عملت حادثة و عندي اسئلة بخصوص إصلاح العربية

**Cupoo Elahlawy** · 14-05-2014 06:35 PM

السلام عليكم
أنا عندي عربية دايهاتسو ماتيريا موديل 2009
امبارح عملت حادثة و ربنا ستر الحمد لله لكن الجزء الشمال من الإكسدام الأمامي اتكسر كسر كبير لدرجة إني ربط أزاءه بحبل لغاية ما روحت ، و جزء من الرفرف رد لورا فبقي الباب الشمال بيفتح بصعوبة لكن الكبوت سليم وبردو فانوس الشبورة و الفانوس الأمامي سليم بس هو اتحرك من مكانه سنة صغيرة و اللمبة بتاعته مش شغالة .
فدلوقتي أنا عايز أصلحها لكن خبرتي بالصيانة مش كبيرة فعايز أول حاجة أسأل عن سعر الإكسدام الأمامي للعربية لو حغيره حيبقي في حدود كام بالمصنعية بتاعته و ممكن ألاقيه فين لإنه قطع غيار الماتيريا مش متوفرة كتير و طبعا التوكيل حيمص دمي .
من ناحية تانية لو حبيت أصلحه إيه المفترض إني حعمله .. حلحم الجزء المكسور و أثبته و أرد الرفرف و أرجع الفانوس مكانه و أصلح اللمبة البايظة عند أي كهربائي ؟؟

و ياريت حد يقولي علي ورشة سمكرة كويسةكشغل و سعر في الحرفيين أو مدينة نصر أو أي مكان تاني في القاهرة بس يبقي شغله نضيف و فاهم هو بيعمل إيه و في نفس الوقت ميكونش نصاب في أسعاره
و عامة تصليح الإكسدام في الحالة دي بيتكلف في حدود قد إيه ؟؟

و ربنا يبعد عن الجميع شر الحوادث

**eng.salama93** · 14-05-2014 07:54 PM

روح ورشة نايل موتورز

**ahmedsrs** · 14-05-2014 08:29 PM

قدامك حل من اتنين
1- لو العربية فابريكة ممكن تغير الرفرف خالص تدور عليه فى الحرفيين وتجيب نفس اللون لو امكن او تجيب لون تانى بس كده هتطر ترش دواخل الرفرف الى هيركب او تجيب رفرف جديد من التوكيل واعتقد لو موجود ممكن يعدى ال500 جنيه وبالتركيب والرش والمصنعية ممكن الشغلانة تخش فى 1000 جنيه
2- تسمكر الرفرف بتاعك وترشه والتكلفة اعتقد هتبقى بسيطة ممكن اقل من 500 جنيه
(طبعا الاكصدام الامامى والرفرف هيفكوا والفوانيس هتتشال عشان يضبط وش العربية وبعدين كله هيتركب تانى وطبعا القصة دى هتم فى كلى الحالتين)