الموضوع: ملاحظاتي البسيطة عن الكروز 2014

المشاركة الأصلية كتبت بواسطة kkhidr

رجعتلكم تاني بعد إسبوع من إقتنائي الكروز والسفر بها مرتين.

إنطباعي عن العربيه:

العربيه محترمه جدا لدرجة إني ساعات بحس إني مش راكب كوري خالص..
العربيه مصروف عليها من حيث التقفيل والصاج وحتى لون الدوكو ..
كسواقه العربيه نعمه جدا و سواقتها حلوه وعزلها ممتاز والكونسول مريح وكل حاجه في مكانها صح ..
الفتيس نقلاته حلوه ومستجيب للبنزين بالرغم من طلعة العربيه بحسها بطيئه شويه .. بس هي جرايه وتجمعها ماشاء الله ممتاز ومغريه أوي عشان مش بتحس بالسرعه حوه وإنت قافل الزجاج.
إستهلاك البنزين مش هحكم عليه دلوقتي لأني لسه مش عارف أظبط دوسة البنزين ساعات بحرق على العربيه لكن لحد دلوقتي أنا عامل على التفويله 410 كم وفاضل ربع التنك ..

بصفه عامه أنا راضي جدا من العربيه على قد الفلوس اللي دفعتها فيها .. كان مهم أوي البارك سينسور عشان العربيه طويله بس ده عادي من منصور.

ملاحظات أخرى سلبيه:

- في خبطه بسيطه كده بحس فيها في الدريكسيون مع الفرمله .. ياريت حد يشوف ويأكدلي بتحصل معاه ولا أنا بس
- التكييف ساعات كفاءته بيبقى مش أوي بس الهواء ساقع - هل ده بسبب إني لسه في الأول ولا درجة الحراره الفظيعه بتاعة اليومين دول.
- في زنه أو صوت زنه بسمعه في الموتور على rpm 2 بس لازم أكون قافل الراديو أوموطي عشان أسمعها .. ممكن تكون حسوكه أو وسوسه


غير كده كل حاجه تمام جدا في العربيه


أكتشافات:

- لو مدي إنتظار فلاشر بعد شويه الصوت بيبقى سايلانت والفلاشر شغال وانت مبطل العربيه
- دراع الإشاره في زقه كده يعمل إشاره 3 مرات 3 عشان لو داخل حاره أو بتاكل غرزه مثلا زي العربيات الألماني
- لوك الإزاز بيمنع الكنترول وراء بس عشان الاطفال و إزاز اللي جنب السواق شغال عادي
- لوك الباب نفس الكلام زي الازاز
- إزاز العربيه حراري بيمنع لسعة الشمس في الطارة و الكراسي ومش بتبقى مولعه (تجربه في الساحل ركبت العربيه في عز الظهر و الطاره مكنتش بتلسع ولا الكراسي خالص بالرغم من الصاج كان مولع من الراره)


بس كده و أسف للإطاله وربنا يكفينا كلنا شرها و يدينا خيرها و بارك الله فيكم

ياباشا طول براحتك ولايهمك احنا هنا علشان نفيد بعضنا
ثانيا الف مبروك علي الجميله كروز ربنا يباركلك فيها ويكفيك شر عيون الناس
من الحاجات اللي كانت بتضايقني في الاكسنت موضوع سخونة العربيه في الصيف بس انت فرحتني بأن الزجاج حراري وبيخفف سخونة العربيه
اما بالنسبه للعيوب .. مافي عربيه بدون عيوب الكمال لله وحده اهم حاجه انها مش مؤثره الحمد لله انا عن نفسي لما بتقابلنب العيوب البسيطه دي بعمل نفسي مش واخد بالي :)

شكرا علي المشاركه

تحياتي

الحمد لله استلمت النهارده :))) ان شاء هجربها فى الفتره اللى جايه اكتر و هتابع معاكم اول باول . بس مبدئيا كده الحمد و الشكر لله راضى جدا من ادائها و محستش انى راكب عربيه اقل من الاسكودا بالعكس الكروز بتتفوق فى بعض النقاط . هاوافيكم بالاخبار اول باول ان شاء الله . ادعولى بقى ربنا يباركلى فيها و ارخص على خير :)

المشاركة الأصلية كتبت بواسطة ashouhdy

الف مليون مبروك ... كدة معظم ملاك ال 2014 من الكروز اسكندرانية !!

وانت اللون رقم 3 في اسكندرية :)) في عربية تانية ماهوجني برضوا غيرى ههههههههه

عايزين بقي مقارنة بين العربيتين الكروز و الفانتازيا من حيث الثبات استجابة الموتور المناورات .... الخ

enjoy :b4_048:

الله يبارك فيك يا دكتور . فعلا انا ملاحظ ان معظم الملاك فى المنتدى من اسكندريه و كنت قايلك قبل كده هى فعلا الكروز محبوبه فى اسكندريه و ما شاء الله منتشره فى البلد باختلاف موديلاتها .
انا شوفت واحده بس ماهوجنى قدام سان استيفانو من حوالى 10 ايام و فعلا اللون منطق العربيه بشكل غير طبيعى ربنا يكفينا شر العين
ان شاء الله هعمل تقرير عن العربيه بس انا لسه مارخصتش و مش عارف اجرب العربيه كويس علشان اكتب تجربتى ..... بس الانطباع المبدئى عنها :
- العربيه مش بطه خالص و لا عمرها شافت البط فى حياتها و الفتيس ادائه راقى مفيش تاخير بين النقلات فى السحب او نتش بين الغيارات فى الزحمه و العربيه بتنقل فى العادى على 2000 ار بى ام .
- التكييف شغلته النهارده ما شاء الله جميل جدا و قوى و محستش بتاثير على السحب لما شغلته . مش عارف بقى صح انى اشغله دلوقت و لا استنى عليه شويه قولولى انتوا .
- العفشه طريه مش ناشفه زى الاسكودا و العربيه بتاخد و تدى مع الحفر و النقر و دى كانت من اهم النقاط بالنسبالى .
- العزل و التقفيل بتاعها ممتاز صوت الموتور هادى ومفيش اصوات تزييق . التابلوه بتاعها شيك و حلو و الاضائه بتاعته حلوه بالليل .
- مش فاكر مين اللى كان بيسال على ال pdi بس عموما العربيه واخداها و متجربه قبل التسليم
-الفرامل كويسه جدا و لما تحتجها هتلاقيها باذن الله لكن المشوار بتاعها اطول من الاسكودا شويه يعنى مش من اول لمسه بتظغط سنه الاول و بعد كده تلاقيها بتكلبش معاك .
- العربيه مصفحه من تحت و ارتفاعها عن الارض جميل و مش بتحك الحمد لله .

دى الانطباعات الاوليه و الحمد لله راضى عن العربيه و تستاهل كل قرش اندفع فيها و لسه هوافيقكم بكل جديد ان شاء الله ادعولى انتوا بس ان ربنا يحفظهالى و انا اظبطكم

بمناسبه التظبيط ممكن تصورلى يا دكتور شهدى الطاره الجلد اللى حضرتك عملتها و تقولى عملتها فين علشان عاوز اعمل واحده انا كمان