السلام عليكم ورحمة الله وبركاته

تعمل بعض اجهزة التليفون المحمول بنظام الاندرويد
ومن ضمن متطلبات التشغيل عند تشغيل التليفون لاول مرة
ان يكون ليك حساب على ال Gmail
وغالباً بنعمل الحساب ده عبارة عن باسورد + يوزرنيم
لحد كدة مفيش مشكلة

امال ايه المشكلة ؟
المشكلة انى لما دخلت من على الكمبيوتر على حسابى فى جوجل (Gmail)
لاقيت كل الصور والفيديوهات اللى مصورها بالتليفون المحمول
موجودة على صفحتى الشخصية على حساب جوجل بتاعى
بالنسبة لى كانت صدمة بصراحة
وده حصل لان فى خاصية فى التليفون
اسمها التزامن الالى (Auto Sync)
موجودة فى قائمة (ِِAccounts and sync setting)
ودى مهمتها تحديث بياناتك على حساب جوجل بتاعك
بمجرد ما تغير اى معلومات على التليفون
او تنزل اى صورة او تضيف اى رقم تليفون ..
تتعدل فوراً طبقاً للموجودة على التليفون اول باول
ولتجنب ده الغى خاصية التحديث الالى دى
بحذف علامة الصح اللى عليها فى الاعدادات

هى مش معمولة للتجسس
هى معمولة علشان لو فقدت التليفون او ضاع
ممكن تسترجع صورك وارقامك وبياناتك
تقدر تقول يبقى عندك نسخة احتياطية من ملفاتك وارقامك وصورك
بس انا مش بحب ده بصراحة
الهدف من الموضوع
تنبيه الشباب هنا لانى اتصدمت لما لاقيت صورى وصور الاولاد على جوجل
وانا مش عارف مين ممكن يخترق حسابى ده !!