أعمل لأختى اكونت عالفيس بوك ولا لأ ؟

**A_H_M_A_D** · 20-05-2014 11:08 PM

نصيحه بلاش بجد ، هاترجع تندم وتقول ياريتني معرفتها سكة الزفت ده
فيه حاجات تانيه كتير ممكن تشغلها ، هاتلها تابلت مثلا وخليها تنزل جيمز و ابليكيشنز و تتسلى
او خليها تدخل على الواتساب ، على الاقل هايبقى كل اللي بتكلمهم ناس هي وانت عارفهم بس بلاش الفيس بوك

**moody_687** · 21-05-2014 12:56 AM

من الواضح من كلامك ان عائلتك شديدة وبتمنع كل شئ سواء كخروج مع اصحابها البنات وتشوف الدنيا لوحدها وده استشفيته ( من جملة انها ع طول ف اوضتها ومقدمهاش غير التلفزيون )
وطبعا مفيش لاب ليها ولا كمبيوتر وتدخل ع النت عاما ومعندهاش بالتالي فيس بوك اى التواصل الاجتماعي مع اصحابها البنات
نصيحتي ليك احتوها ثم احتوها وزى ماحضرتك ماقلت انها ف سن حرج وعايز اكدلك ع حاجة ان البنت لو عايزة تعمل الغلط هتعمله حتى لو قفلته مية باب وباب
ولازم تحسسوها انك مدينها الثقة وانها انسانة مسئولة واجذبوها ليكم بحيث تيجي وتحكى ليكم مشاكلها اللي بتقابلها فالحياه عاما عشان انتم الناس الوحيدة اللي عايزين ليها الخير

**ريحانة** · 21-05-2014 02:09 AM

جلوسها لوحدها فى السن دا اكبر خطر ....وبيولد أمراض نفسية لا حصر لها

سنها عز الحركة والطاقة والحيوية
لازم تتفاعل مع المجتمع حتى لو هى مش اجتماعية
انتو شجعوها بدل ما تفقدوها للأبد
ممكن تشجعوها على الاشتراك فى الندوات ...او كورسات تنمية بشرية
او كورسات لغات...تتعلم حاجة جديدة
او تشارك فى انتاج....او تشارك فى عمل
زى تروح جمعية خيرية وتساعد فيها
او تروح دا ايتام -دار مسنين............الخ
تساعد الوالدة فى اعمال المطبخ والمنزل
تروح دروس فى المساجد وتحفظ قرآن فى المقارئ...لعلها تجد صحبة صالحة تعينها
على الدنيا
انما لا انصح ابدا بموضوع الفيس بوك وهى فى هذا السن
الفيس بوك اصبح فعلا قنبلة موقوتة
والنت عموما حتى المنتديات النسائية فيها الصالح وفيها الطالح
وربنا يكتبلها الخير ويصرف عنها الشر

**mustafavet** · 21-05-2014 07:14 AM

والله انا شايف انها تعتمد علي افعالك انت
طالما بتحترم البيوت وبتتبقي الله في بنات الناس اعرف ان ربنا هيباركلك في اختك
كما تدين تدان
الفيس بوك مدخل للشيطان بس مش هو بس ف مداخل كتيرة

**مصطفى-حسن** · 21-05-2014 11:53 AM

صدقنى لو عرفتها سكة الفيس زفت دة هتضرب نفسك بالجــ$#@!$
مجرد نصيحة من اخ

**eng/ahmed_go** · 21-05-2014 01:51 PM

اعتقد يا باشا التابلت لوحده مش كفايا لازم تنزل وتحتك بالمجتمع بايجابياته وسلبياته وتتعلم تكون تكون قويه وتحافظ على مبادءها مهما كانت البيئه اللي حواليها
وغير كده هوا ليه حضرتك حكمت عليها انها مش اجتماعيه مفيش حد بيكون اجتماعي في يوم وليله لازم تنزل تاخد كورسات او تشارك في عمل خيري ودا هيخليها اجتماعيه لكن صدقني العزل عن المجتمع عمره ما كان الحل بالعكس بيجيب نتايج عكسيه وبيخلي شخصية البني ادم ضعيفه سهل التأثير عليه

**Mohamed_Hamid** · 21-05-2014 02:14 PM

الموضوع بسيط ومفيهاش حاجة خالص متحسسهاش بالحصار ده لأنه بيخلق عدم الثقة ومشاكل تانية. اعملها الاكونت وخليها هى اللى تضيفك عندها متفرضش نفسك عليها انها تضيفك علشان متحسش باتك بتراقبها وعرفها خطورة انها تحط صور شخصية على الفيس ومتعرفهاش خبايا الفيس زى انها تعمل اخفاء لقائمة الأصدقاء علشان تبقى مطمن لصديقاتها اللى عندها انهم كويسين ( بس مش تروح تصاحبهم انت : ) بهزر معاك
الله يحفظنا جميعا

**ayman20100** · 21-05-2014 02:36 PM

المشاركة الأصلية كتبت بواسطة adel 000

شكرا يا جماعه عالردود المحترمه دى
واضح ان فيه اتجاااااه كبير مع انى اعملها اكونت عالفيس
وأتجاه أخر انى مخليهاش تقتحم عالم الفيس بوك
وانا الصراحه بميل لهذا الأتجاه الأخر خصوصا ان البنت مطلبتش منى قبل كده انها يبقى ليها اكونت عالفيس فمش عايز تبقى جت منى انا واخاف اندم عالخطوه دى بعد كده
وعشان كده انا وصلت لحل مبدئى وهوه انى عندى جهاز تابلت بعلبته :) هديهولها تبقى تتسلى عليه وتلعب جيمز وتنزل اللعب والتطبيقات اللى تعجبها وممكن تنزل كتب عليه وتقراها " مع انها ملهاش فى القرايه " :(
بس فعلا الجهاز ده مسلى جدا الواحد كل ما النور يقطع بيضيع الوقت عليه :)

اعذرني لو تعليقي مش هيعجبك
بس واضح فعلاً ان فيه حاجة غلط في تعاملكم معاها
انت بتعاملوا طفلة !!! تاب ايه الى يبقى عليه جيمز وتلعب عليها
ديه بني ادم كبير وليه كيان وشخصية وواضح انكم لاغيين الفكرة ديه خالص وانكم بتتعاملوا بمبدأ المنع والمنح
انا كان ليا تعليق انك تعمل الفيس وده مش كفاية
لانها لازم يكون لها اصدقاء ونشاطات لازم تخرج وتشوف ناس
فيه مليون نشاط واهتمام والافضل انكم تساعدوها بدل ما تتحكموا فيها وبعدين تلاقوها بتضيع منكم
بالنسبة لتعليق ان الفيس مدخل من مداخل الشيطان ... بصراحة هو فيه ايه مش مدخل من مداخل الشيطان ...هو التليفزيون ايه والسينما والراديو والجرائد والمجلات والشارع ياسيدي الفاضل ديه لو وقفت في شباك هيبقى مدخل من مداخل الشيطان
لاحظ مرة تانية انها انسان وليه مطلق الحرية مش مسجون بينفذ عقوبة بالحبس والحرمان
الى هتقدر تمنعه انهارده مش هتقدر تمنعه بكره وساعتها هتبقى غصب عنك ومش هتقدر ولا تتابع ولا توجه .