صيانة الألف للسيراتو

**Islam Zaki** · 17-05-2014 07:32 PM

ان شاء الله هعمل صيانة الألف للسيراتو 2014 هي العربية مشيت 1009 كيلو بس كان عندي كام سؤال
ايه افضل مكين اعمل فيه الصيانة من حيث الشغل الفني مش مهم المكان و القعدة و التكييف وكدة
تاني حاجة يا تري ايه اللي بيتغير والصيانة بتكون تكلفتها حوالي كام
و المدة اللي الصيانة بتحتجها حوالي اد ايه
واسف يا جماعة اني طولت عليكم وشكرا

**Islam Zaki** · 18-05-2014 07:44 PM

مافيش حد عمل صيانة قبل كدة ولا ايه يا جماعة

**OmarEzzat93** · 18-05-2014 09:33 PM

التكلفه حوالى 350 جنيه و بتاخد تقريبا ساعتين ده لو مركز الصيانه فاضى انا عملت صيانة الالف فى الرواس فى العبور و بيبقى فيه استراحه و كده

**Islam Zaki** · 18-05-2014 09:48 PM

شكرا يا عمر ع الرد بس معندكش اخبار فرع القطامية كويس ولا لا علشان ده اقرب فرع ليا

**aouelfotouh** · 18-05-2014 10:02 PM

صيانة الالف مفهش مشكل هى تغير زيت وفلتر زيت وتربيط عفشه وكشف على كذه نقط بس

**said.d.y** · 19-05-2014 06:10 AM

انا عملت عند السبع ال فى زهراء المعادى ، وشايفهم محترمين فى المواعيد ، والشغل زى ما اخونا اتفضل وقال لك صيانة الالف مفيش فيها حاجة ، وغسلوا العربية بعد عمل الصيانة، ودلوقتى عندهم عرض الفلتر ببلاش .
وطالما فرع القطامية قريب منك ، يبقى السبع نفس الكلام
طبعاً الكلام دى على اساس ان حضرتك تبع التوكيل موش خليجى ومعاك ضمان الوكيل ، لان فى الحالة دى لازم تعمل الصيانة فى التوكيل او مركز معتمد

**الجنرال** · 19-05-2014 10:33 AM

في صيانة الالف زي ما الاخوة قالوا بالضبط

الفكرة ان انت لو ليك ملاحظات لازم تقولها في صيانة الالف .. لان انت هتروح تاني فى ال10 الالاف وده مدة طويلة

لو عندك حدفة فى الدريكسيون .. يبقى لازم وانت بتحجز معاد الصيانة تحجز ضبط زوايا (دي الخدمة الوحيدة الى محتاجة حجز) .. لكن مفيش فلوس عليها طبعا

اي ملاحظات فى العربية .. الشنطة لازم تترزع علشان تتقفل .. الفرامل .. التكييف .. الكاوتش .. صوت خبطة .. اي حاجة تحسها مش مزبوطة لازم تقولهم علشها

معلش استحمل وخد اليوم ده اجازة وقضيه هناك عندهم علشان ياخدوا راحتهم فى الصيانة

فرع القطامية للاسف صغير قوي .. انا رحته مرة بس بجد صغير جدا وببقى خايف يخبطوا العربية من كتر ما هو صغير وفي مكان بشع .. انا شخصيا بفضل اروح ابو رواش

وربنا يوفقك

**Islam Zaki** · 19-05-2014 07:43 PM

المشاركة الأصلية كتبت بواسطة tiggosaid

انا عملت عند السبع ال فى زهراء المعادى ، وشايفهم محترمين فى المواعيد ، والشغل زى ما اخونا اتفضل وقال لك صيانة الالف مفيش فيها حاجة ، وغسلوا العربية بعد عمل الصيانة، ودلوقتى عندهم عرض الفلتر ببلاش .
وطالما فرع القطامية قريب منك ، يبقى السبع نفس الكلام
طبعاً الكلام دى على اساس ان حضرتك تبع التوكيل موش خليجى ومعاك ضمان الوكيل ، لان فى الحالة دى لازم تعمل الصيانة فى التوكيل او مركز معتمد

العربية وكيل فعلا بس عندي سؤال سازج شوية علشان معنديش اي خبرة في العربيات دي اول عربية ليا هو السبع ده تبع كيا معتمد منهم يعني مافيش فرق بينه وبين اي فرع تاني كلهم بيعملوا نفس الحاجة ؟ وشكرا علي ردك