زى العنوان كده مابيقول العربيه هيونداى ماتريكس (بتاعه بابا) يعنى أنا مش بفهم فى حاجات العربيات بس كنت عايزه احكيلكم اللى حصل

كانت واقفه قدام العماره وجت واحده حماره ملهاش فى السواقه اصلا معرفش ادوها رخصه ازاى دخلت في العربيه دخله مايدخلهاش حمار أو حتى واحد لسه بيتعلم السواقه كسرت الاكصدام الامامى تماما والعلبه بتاعه التكييف ودى جوه العربيه (هى تقريبا اسمها كده ) لان الخبطه كانت جامده جدا

المهم البواب وقفها وعقبال مانزلنالها اتحججت انها متأخره عالشغل وقالت انا متكفله بأى فلوس للاصلاح وادتنا رقم تليفونها وهى ساكنه فى عماره قدامنا

فى نفس اليوم قعدنا حوالى 6 ساعات عشان العربيه تتصلح واتكلفت 1400 جنيه
كنا ناس محترمين وبما انها قالت هتدفع التكاليف معملناش محضر
وبعتنالها ايصال بتكاليف الاصلاح مع العلبه المكسوره عشان تعرف ان الخبطه كانت جامده واننا مش بنألف ان فيه قطعه داخليه فى العربيه اتكسرت

فى يومها بالليل قابلنا أخوها (ظابط شرطه) حصلنا الذعر ياعم الحاج
وقعد بقى يقولنا أنا كان ممكن اصلحهالكم بأقل من كده قولناله يعنى تبهدلوا عربيات الناس وتركبولها اى قطع غيار على مزاجكم؟!!

وهو كان محترم وقال ادونا مهله لاخر الاسبوع نجهز المبلغ واتفقنا معاه لما يجهز يكلمنا

انه يتكلم ..أبدااااااا

كلمناه يوم الجمعه (اخر الاسبوع زى ما طلب) رد وكان ناسى اصلا مهى مش فلوسه بقى وقال على رأى المثل لو عايز حد ناسيك يفتكرك خد منه فلوس
و قال معلش عندى مأموريه وبكره ان شاء الله هقابلكم ونتحاسب ووافقنا وقولنا معلش ظروف شغله وكده

تانى يوم بقى انه يعبرنا..أبداااااااااااااا

اتصلنا بيه كتييييييييييييير انه يرد ابدااااااا

سألت محامين قالولى طالما ماتعملش محضر فى الاول والعربيه متبهدله يبقى اصبح الموضوع ماينفعش يتحل الا ودى لان مبقاش فيه اى دليل انهم خبطوكم

وفيه محامى قالى ممكن تعملوا محضر والشهود يشهدوا باللى حصل لكن موقفكم ضعيف جدا
والمحضر هايتحفظ وتوكلوا محامى ويعمل تظلم وساعتها ممكن يبقى فيه امل مش كبير لكن موجود

يعنى نقوم محامى بحوالى مثلا 2000 جنيه ( انا مش متأكده طبعا من ال2000 دى بس معتقدش هيقل عن كده) عشان ناخد 1400 جنيه ويا ناخدهم يا مناخدهمش؟

أنا بقى عارفه انى طولت عليكم بس أنا كتبت الموضوع لأكتر من سبب

أولا انى متغاااااااااااااااااااااا ااظه الى أقصى درجه اننا كنا محترمين و كانت النتيجه اننا يحصلنا كده
ويتاكل علينا حقنا

ثانيا ان اخر حاجات فى موضوعى دى كانت لسه حاصله امبارح يعنى النيه بانت انهم مش ناويين يردوا الفلوس فعايزه اعرف رأيكم يعنى ايه الحل دلوقتى؟ولو أنتم مكاننا كنتم هتعملوا ايه (وأقصد مكاننا يعنى معملتوش محضر من الاول ووصلتوا للحاله اللى حاصله دلوقتى دى وانهم بيتهربوا)

ثالثا لما سألت كذا محامى قالولى كذا حاجه كان مفروض يتعملوا وده اللى عايزاكم تاخدوا بالكم منه بعد كده عشان لو لاقدر الله حد فيكم عربيته حصل فيها كده

1- تصورورا العربيه من الحتت اللى فيها المشاكل من الخبطه من كل الاتجاهات ومهم جدا ان رقم العربيه يكون باين عشان تثبت انها عربيتك

2-تروح فورا تعمل محضر باللى حصل وطبعا يكون معاك رقم العربيه اللى خبطتك وماتصلحش العربيه الا لما يتقالك من الظباط انك تقدر تصلحها عشان حقك مايضيعش

وشكرا انكم اتحملتوا الرغى ده وادعولى الغيظ والخنقه دول يروحوا لأن كل ما أفتكر اننا كان ممكن نمرمطهم ونعملهم محضر ونبهدلهم ومعملناش كده فالنتيجه اننا نكون احنا اللى قاعدين زعلانين كده بتغاظ جدا

وعالعموم الحمد لله على كل شىء واللى يجى فى الريش بقشيش وحسبى الله ونعم الوكيل فيهم وربنا ما يباركلهم ولا يهنيهم فى ولاقرش أكلوه علينا