الموضوع: انطباعى الشخصى ما بين ال ix35 هيونداى و الفلوينس

كنت خارج مع صديق ليه لسه شارى ال ix35 من يومين الفئه التانيه 225000 جنيه فطبعا كان عندى الفضول انه اقارن بينها و بين الفلوينس اللى لسه شاريها برضه و كان بيقنعنى اشترى الهيونداى معاه و قلت اسجل انطباعى الشخصى فى الفرق بين الاتنين :
1- اول ملاحظه ليه اول ما اتحركنا العفشه ناشفه بطريقه لم اتوقعها بصراحه و سألته عن الضغط فى العجل قال لى انا ظابطه و دى مقارنه بالنسبه لعفشة الفلوينس اللى انعم منها بمراحل .
2- الفخامه الداخليه برضه كانت حاجه غريبه بالنسبه لعربيه ب 225000 جنيه . يكفى اقول انه ما فيش ريحة النواكل فى اى حاجه جوه العربيه لا المقابض و لا الدريكسيون و قاعدة الفتيس بلاستيك اسود . اندهشت جدا لما شوفته . ما فيش خياطه فى الدريكسيون و لا مقبض الفتيس
3- المساحه الداخليه لا تعكس شكلها الخارجى باى شكل .
4- اداء الموتور و استجابته ناعمه مع الفتيس و العربيه طبعا عاليه عن الارض .
5- التنجيد داخل العربيه بالنسبه للمقاعد لا يرقى لتنجيد الفلوينس خصوصا الكرسيين الامامين و خليته ينزل و يجرب بنفسه

الكورى فعلا فيه استهبال فى اسعاره بطريقه غريبه بس طبعا الموضوع عرض و طلب و ثقافة شعب . ما زال الكورى حاجه و الاوروبى و اليابانى حاجه تانيه

المشاركة الأصلية كتبت بواسطة Mohamed.Hany

مين كان يسمع عن ال suv قبل سنة ٢٠١١ او بمعني اصح قبل الثورة ؟ و سعرها كان كام مقارنة ببقية العربيات السيدان ؟
يعني افتكر كدة السبورتاج كنت بتشوفها في الشارع ساعتها كام مرة و كانت بكام ؟
انتشار ال suv ده كان لسبب واحد و هو الاحساس بالامان خصوصا بعد الانفلات الامني بداية من ٢٠١١ ، راكب عربية عالية لو حد كسر عليا اكسر عليه هو اللي هيخاف ، اتزنقت من قطاع طرق ادخل في طريق غير ممهد اطلع فوق الرصيف حتي و امشي النحية التانية.
و ده السبب الوحيد للانتشار و زيادة السعر بشكل عجيب جدا لا يتوافق مع مواصفات العربية.
في رأي افضل suv في مصر حاليا مقابل سعر هو بيجو ٢٠٠٨ و ٣٠٠٨ غير كدة اسعار عجيبة غريبة!

اتفق معاك نسبيا فى تحليلك , بس كام واحد يقدر يخلع لو بيتثبت حتى و لو راكب جيب ؟ الرشاشات اللى بتكون موجوده تصفى اتخن عربيه لو فكر يخلع , ده فيه عضو فى قسم البيجو كان معاه 301 اتثبت بخمس رشاشات يا مؤمن , غير كده العربيات دى صاجه ضعيف جدا شوف السبورتاج صاجها عامل ازاى , يعنى صعب برضه تجازف بالكسر على حد او انك تجاريه فى الرخامه , العربيه الوحيده اللى انا باشوفها تسد فى المواضيع دى و بتعلم فعلا على بتوع الميكروباصات و العالم دى هيه الجيب رانجلر , اعتقد انه سوء حالة الشوارع و عدم وجود صيانه او سفلته من فتره بعد 25 يناير و الميه و المجارى الطفحه فى احسن اماكن القاهره او اللى كانت , من الاسباب الرئيسيه , بس ده كله غير مبرر للاسعار دى بالكواليتى و المواصفات دى , غير كده الكورى حتى فى غير ال suv داخل فى منافسه و فئات سعريه مش بتاعته و عندك السيراتو مثال صارخ كمنافس للكورولا و الفلوينس و الاسترا و هاتعديهم فى السعر قريب و لكن نرجع نقول عرض و طلب و الوكيل لو مش لاقى عليهم طلب فعلى ما كانش وصل للاسعار دى