الموضوع: شوية مشاكل فى a11

المشاركة الأصلية كتبت بواسطة hazoom2006

العربية عندى فيها شوية مشاكل
1 الباور صوته عالى ولما بلف يمين وشمال بسمع صوت خشن كده وفى زيت عند البطارية وعلبه الباور
2 لمبة المارشدير مابتنورش ساعات تنور وتطفى بسرعه
3 الزجاج الكهربا اللى ورار مش شغال هل فى زرار قافل الزجاج الخلفى ولا اية ؟؟
4 الساعه اللى ف العداد بتاع عدد الكليومترات مابتطفيش بتفضل منورة حتى لما بشيل المفتاح
5 الدركسيون متاكل جدااا وزرار الكلاكش متشال هل فى حل للزرار ولا الدريكسيون كله بيتغير وموجود فين
6 طبعا زراير الزجاج الكهربائى اللى فى التابلوه عايزها ضرورى
7 مؤشر الحرار مش شغال
8 لمبة abs ولمبة الفرامل منورين على طول اية الحل

دى صوره عداد الكيلومترات اللى مابيطفيش خالص حتى لو شلت المفتاح

اولا انت شارى العربية دى من امتى وشاريها كدة ولا حصل كل ده معاك.
ثانيا نمشى معاك خطوه خطوه.
1- فية مصفاه يلاستك ف علبة زيت الباور حاول تشيلها وشوف النتيجة.
2- لمبة المارشيدير عايزة كهربائى كويس.
3- الزجاج الكهربائى الخلفى له زرار ف النصف فى مجموعة ازرار الزجاج الخمسة بيفصله ويشغلة حماية من عبث الاطفال.
4- الساعة والعداد ما بيطفوش ابدا ولا والعربية شغالة ولا مطفية.
5- الدركسيون كله بيتغير من الحرفيين بتاع جولف2 ويركب عليها بدون تعديل (الاصلى ف التوكيل ب 600 جنية).
6- زراير الزجاج ح تجيبهم من التوكيل وربنا معاك.
7- & 8- اعتقد فيوزات محتاجة كهربائى تبع البند 2 ولو لمبة الابى اس وفرامل اليد منورين على طول ده معنا انه مفصول او الفيوز ضارب.
و اى خدمة يا باشا

المشاركة الأصلية كتبت بواسطة hazoom2006

الف مليون شكر على اهتمامك يا باشا

مش لاقى فين المصفاه دى يا ريت لو صوره ليها
لمبة المارشدير كانت المشكلة فى مكنة المارشدير طلعتها نضفتها وغيرتلها الوردة بورده تانية شغالة تمام التمام
زرار الزجاج الخلفى فعلا شغال بس الزرار مقفول من التابلوه لما وصلته اشتغل من الباب بس الزار مكسور بتاعع التابلوه
لسة لمبة فرامل abs وفرامل الهاند منورين مش عارف المشكلة فى اية هتجنن نفسي احل المشكلة هل فعلا فيوز طب مكانة فين ولو حساس عايز تنضيف فين مكانة برده
الباور ساعات صوته يكون رهيب خصوصا وانا بركن لكن وانا ماشى مفيش صوت تقريبا
انا لسة جايب العربية من يومين وبحب اعمل شغلها بايدى مش واثق فى الصنايعيه بصراحة

الله ينور عليك كل اللى عملته ممتاز خاصة وانه بأيدك انا كمان بحب اشتغل بأيدى.
مصفاة البور فى علبة الباور اللى بتحط منها الزيت مش محتاجة صور ما فيش غيرها ليها كلبسين بلاستيك من الاجناب ح تحط فيهم مفك عادة بالراحة علشان ما يتكسروش وتشد لفوق ويستحسن تغير الزيت ح تفك كلبس الخرطوم اللى داخل على طلمبة الباور (الضغط الواطى - السحب يعنى) وتشد الخرطوم وتفضى الزيت وتحط زيت نظيف.
لمبة ال abs وفرامل اليد معناها ان ما فيش كهربة واصله للدايرة كلها شوف الفيشة بتاعته ليها كلبس تشده لفوق وتطلع الفيشة وتغسل بمنظف الكهرباء - والحساسات دى موجودة ف العجل لو عايز تنضفها.
اخر حاجة لمبة التشيك لازم تعرف سير الكاتينة اتغير امتى اخر مرة والعربية عامله كام الف كيلو متر وح تتحط على الكومبيوتر علشان تطفى.
واللى منور ف الطابلوه اللى انت مصوره لمبة الاير باج مش ال abs.
وربنا معاك.

المشاركة الأصلية كتبت بواسطة hazoom2006

تسلم يا باشا طب انا دلوقتى نزلت ادور دارت تمام مفيش 15 ثانية ولمبة الزيت بتنور وصوت صفارة تيت تيت تيت
بطلت استنيت شوية دورت تانى نفس المشكلة فصلت البطارية 10 دقايق ووصلت ودورت نفس المشكله
اية الحل ؟؟

لا الصوره دى من النت مش انا اللى صورتها

لو الزيت فى الكارتير على المقاس كويس يبقى مش ح تخرج عن ثلاث احتمالات... فلتر الزيت مسدود غير الزيت والفلتر اولا وراجع ماكينة الزيت يكون السلك بتاعها عامل ارضى مع جسم العربية...... او ربنا يستر طلمبة الزيت لا قدر الله لو سمعت صوت نقر التاكيهات وما راحش بعد ثلاث ثوانى من الدوارة من غير ما تدوس بنزين..............!!!.