استفسار عن بطارية جاية مع عربية فابريكة

**peter magdy** · 14-05-2014 01:21 AM

مساء الخير يا شباب
انا معايا عربية byd f3 - و دى اول عربية ليا و اول مرة اسوق و مافيش اى خبرة لسة
العربية بيجى معاها بطارية سائلة كلوريد
العربية بقالها اكتر من سنة ونص تقريبا و ماشية 10.000 كم
البطارية مش بتضايقنى الحمد للة بدورها كل 3 او 4 ايام بتدور على طول - مافيش غير مرة سيبتها اسبوع نامت خالص غيرت مية و اتشحنت و اشتغلت تانى زى الفل بقالها كام شهر اهو
واحد صاحبى من كام يوم بيشوف حاجة فى الكبوت لاقى البطارية فايرة و بص فى العيون ماعادا واحدة علشان الدراع اللى مثبت البطارية وواحدة ناقصة بسيط - غير كدة شغالة زى الفل
-------------
هل الفوران دة غلط على قاعدة البطارية علشان دى مية نار
و اغيرها ولا استنى عليها و لو استنى عليها احمى قاعدة البطارية ازاى من الفوران دة
شكرا

**tameem2010** · 14-05-2014 01:38 AM

البطاريه لازم تتغير وببطاريه جافه
اولا الفوران ده معناها ان البطاريه ضربت نتيجة شحن زياده
ممكن تبقى شغاله انما هي مسالة وقت
لازم تراجع شحن الدينامو لان واضح ان الشحن زياده شوية هو اللى بيخلي البطارية تغلي وتفور
الاهم بقى هو تغيير البطاريه ببطاريه جافة ولازم جافة
لان البطاريه السايلة في العربيه عندك هتلاقيها راكبه فوق فرده الشاسيه
مياه النار اللى بتنزل ديه هتنزل على فرده الشاسيه وهتاكلها لاقدر الله
اغسل البطاريه بمياااه كويس واغسل حواليها بمياه ضروري
لان مياه العاديه هي اللى بتضيع اثر مياه النار
وغير البطاريه في اقرب وقت

**peter magdy** · 14-05-2014 08:54 PM

متشكر لرد حضرتك يا استاذ تميم
للاسف شحن الدينمو بتاع العربية دى فية مشكلة ان شحنة زيادة و دى مشكلة عامة فى العربية دى
و للاسف بردو صعب اغير البطارية حاليا لانة مغير زيت فالفولين و عملت الصيانة فصعب التغيير حاليا
هل ممكن افكها انا و اغسلها بمياة ساخنة ولا لازم كهربائى - قصدى ليها طريقة معينة
شكرا لحضرتك

**carrier** · 14-05-2014 11:37 PM

سلم البطارية بتاعتك لاى تاكس ب150ج طالما شغالة كويس

وزود 50ج عليهم وهات واحدة استيراد جافة نمرة واحد

بتيجى فى الغالب كورى او تركى

وبالتوفيق

**tameem2010** · 15-05-2014 01:55 AM

لا عادي مفيهاش اي خبرة انت اغسلها بمياه ومش لازم سخنه
مياه عاديه اغسل البطاريه كويس وحواليها يعنى المنطقة اللى حوالين البطاريه ( فرده الشاسيه ) بمياه عاديه خالص وكده كده المياه هتلاقيها كلها هتنزل وتصفي تحت العربيه
بس طالما الدينامو بيشحن زياده فاي بطاريه هتبوظ ومش هتطول معاك
وكل يومين بص على البطاريه اول ما تلاقي انها بتكب مياه او مرشحه مياه عليها او جنبها ابقى اغسلها لحد ما تبقى تغيرها
ومتفكش البطاريه ولا حاجة
وهي مكانها كده اغسلها بمياه بس متحاولش تطرطش مياه يعنى تكب عليها بهدووووء وحواليها

