويس
اسال عن الشركة كويس قبل ماتشتغل فيها سواء مؤسسة او شركة