الموضوع: جوان وش كورسا 2005 عند طناني

انا معايا كورسا 2005 وجابت جوان وش السلندر لاسباب مش هتكلم عليها هنا عشان انا عامل الموضوع ده لشكر استاذ محمد طناني بس و اقول علي تجربتي مع المركز المحترم ده

اولا انا اخدت معاد الساعه 12 واخدت اجازه وصلت 11 قدام المركز واستنيت لحد 12:30 لما فتح و دخلت مكانش طناني جاي غير علي 3 ظهرا


محمد الصنايعي شاب صغير كنت قاقان منه بس بصراحه استاذ في الفك والتركيب و الشغل عموما سألني ايه اللي بيحصل بالضبط و حكيتله كل حاجه قاللي طب نبص يمكن مش وش سلندر و قعد يتشقلب فوق و تحت العربيه وبعدين قاللي كده مفيش تسريب خالص نبدأ نشتغل في الوش ولا مش جاهز. قولتله اتكل علي الله واشتغل

محمد ده مؤدب جدا و مابيضيعش وقت اشتغل في ساعتها هو والمساعد معاه وفضل شغال في العربيه لحد ماقفلها بس قبل مايقفلها طلب اكل ومكانش فعلا اكل من الصبح 20 دقيقه بالظبط و رجع يكملشغل

استاذ طناني وصل 2:30 و اول مره اتشرف بمعرفته. راجل محترم ودمه خفيف و يتعامل معاك كانه يعرفك من زمان و يحسسك ان المركز بتاعك. اساله في اي حاجه بيرد مش يفضل يشتغلني. وكل نص ساعه يقوم يتابع الناس وصلت لفين في الشغل يبص بنفسه علي الحاجه. و كلمني تاني يوم يطمن علي الشغل وانا ملحقتش ارد و كلمته بعدها

المركز بقي مكتب طناني اللي العملاء بيستنوا فيه مكيف و في واي فاي و lcd , وطبعا حمام

تقييمي العام بقي:
الناس كلها فاهمه شغلها و محترمين جدا و مابيتاخروش في الشغل و قفلولي الحوض احسن من الاول كانه فابريكه و طبعا غسلي الموتور حلو جدا
المركز والاجهزه معرفش اقيمها بس طبعا يتفوق علي صابر في رابعه و الشيخ هيثم في الحرفيين ان فيه مكان انتظار للعملاء و يتفوق في المعامله كمان و سعر المصنعيه طبعا.
انما الشغل نفسه مش هحط مقارنه بينهم عشان طناني يعرفهم شخصيا فامش لازم احرج حد و انا كمان مش متخصص اوي

في النهايه اشكر طناني باشا و يارب يفضل متابع الناس علي طول بنفسه ويبقي اكبر مركز اوبل في مصر ان شاء الله
وانا عن نفسي مش هروح بعربيتي غير ليه و انا من مدينه نصر و اي حد تاني اقربلي

و احب اشكر الناس اللي كملت الموضوع لاخره عشان انا معملتش مواضيع قبل كده و ضعيف و ممل اوي في موضوع الكتابه والتعبير ده

والله انا روحتله من سمعته علي المنتدي والراجل بجد عند حسن ظن الناس بيه و يمكن اكتر من الكلام