**peter magdy** · 15-05-2014 09:34 PM

انا متشكر جدا لردود حضراتكم
صعب البيع لانى معرفش ابيعها و انا عندى صبر و ممكن اتابعها و انا كنت بعمل كدة و بغيرلها مية مرتين قبل كدة شكرا carrier
انا انهاردة وديتها لواحد بتاع بطاريات فكشف عليها
لقى كثافة المية 60 و قالى المفروض انها تبقى 30
فا شفط المية القديمة و هيا مكانها و حط المية الجديدة
و قعد يجرب بجهاز مع النور العالى و تزويد بنزين و مع التكييف و مع النور و التكييف
و قالى البطارية تمام و شغالة كويس بس شحن الدينمو شديد - و قالى مدام مش بتضايق فى التدوير يبقى تمام خليها لغاية ما تخلص خالص
----------------------------
سؤال بقى
هل ممكن افك البطارية و اغسلها بمية سخنة و اسنفر مكان اللى بتكون علية لان علية بواقى احماض خفيفة
و علشان اسنفر القواطيش
و انا جبت من بتاع الكوتش حتة داخلى علشان احطها عليها علشان الاحماض اللى هتطلع منها
اية رأيكم اعمل كدة ولا اعمل اية
شكرا لاهتمام حضراتكم

**carrier** · 31-05-2014 05:20 AM

المشاركة الأصلية كتبت بواسطة peter magdy

انا متشكر جدا لردود حضراتكم
صعب البيع لانى معرفش ابيعها و انا عندى صبر و ممكن اتابعها و انا كنت بعمل كدة و بغيرلها مية مرتين قبل كدة شكرا carrier
انا انهاردة وديتها لواحد بتاع بطاريات فكشف عليها
لقى كثافة المية 60 و قالى المفروض انها تبقى 30
فا شفط المية القديمة و هيا مكانها و حط المية الجديدة
و قعد يجرب بجهاز مع النور العالى و تزويد بنزين و مع التكييف و مع النور و التكييف
و قالى البطارية تمام و شغالة كويس بس شحن الدينمو شديد - و قالى مدام مش بتضايق فى التدوير يبقى تمام خليها لغاية ما تخلص خالص
----------------------------
سؤال بقى
هل ممكن افك البطارية و اغسلها بمية سخنة و اسنفر مكان اللى بتكون علية لان علية بواقى احماض خفيفة
و علشان اسنفر القواطيش
و انا جبت من بتاع الكوتش حتة داخلى علشان احطها عليها علشان الاحماض اللى هتطلع منها
اية رأيكم اعمل كدة ولا اعمل اية
شكرا لاهتمام حضراتكم

البطارية دى هتزهقك فى عيشتك وهتشيلك الهم عند دخول الشتا

دى لو فضلت صامدة معاك اصلا

عالخاص
ابعت لى رقمك اخرجك من الهم دا بمنتهى الشياكة

**Ramadan Kader** · 11-06-2014 02:39 PM

بص يا سيدي أوعى فى يوم تغير ميه للبطاريه مطلقا لان دي حاجه بيعملها الكهربائيه كتيير و بعبط وبيبقى ليه طريقه و للاسف بتبقى مكلفه فكبر دماغك منها. انت لما غيرت المايه و كانت نايمه ده معناه انى املاح الحامض القديمه الى فى البطاريه مازلت لاصقه على بلكات البطاريه من جوه و الى انت دلقته من البطاريه عباره عن حامض خفيف و لما زودت مره أخري حامض كان بتركيزه العالي و ده معناه انه تركيز الحامض تقريبا بقى ضعف الأول و ده سبب الفوران مش الشحن العالى لانك فى البدايه كنت بتشتكي من البطاريه نايمه وده معناه انه مكنش فيه شحن. فلازم تغير البطاريه و متشتريش جافه لان العربيه عنده شحنها سيئ جدا. و دي طبيعه العربيه هات بتتملي احسن ليك .ولما تحب تغير المايه تفضيها و تملها مياه مقطره (بتتباع فى محلات قطع الزيوت ) يعني ميه حنفيه منزوعت الاملاح و الكلور لتجنب الكلور ولاملاح الزياده و تشحنها 8 ساعات و بعد كده فضيها واملها حامض عادي بتركير 1280 و اشحنها من 4 الى 8 ساعات و دي الطريقه الصح ومكلفه هتكلفك تقريبا 50 جنيه

**yassin gaafar** · 22-06-2014 09:46 PM

السادة الاعزاء كل عام انتم بخير
اريد ان اشترى اربع اطارات لسيارتى الفلوانس مقاس 205/60/16 ميشلان فرنساوى او ايطالى (v ).
وبصراحة دورت كتير هل ممكن الاقى عند الزملاء الافاضل حل ؟ اكون شاكر جدا للرد