الموضوع: مساعدة من الخبراء بخصوص موتور ريجاتا اليكتريك انجكشن

فيه نظرياً موتور للريجاتا 2000 سى سى بيدى 118 حصان (81 كيلو وات) و عزم 163 نيوتن

الموتور ده كامه مزدوجه (Twin Cam) و 16 صباب و طبعاً حقن اليكترونى كامل و لازم تشتريه بكل مكوناته (الموتور + الضفيره + الكونترول + الفتيس + مروحه الرادتير بقميصها)

و اعتقد ان الموتور ده مش هتلاقيه فى مصر مبدأياً ...

و لو لقيته و عندك ريجاتا 85s زى حالاتى مش هايركب عندك لانه هايحتاج تعديلات فظيعه جداً علشان يركب (ضفيره - كونترول - موبينه - راداتير و مروحه - قص فى الصاج - تغيير قواعد - تغيير الفتيس - تغيير طاقم الدبرياج - ... ) و بعد ده كلو مش هتلاقيلو قطع غيار بسيطه زى سير الكاتينه و فلتر الهواء فمابالك لو جرالو حاجه و احتجت حاجه جامده زى وش سلندر او جوان او احتجت تعمله عمره ..

لو عايز موتور استيراد للريجاتا يديها قوه اعلى حاجه بسيطه هات موتور اللانشيا ديدرا 1600 سى سى موديلات 1994 : 1998 (بيدى 90 حصان و انجكشن بنظام single point) بيركب بدون تعديلات كثيرة و قطع غياره متوفره فى مصر ..

او اختيار تانى الموتور 1600 بتاع الريجاتا 100s هايحتاج تعديلات بسيطه علشان انجكشن لكن هايركب بدون مشاكل بس اسمع ان قطع غياره الداخليه مش موجوده بكثره (وش سلندر - طاقم صباب - ...)

طبعاً لو رحت عزبه شلبى هاتتصدم فى الاسعار اللى ولعوها التجار بسبب الدولار (رغم ان البضاعه عندهم من سنين متخزنه و احتمال تكون متهربه كمان) فالأحسن و الاضمن تدور فى الحرفيين او بورسعيد ..

بالتوفيق ان شاء الله و اى خدمه عن الريجاتا فيه كذا حد هنا معاه العربيه و خبراء فيها اكثر منى