أعتقد أستاذ محمد النجار ميقصدش يقارن الكورولا بالفئات السعرية الأعلى. على حسب فهمي هو يقصد لما تركب كورولا أو حتى عربية في نفس الفئة السعرية والأوبشنز لما تيجي تطلع منها لحاجة أعلى عشان تحس بفرق لازم تطلع كتير يعني مثلا لونقلت منها لفئة ال ٢٥٠ ل ٣٠٠ هتحس بفرق آه بس مش إللي يوازي فرق المبلغ لا زم تتخطى حاجز ال٣٠٠ ل ٣٥٠ ألف عشان تحس بفرق حقيقي يستاهل دفع مبلغ زي ده فعربية.
بص هي العربيات أذواق وإرتياح نفسي وثقافة كمان. أنا عن نفسي أترعب إني أركب عربية توكيلها ميسدش معايا. ومحبش أركب عربية ملاقيش ليها كماليات لو حبيت فيوم أدلعها بحاجة. ومحبش العربية إللي مش منتشرة (بعكس بعض الناس) مش هقول لدرجة إني ألاقي قطع غيارها عند البقال كتعبير مشهور بس ألاقي حاجتها بسهولة وخلاص وكمان بسعر معقول مش لازم رخيص قوي بس كمان مش غالي قوي قوي.
عن نفسي بيني وبين الياباني عشق قديم مرتبط بأول عربية جابها والدي وفضلت أسوقها قبل ماجيب عربيتي الحالية وكانت مازدا ٣٢٣ ولذلك بقولك هي ثقافة برضة أنا وعيت ع الدنيا لقيت العربية دي وإرتبط بيها نفسيا وبقى عندي تذوق خاص للياباني، قاومتة بشدة وأنا بشتري عربيتي اللوجان بحكم الإمكانيات المادية ساعتها لكن قضل الياباني عشقي والكورولا بالذات ليها معزة خاصة عندي وطموحي إني أجيبها فيوم،ودلوقت لما بفكر أغير تاني قريب حاولت أقنع نفسي بالفلوانس مثلا بإعتبار إنها مش غريبة عليا عشان معايا رينو + إنها فيها العرق الياباني. بس بصراحة لإعتبارات كتير أنا ميال حاليا لإعتمادية الكورولا المعروفة وكل مميزاتها إللي الناس عرفاها من إعادة بيع لغيره، غير إني معرفتش أقاوم إنجذابي للكورولا. رغم إن الفلوانس بتغطي الأوبشنز إللي نفسي فيها أكتر وده كان المغزى من أسئلتي هنا لأصحاب الهاي لاين عن بعض الأوبشنز الدقيقة.
تحس إني بتكلم عن مراتي مش كده هههههه، معلش دي حاجة أكيد يعرفها ويحس بيها كل التويوتاوية وأصحاب الكورولا تحديدا. والموضوع مش موضوع تفكير مصري ده كمان خليجي وحتى أوروبا وأمريكا التويوتا ليها نصيب محترم من سوق العربيات الأجنبية.
وعن نفسي أظن إن إللي معاه كورولا مش بيبيعها غير للشديد القوي ولو جاب عربية بيجيب عليها ويخليها لو الإمكانيات تسمح. ليا والد واحد صاحبي كان فاضل أبوس رجلية يبيعلي كورولا ٢٠٠٦ وواحد تاني صاحبنا بيحاول معاه دلوقت وهو أبدا، على الرغم إنه لو حب يركب مرسيدس أو بي إم هيركبها بصباع رجلة الصغير ماشاء الله، بس هو مرتاح كده!