زيت ولف اخر مرة

**mosman** · 16-05-2014 10:28 PM

يا جماعة ...أنا صاحب البوست التالي :

http://www.nilemotors.net/Nile/41725...hetic-oil.html

بجد دي اخر مرة احط فيها زيت وولف .....ده مش تشهير بالمنتج بتاعهم ...بس صوت الموتور عالي زي ماهو و شكلي كده هانزله برضه زي اللي قبله وانا لسة معملتش بيه 300 كيلو ...كده 500 جنيه راحو على الأرض ....أنا هارجع تاني لفالفولين

**أحمدكونت** · 17-05-2014 12:05 AM

حضرتك حطيت زيت نوعه ايه من ولف ولعربيه إيه اللانسر ولا الشاهين وعامله كام كيلو العربيه ؟؟؟

**أحمدكونت** · 17-05-2014 12:19 AM

انا قريت موضوعك معلش استعجلت بالسؤال من غير ماشوف الموضوع اللى انت كاتب اللينك بتاعه بص فى حالتك دى انت بتقول ان العربيه كانت مرتاحه معاك على الزيت التخليقى لو كود الزيت اقل وتخليقى يبقى انت اصلاً اخترت نظام تاااانى ( من الاخر الموتور لم يتفاعل مع الزيت ) علشان كده صوته على ( الاحتكاك بين اجزائه الداخليه زادت ) ولكنه مش هيأثر على حاجه ماتخفش بس عايز اعرف الفالفولين كان كوده ايه اللزوجه ؟؟؟ وعلى فكره من وجهه نظرى ولف ملهاش علاقه كل الحكايه الزيت ماتفعلش مع الموتور علشان اتعود على نوع بس قولى هو كان لزوجته كام ( الفالفولين ) ؟؟

**mosman** · 17-05-2014 01:38 AM

أولا ...ألف شكر على ردودكم ....بصوا يا جماعة...الكلام ده بالنسبة للعربية اللانسر ....هي موديلها 2009 و قاطعة 54 ألف كيلو ....زي ما شفتوا في اللينك الموجود بالأعلى أنا حطيت 10w40 بالغلط ...و لما صوت العربية كان عالي بغباء رحت منزل الزيت بعد 300 كيلو و حطيت Wolf VitalTek 4w40 بعد كده .

انا كنت ماشي على زيت fully synthetic 5w40 من أول لما جبت العربية ...في الاول خالص كنت بستخدم زيت شل هلكس الترا و كان مش بطال .....بعد كده بقيت باحط valvoline synpower 5w40 و ده كان كويس و مشيت عليه 12 ألف اخر مرة ....و كان صوت العربية هادي بس الموتور ضعيف شوية في الشد .....دلوقتي صوت الموتور عند 2 rpm زي كأنه عند 4 rpm .....و دي حاجة مزعجة .....بس العربية التسارع بتاعها أفضل و الصوت هو اللي عالي .....على فكرة ...مش أنا بس التي باشتكي من الموضوع ده ....لو عملتوا بحث على النت هتلاقوا فيه ناس ليها شكوى مشابهة ....شكلي هارجع للشل تاني

**mosman** · 17-05-2014 01:51 AM

معلش يا جماعة ...اخر زيت دلوقتي ....Wolf VitalTech 5w40.....معلش الواحد اخر الليل بيخرف

**أحمدكونت** · 17-05-2014 11:06 PM

الملخص للموضوع ده هو انك لما تغير من مستوى لزوجه لمستوى لزوجه او من تخليقى لمعدنى فانت بتغير نظام اتعود عليه الموتور نتيجه ده صوت الموتور بيعلى او بشكل علمى شويه بيحصل ان اجزاء الموتور الداخليه مابتتفعلش مع الزيت اول مره لكن بعد تانى او تالت مره هتلاقى الموتور اتفاعل معاه والدنيا بقت فل بس نصيحه يعنى طالما ماعدتش 100000 كيلو وانت اصلاً كنت شغال بتخليقى يبقى خليك عليه ماتغيرش تانى ومن وجهه نظرى كل الانواع زى بعض ماتوهمش نفسك الاختلاف بيبقى فى الجوده و اللزوجه و تخليقى ولا معدنى واختار شركه مشهوره ماتجبش حاجه ملهاش اسم غير كده كله واحد والله اعلم

**carrier** · 18-05-2014 02:27 AM

للاسف
انت كده بدمر موتورك خلاص

بسرعة حط اى نوع زيت تانى تخليقى

ولازم تنظف الانجكشن وفلتر الهوا او غيره

**Astra Lovers** · 18-05-2014 04:36 PM

متابع

**أحمدكونت** · 18-05-2014 04:54 PM

المشاركة الأصلية كتبت بواسطة carrier

للاسف
انت كده بدمر موتورك خلاص

بسرعة حط اى نوع زيت تانى تخليقى

ولازم تنظف الانجكشن وفلتر الهوا او غيره

ليه ياباشا مش للدرجه اللى بتوصفها .. انا عارف انك تقصد اهميه التخليقى لموتور بالحاله دى بس لو مره ماتأثرش خالص على الموتور هايحصل تأكل عادى بالنسبه الطبيعيه ماتخوفش خالص ( كلام ميكانيكى ) كل الحكايه ان صوت الموتور هايعلى معاه طبعاً علشان الاحتكاك هايزيد فى البدايه لان الموتور مش متعود على النوع ولا اللزوجه لكن لو غيره هاترجع كل حاجه لطبيعتها والله اعلم

**mosman** · 18-05-2014 09:10 PM

الاخ كارير .... أنا طول عمري على التخليقي الكامل Fully Synthetic من أول ما اشتريت العربية .....أنا ما عملتش على الزيت النصف تخليقي Wolf ExtendedTech 10w40 ده غير حوالي 250 كيلو ....المشكلة اللي بتخليني أغير الزيت بره مركز الصيانة (اللي في صقر قريش من نزلة الاوتوستراد) إنه للاسف مش بيرضى يحط زيت غير موبيل وانتو عارفين سمعة موبيل عاملة ازاي. بس واضح إني لازم أروح أكشف على الموتور قبل ما أغير الزيت الاخير ده .....محتاج رأيكوا يا جماعة